1 Kolìntyàns 13 - The New Testament in the Babanki language

Əkòŋ

¹ Mà sətsen ə nkɨ ə gàʼ təgàʼ tə viʼi to a tənkì a tənkì nə̀ tə gàʼà tə ətsɨŋsə Nyìngòŋ, alì ko andiʼ la ma kiʼi əkòŋ, a mà na nyaŋlə to tiʼitiʼi ə viʼi to nə̀ ngèm azhʉ̀ a və kumə buʼtə to buʼtə.

² Mà sətsen ə nkiʼ kəku ə nshɨtə kɨ ə shə̀ʼtə̀ kənyʉ̀ kə Nyìngòŋ, zhʉ kɨ nyʉ̀ ə lyomtəvə, no ə tsèm, kiʼi ətof kumə əfo ə tsèm be kiʼi əbyɨmə a ghə̀ zì ghə ne la mà ə məʼtə phènsə alì ko ndiʼ la ma kiʼi əkòŋ, ko mà na kwʉ̀ʼʉ̀ no kəfo no fa mpfen.

³ Ma sətsen ku no tèbe ghò a ma kiʼi, be ku no əwen ghomə la və nyuʼ ali faŋke nkiʼi əkòŋ, ko mà na kwʉ̀ʼʉ̀ no to kəfo no fa mpfen.

⁴ Wìʼ ə sətsen ə nkòŋ viʼi, a ghə̀ ne wensə be tuʼmə, wìʼ ə sətsen ə nkòŋ viʼi, kò ghə̀ be a ghə̀ʼə̀ vəwenə, kò ghə̀ be nà kùmə kədyʉ̀ʼ, ko ghaŋsə əwèn.

⁵ Wìʼ ə sətsen nkòŋ viʼi, ko ghə̀ be nà ne sə ghə̀ ki ko ghə̀ lu yenə vəwenə, kò ghə̀ be na kwòʼtə̀ kumə to wèn ə wen, ko ghə̀ be nà fwisə tin, kò ghə̀ be nà taŋtə nyʉ̀ vyi a və ne mbyɨbsə a wen.

⁶ Wìʼ ə sətsen ə nkòŋ viʼi, kò ghə̀ be nà saŋlə kumə ənyʉ̀ byɨvə, ghə̀ ne saŋlə kumə to kənyʉ̀ kì a kə diʼ nəmwèʼè.

⁷ Wìʼ ə sətsen ə nkòŋ viʼi, ko ntsìnə̀ wìʼ be na byɨf ə ghoʼo wen, ko ghə̀ be nlye mbyɨsə viʼi, ghə̀ ne tsi kɨ to kɨ la no tebe ghò yi a ghə̀ bo ki kəʼtə lu ndiʼ to alì. Wìʼ sətsen ə nkòŋ viʼi, a ghə̀ ne wensə nyʉ̀ tsèm to wensə.

⁸ Wìʼ ə sətsen ə nkòŋ viʼi, ko ghə̀ be a maʼa kòŋ wen. Ənyʉ̀ vyi a nshə̀ʼtə̀sə ə ngàʼa a diʼ kəku a və kù a vəwenə lu mè, tə gàʼà titə a və kù a kəku a viʼi mè, ətof yì a viʼi ə kiʼi a diʼ kəku ko be lu ndiʼ.

⁹ Kə diʼ alə̀ byìʼì ando vəghəŋ ə tofə to kəbyəʼ kəbyəʼ, shə̀ʼtə̀ ntɨmə Nyìngòŋ to kəbyəʼ kəbyəʼ.

¹⁰ Ənyʉ̀ ə tɨməvə lu vì, ə nyʉ̀ vyì a ko diʼ nyʉ̀ tɨməvə li mè.

¹¹ A ndiʼ ando ma diʼ wàyn, ma ngàʼà to nə̀ wàyn, yenə ənyʉ̀ to nə̀ wàyn, kwoʼtə to nə̀ wàyn. Luwen ando mà sə diʼ wù ə to, ma moʼtə li nyʉ̀ ə voyndyə.

¹² Vəghəŋ ə yenə nyʉ̀ luwen tosə vəghəŋ yenə a məlaməlamə, yenə sə vəghəŋ yenə a zhʉ a kənkàʼtə̀ ko kə tuʼtə baynə. Kətsi kə lu vì, ə vəghəŋ shɨtə yen mwetə. Luwen diʼ, ma kɨ nyʉ̀ to kəbyəʼ kəbyəʼ, kətsi kə diʼ lù vì, ə mà shɨtə kɨ mwetə nyʉ̀ no tsèm to ndə̀ŋndəŋ ando Nyìngòŋ ə kɨ mò.

¹³ Luwen, nyʉ̀ venə ə tàʼ, à lə əbyɨmə nə̀ kənyʉ̀ kì a vəghəŋ ə ki kəʼtə kəwenkə, kɨ nəmwèʼè la və lu ndiʼ, nə̀ kòŋə ə diʼ mu və faŋ li to nəmwèʼè ali no kənyʉ̀ ki a kə to chò a ntìntìn nyʉ̀ a ghèn diʼ əkòŋ.

« Roimhe

Air adhart »

Lean sinn:

Ceanglaichean taic

Sanasan