1 Joyn 5 - The New Testament in the Babanki language

Vəghəŋ ə zhɨ li mbi

¹ No ndò a ghə̀ byɨmə la Yesò dìʼ Klistò mu wìʼ ayì dìʼ wàyn Nyìngòŋ. No ndò a ghə̀ kòŋə̀ tìʼ ə bè kòŋə wàyn a tìʼ ayì ə kiʼi.

² Vəghəŋ zì vəghəŋ kɨ la vəghəŋ ə kòŋə̀ vunə Nyìngòŋ a zhʉ a vəghəŋ ə kòŋə̀ Nyìngòŋ be nè nyʉ̀ vyi a ghə̀ gàʼà.

³ Ghenə diʼ əkòŋ ə Nyìngòŋ: la vəghəŋ ghʉ təsoʼ tə wen. Təsoʼ tə wen tə ko to a məghʉ,

⁴ byìʼàndo no wàyn Nyìngòŋ ko sə̀ kiʼ kədyòʼ ə̀ zhɨ mbi, ə cho fa ə byɨmə vəghəŋ a Klistò.

⁵ A zì a zhɨ ndo ə̀ zhɨ mbi əchò wìʼ a ghə̀ byɨmə la Yesò dìʼ wàyn Nyìngòŋ a?

⁶ A dìʼ Yesò Klistò aghèn a ghə̀ ə nlu fa kàŋ ə̀ vì a nse, ə̀ shì mu ə̀ bè pfʉ ə̀ chʉ̀tə̀ mənlyuŋ mə̀ wen. Ghə̀ nko shì tò mu ə̀ sè, ghə̀ mbe pfʉ ə̀ chʉ̀tə̀ mənlyuŋ mə̀ wen.

⁷ A dìʼ kəzhwì kəŋwoʼkə diʼ wu yenə a nyʉ̀ avenə byìʼàndo kəzhwì akènkə diʼ nəmwèʼè.

⁸ Viʼi və yenəvə diʼ vətaʼ, kəzhwì kə ŋwoʼkə, mu, nə̀ mənlyuŋ; viʼi vətaʼ avenə byɨmə a kənyʉ̀ kə mùʼ.

⁹ Vəghəŋ sətsèn ə mbyɨmə nyʉ̀ a viʼi gàʼà, əvi a Nyìngòŋ ə gàʼà dìʼ nəmwèʼè chò vi a viʼi gàʼà lì byìʼàndo ghə̀ gàʼà byìʼì wàyn wen.

¹⁰ No ndò a ghə̀ byɨmə à wàyn Nyìngòŋ ə kɨ kənyʉ̀ akènkə tò a wen a tyɨm. Wìʼ a ghə̀ ko byɨmə Nyìngòŋ, ə ne li wen a wù ndzɨ̀ŋ byìʼàndo ghə̀ ko byɨmə kənyʉ̀ a Nyìngòŋ ə gàʼà byìʼì wàyn wen.

¹¹ Kənyʉ̀ akènkə a Nyìngòŋ ə gàʼà dìʼ la, ghə̀ ku li əbwòŋ à vəghəŋ a ghə̀ ko lu mè, əbwòŋ aghenə diʼ chò fa à wàyn wen.

¹² Wìʼ a ghə̀ diʼ wenə̀ wàyn a kənyʉ̀ kə mùʼ kiʼi əbwòŋ a ghə̀ ko lu mè, wìʼ a ghə̀ ko diʼ wenə̀ wàyn a kənyʉ̀ kə mùʼ ko kiʼ əbwòŋ.

Əbwòŋ a ghə̀ ko lu mè

¹³ Mà nyòʼò kənyʉ̀ kènkə a ghə̀ vyi a ghə̀ŋ ə byɨmə a zhiʼ wàyn Nyìngòŋ ndi ghə̀ŋ kɨ la ghə̀ŋ kiʼi əbwòŋ yi a ghə̀ ko lu mè.

¹⁴ Vəghəŋ sətsèn tɨmə a shɨ Nyìngòŋ ə̀ bèm no tè ghò à wen a ji a ghə̀ kəŋə, vəghəŋ ə nkɨ nəmwèʼè la ghə̀ zhʉ vəghəŋ.

¹⁵ Vəghəŋ sətsèn ə bè ə nkɨ la ghə̀ zhʉ vəghəŋ no tè bè a gho a vəghəŋ ə bèmə̀, vəghəŋ ə kɨ̀ la vəghəŋ ə kiʼi li kəfo a vəghəŋ ə bèmə̀ à wen.

¹⁶ A sətsèn à yen tè ndò yèn lèmə̀ wen ghə̀ nè mbyɨ, a ko diʼ mbyɨ a ghə̀ gə̀sə̀ wen fa əbwòŋ. Ghə̀ jɨ̀mə̀ a Nyìngòŋ a ghə̀ a ku əbwòŋ à wen. Kènkə dyʉ̀ a viʼi vi a mbyɨsə vəwenə sə diʼ shìsə a sə ko gə̀sə̀ vəwenə fa bwòŋ lì. Mbyɨ dìʼ a ghə̀ gə̀sə̀ viʼi fa bwòŋ. Mà ko gàʼà la wìʼ jɨm byìʼì nki mbyɨ aghèn.

¹⁷ Nyʉ̀ shwevə no tsèm dìʼ mbyɨ, alì mbyɨ tsen dìʼ a ghə̀ ko gə̀sə̀ wìʼ fà əbwòŋ.

¹⁸ Vəghəŋ ə kɨ la no ndò a dìʼ wàyn Nyìngòŋ ko nè mbyɨ, byìʼàndo Wàyn ə tùʼmə̀ nə̀ wen kò à ndiʼ la Deblə̀ zì ghə̀ ku ngəʼ à wen no fa mpfen.

¹⁹ Vəghəŋ ə kɨ la vəghəŋ dìʼ vunə Nyìngòŋ no tè ando mbi tsèm dìʼ a ti soʼ Deblə̀.

²⁰ Vəghəŋ ə̀ bè kɨ la wàyn Nyìngòŋ ə̀ mvi li ə̀ dìʼsə̀ vəghəŋ la vəghəŋ nkɨ Nyìngòŋ yì a ghə̀ diʼì nəmwèʼè. Vəghəŋ sə diʼ a kənyʉ̀ kə mùʼ vəghəŋ və wen yì a ghə̀ diʼì nəmwèʼè bènə̀ wàyn wen ə Yesò Klistò. Ghə̀ dìʼ Nyìngòŋ yì a ghə̀ diʼ nəmwèʼè be diʼ əbwòŋ a ghə̀ ko lu mè.

²¹ Kə ghə̀ŋ a nkiʼ kənyʉ̀ kə tsenkə nè wenə vənyìngòŋ a vunə vwomə.