1 Joyn 4 - The New Testament in the Babanki language

Kəzhwì kə nəmwèʼè nə̀ kə ndzɨ̀ŋ kə

¹ Viʼi ndoŋsə mò, kə ghə̀ŋ a mbyɨmə viʼi vətsèm a və gàʼà la vəwenə kiʼ kəzhwì, alì ghə̀ŋ mwomsə vəwenə ə yen la, tì kəzhwì akì lù fà Nyìngòŋ lo. Ghə̀ŋ diʼ ənè a lì byìʼàndo nshə̀ʼtə̀sə ndzɨŋsə fʉ li se jèʼè fa mbi no səghoʼo.

² Ghə̀ŋ zì ghə̀ŋ kɨ la wìʼ kìʼ kəzhwì kə Nyìngòŋ a ji la wìʼ ayì ə byɨmə la Yesò Klistò ə mvi li a mbi ashə̀ a wen ə wìʼ.

³ No tè ndò a ghə̀ ko byɨmə la Yesò Klistò ə mvi li a wen ə wìʼ, ko kiʼ kəzhwì kə Nyìngòŋ. Ghə̀ bòŋsə̀ kìʼ kəzhwì kə wù kəbàyn ə̀ Klistò, à diʼ kì a ghə̀ŋ ə nzhʉ li la kə lu vì. Kə sə̀ diʼ a mbi luwèn.

⁴ Ghə̀ŋ dìʼ viʼi Nyìngòŋ a vunə vwomə, mu ghə̀ŋ ə to li ə ncho viʼi avenə byìʼàndo kəzhwì a kə diʼì à ghə̀ŋ ə tətyɨm ə to chò kì a kə diʼì a mbi.

⁵ Nshə̀ʼtə̀sə ndzɨ̀ŋsə asènsə diʼ viʼi mbyi. A dìʼ kənyʉ̀ a vəwenə gàʼà, tò nyʉ̀ ə mbi, viʼi mbyi be zhʉtə̀ əgàʼ vəwenə.

⁶ Vəghəŋ dìʼ viʼi Nyìngòŋ, no ndò a ghə̀ kɨ Nyìngòŋ ə zhʉtə̀ fà vəghəŋ. Wìʼ a ghə̀ ko diʼ wù Nyìngòŋ ə ko zhʉtə̀ fà Nyìngòŋ. A dìʼ a ji a ghèn a və kɨ kəzhwì kə nəmwèʼè nə̀ kì a diʼì kə ndzɨ̀ŋ kə.

Nyìngòŋ dìʼi əkòŋ

⁷ Vəlèmə̀ və kòŋ ə̀ mò, vəghəŋ ə nkòŋmə̀ təwenə tə vəghəŋ byìʼe ə̀kòŋ ə lù fà Nyìngòŋ. No ndò a ghə̀ kòŋə̀ dìʼ mu à bwì Nyìngòŋ ə mbwi wen ghə̀ be kɨ Nyìngòŋ.

⁸ Wìʼ a ghə̀ ko kòŋə̀ alì ko kɨ̀ Nyìngòŋ byìʼàndo Nyìngòŋ dìʼ əkòŋ.

⁹ Nyìngòŋ ə ndiʼì li əkòŋ ə wen à vəghəŋ a ji la ghə̀ ə ntɨm li wàyn a ghə̀ ə̀ nkìʼ, tò mùʼ a tì mbi ndi vəghəŋ lù kiʼi əbwòŋ ə chò fà wen.

¹⁰ Nkàyntə̀ əkòŋ dìʼ ghenə: kə ko diʼ tè la vəghəŋ ə̀ nkòŋə̀ Nyìngòŋ, alì ghə̀ kòŋ vəghəŋ ə̀ tɨ̀m wàyn wen ndi ə chò fà wen, ghə̀ lyesə ku mbyɨsə vəghəŋ.

¹¹ Vəlèmə̀ və kòŋ ə̀ mò, a zhʉ a ghèn dìʼ ji a Nyìngòŋ ə nkoŋə̀ li vəghəŋ fa tsu, mu vəghəŋ bè yi ndiʼi ə nkòŋmə̀ təwen tə vəghəŋ.

¹² Wìʼ ko ntəmə yèn Nyìngòŋ, alì mu vəghəŋ yi ə nkòŋmə̀ təwen tə vəghəŋ, Nyìngòŋ a ndiʼ à vəghəŋ a ntìntìn, əkòŋ ə wen be kwʉ̀ʼ ə̀ mè à vəghəŋ ə ntsìnə̀sə.

¹³ Vəghəŋ ə kɨ la vəghəŋ dìʼ a kənyʉ̀ kə mùʼ vəghəŋ və Nyìngòŋ a ji la Ghə̀ ku li kəzhwì kə wen à vəghəŋ.

¹⁴ Vəghəŋ ə yen li be sə shə̀ʼtə̀ à viʼi vətsenvə la Tìʼ ə ntɨm li wàyn wen a nə̀ mbwòŋsə̀ viʼi mbyi.

¹⁵ A byɨmə tè ndò ə̀ be nshə̀ʼtə̀ la Yesò dìʼ Wàyn Nyìngòŋ mu ghə̀ dìʼ wenə̀ Nyìngòŋ a kənyʉ̀ kə mùʼ.

¹⁶ Alì, vəghəŋ ə kɨ be byɨmə əkòŋ yi a Nyìngòŋ kìʼ à vəghəŋ. Nyìngòŋ dìʼ əkòŋ, no ndò a ghə̀ ə kòŋə̀ viʼi vətsenəvə və dìʼ wenə və Nyìngòŋ a kənyʉ̀ kə mùʼ.

¹⁷ A ji aghèn, əkòŋ ə Nyìngòŋ ə kwʉ̀ʼ mè à vəghəŋ ə ntìntìn ndi vəghəŋ lu ə nti a nkàyn kətsi kə nsoʼ, byìʼàndo ntsìnə̀ vəghəŋ a mbi dìʼ tò nə̀ ghə̀ Klistò.

¹⁸ Əfàyn ko diʼ a tyì kòŋ. Əkòŋ yi a ghə̀ kwʉʼʉ̀ li ə me ə dzɨ̀mə̀ shìsə̀ əfàyn no tsèm, byìʼàndo viʼi ə fàynə byìʼì nsoʼ a və lu soʼ vəwenə. Wìʼ sətsèn ə mfànə̀ mu əkòŋ ə Nyìngòŋ ko kwʉ̀ʼ ə me à wen a tyɨm.

¹⁹ Vəghəŋ dìʼi ə nkòŋə̀ byìʼàndo Nyìngòŋ ə ncho li mbì ə̀ kòŋ vəghəŋ.

²⁰ A sətsèn a gàʼ tè ndò la, “Mà kòŋə̀ Nyìngòŋ.” Alì bàynə̀ lèmə̀ wen mu ghə̀ zhò ndzɨ̀ŋ byìʼàndo Wìʼ ko zì ghə̀ faŋ ke nkòŋə̀ lèmə̀ wen a ghə̀ yenə, ghə̀ lu ə nkòŋə̀ Nyìngòŋ a ghə̀ nko təmə̀ yen wen.

²¹ Əsoʼ yi a Nyìngòŋ ə ku à vəghəŋ dìʼ la, no ndò a ghə̀ ə kòŋə̀ Nyìngòŋ dìʼ be ə nkòŋə̀ lèmə̀ wen.