Bìoball air-loidhne

1 Bità 5 - The New Testament in the Babanki language

Kətyiftə a vəchəʼ nə̀ mbvòʼò wìʼ

^1-2 Ma sensə vəchəʼ və ngə̀ŋ Nyìngòŋ vyi a və diʼi a ghə̀ŋ a ntìntìn la və ə shɨtə tùʼmə̀ nə̀ viʼi vyi a Nyìngòŋ ə kuli a vəwenə to nə̀ byisə. Ghə̀ŋ kɨli la nkàyntə̀ mo diʼ to no chəʼ mu ma ə yen li to ando Klistò yènə ngəʼ. Ma diʼ to a ntìntìn əbayn yi a Nyìngòŋ ə lu diʼ a tʉʼ a Yesò lu bwenə vi. Ghə̀ŋ sə tuʼmə nə̀ vəwenə, ghə̀ŋ ə diʼi la ghə̀ŋ kòŋ kənyʉ̀ kì a ghə̀ŋ nè. Kə ghə̀ŋ a nè sə və ghaʼ ghə̀ŋ ghaʼ, byìʼì ando Nyìngòŋ ə kòŋ la ghə̀ŋ ə nè a ji na ghèn. Ghə̀ŋ ə ghablə, nè shwèʼ. Kə ashɨ a ghəŋə baŋə a ko.

³ Kə ghə̀ŋ a zhiʼtə viʼi vyi a və ku la ghə̀ŋ tùʼmə̀ nə̀ vəwenə. Ghə̀ŋ ə nboŋsə diʼ nchwi a vəwenə.

⁴ Ghə̀ŋ ə nè alə, ndi wìʼ yi a ghə̀ diʼi to nə̀ kətʉ kə a ətsɨŋsə byisə lù bwenə vi no a tʉʼ ə ko ə ku əsòʼ ə təfòyn nə̀ əmòʼtə a ghə̀ŋ, ghə̀ baynə, ko ghə̀ lu musɨ.

⁵ Mbvòʼò ə wìʼ, ghə̀ŋ ə be zhʉ to fa vəchəʼ və ngə̀ŋ Nyìngòŋ. Ghə̀ŋ nò vətsèm mòʼ gumlə a ghə̀ŋ wèn a nə̀ ndisə ə gumlə təwen ə təŋtə. Ghə̀ŋ kɨli la Nyìngòŋ ə baynə viʼi vyi a və ghaŋsə əwen, ali tùʼmə̀ nə̀ viʼi a və shiʼsə təwen tə vəwenə.

⁶ Ghə̀ŋ ə shiʼsə təwen ə təŋtə a tyi kədyòʼ ə Nyìngòŋ ndi zhʉ̀ lù kwʉʼ, ghə̀ lùsə ghə̀ŋ.

⁷ Ghə̀ŋ lyɨ̀ nyʉ̀ vyi no tsèm a və ku ngəʼ a ghə̀ŋ ə vi kù a wen byìʼì ando ghə̀ tuʼmə.

⁸ Ghə̀ŋ ə nyʉ̀ʼ bvɨtə be ghaʼ təwen ətəŋtə byìʼì ando wù kəbàyn ghə̀ŋ a diʼ Deblə̀ nyoʼo kaʼa to nə̀ nyàm ə kəbo, bufə, kəŋ wìʼ ə mì.

⁹ Ghə̀ŋ tɨmə to a ghə̀ŋ əbyɨmə ndiʼ nto chò wen. A ghə̀ŋ kɨli la vəlemə vəŋə ə yenə ngəʼsə to ndə̀ŋndəŋ to nə̀ ghə̀ŋ to mbi ə tsèm.

¹⁰ Ghə̀ŋ a nyenə ngəʼ to fəshyinə fə zhʉ̀ alə̀, ə Nyìngòŋ ə tisə ghə̀ŋ, ə ku kədyòʼ a ghə̀ŋ, a kə nè la ghə̀ŋ ə to no nànto. Ghə̀ diʼ Nyìngòŋ, kusə shinsə no nànto. A ndzàŋ wen ə dzàŋ ghə̀ŋ la ghə̀ŋ vi kwen a wen a tyi əbayn ə ghoʼoghə chò fa Yesò, a diʼ əbayn, ko andiʼ la ghə̀ lu mè.

¹¹ Kədyòʼ kə wen kə faŋ to faŋ to məzhʉ ə tsèm. Amèyn.

Ətoŋtə Kəmwetə

¹² A gyàmtə̀ Silàs ngyàmtə̀ mò ma nyoʼtə fə ŋwàʼlə̀ na fenfə a ghə̀ŋ. Ghə̀ diʼ to no lèmə̀ ə jùŋ a əbyɨmə. Mà nyoʼtə mənyʉ̀tə a mèyn ndiʼ ghə̀ŋ lɨ̀mtə̀, ə be ə diʼi a ghə̀ŋ la Nyìngòŋ ə nshɨtə tùʼmə̀ nə̀ ghə̀ŋ. Ghə̀ŋ tɨmə ə nto a tuʼmə a ghèn.

¹³ Lèmə̀ ghə̀ŋ yi a ghə̀ diʼi a Babilòyn, a yi nòynə ə viʼi və byɨməvə vi a Nyìngòŋ ə tsuʼ li, ə tɨmə ətoŋtə a ghə̀ŋ. Mak, ə wàyn ghom a əbyɨmə ə be tɨmə ətoŋtə a ghə̀ŋ.

¹⁴ Ghə̀ŋ toŋtə təwen təŋtə to no a ji ə diʼ əkòŋ ə viʼi və byɨməvə. Ma jɨ̀mə̀ la mbwaʼmə Nyìngòŋ faŋ to faŋ a ghə̀ŋ no vətsen a və byɨmə li a Yesò.

« Roimhe

Air adhart »

Lean sinn:

Ceanglaichean taic

Sanasan