Yuda 1 - Bibilia Buk na Ŋun nagon koti luŋu a

Romesi

¹ Nan Yuda koliponit lo Yesu Kristo ko a luŋaser Yakobo, nan roman ko nutu logon a luŋu logon Ŋun Monye nyanyar kilo ko a gaju se ko Yesu Kristo i mugun.

² Nan roman ko ta adi, Ti yatet, ko taliŋ, se ko nyaŋu gwe ko ta bia parik.

Katodinok ’buronok

³ Julin kwe lo nyanyara, nan gwon kata ko pusok i wurökiŋdyö na ta i kulya ti lwökö nikaŋ nagon yi a par na. Ama nan a ryö adi nan kodyo nyoŋga ’de ’de i wurokiŋdyo na ta anyen jujukiŋdya ta i woro i juŋdyö na kulya na yuŋ yi kine, nagon Ŋun a wukin ŋutu kanyit daŋ geleŋ a ’dutet.

⁴ Kogwon kulye ŋutu kata logon a domaddu ’borik a lwön. Kilo a ŋutu logon ti twoju Ŋun, ama a löpuŋge tolien nikaŋ nagon Ŋun a tikin yi kana na anyen se koŋdya toron aka nagon joŋdya yu na kwe, a se renyani Duma likaŋ lo geleŋ logon a Matat Yesu Kristo. Koju ’beron lepeŋat a wuloki i ’duŋoki na ŋilo putet.

⁵ Ta köju a den kine kulya liŋ ’bura, ama soŋinana nan ’dek toyiyikiŋdyö ta; Matat aje Lwökuŋdyö ŋutu ti Yisaraele kaŋo i jur lo Ejipeto, ama i mukök a nye iŋge tukar ŋutu logon a ko yubbö kulo.

⁶ Köti yeyeji ta malaikajin logon a ko yeŋon si ’da i tumatyan nagon a tiki se na, ama lepeŋat a kolökin pirit gwiliŋit nase, Ŋun a ’delakin se i mudwe logon adi ’dii a rereggi se ko toŋot lo yeŋ nyin, mordu lor duma logon ’duŋdki ’e se putet lu.

⁷ Köti yeyeji ta Sodoma ko Gomora se ko köjinö na diŋö ko se kunu, nagon ŋutu kase a kita gwoso na koŋdi malaikajin na, a koŋdi toluŋ ko i kepoddu na ’dekesi lepelok nagon ’bayin a ti mugunya, a se iŋge ŋoŋga riŋet i kimaŋ na yeŋ nyin. Kulya kase a tiki a miret.

⁸ Nyena kilo ŋutu köti gwon ko rudweesi nagon tiŋdu se i toluddya na ’börik, ko ti ’bön sara, ko i lauŋdya na teŋ na malaikajin lo bubula.

⁹ Ma ’di Mikaele duma lo malaikajin a ko momoröju. I diŋit na möröri nye ko Kaŋöönit, na rerenyari se i kulya ti öpu na Mose nu, lepeŋ a ko bu ’ya mugun i riŋga na Kaŋöönit ko kulyaesi momoresi, kolumbo lepeŋ tuŋ kulya adi, Ti Matat riŋge do.

¹⁰ Ama kilo nutu momoröju ŋo nagon se ti kurun kune, ama tuŋ deŋdya nase na po gwon gwoso na gwolorgi kijakwa nagon ti den kulya, a kine ŋo na tukaŋi se.

¹¹ Woidio lepeŋat! Se kepoddu kiko lo Kaina, a kolokiŋdye ’borik i lyaŋan kogwon se ’dek gurut gwoso na lyaŋgi Balam koju nu, a se iŋge renya gwoso na renyari Kora koju nu, a mo tatuani gwoso lepeŋ.

¹² Kilo ŋutu gwon gwoso lut nagon ’yoddya ta na gwoŋdi ta i nyesu i pirit na geleŋ ko tojulin nasu na gwon ko Yesu i mugun na, lepeŋat nyesu ko möju ko to ’betan rurugga ’borik ka ’de. Lepeŋat gwoso ’dikolo na wuköji ko köbuŋöt a tine joŋdya kudu; lepeŋat gwoso kaden ti ’butun logon ti radan ludweki, lepeŋat a kaden logon a gwunye kaŋo ko kokori a iŋge twatwa asut.

¹³ Lepeŋat gwoso yalajin ti tor logon ya ’yu ko riŋit, a kobuŋe konesi kase nagon toyuuŋdyo kwe gwoso na kobuŋe pioŋ a gwe a ko ŋuto na. Lepeŋat gwoso kaser logon woro abur, logon pirit nagon a mudwe adi ’dii a wuloki lepeŋat ŋupi ŋupi.

¹⁴ Kilo ŋutu a se logon Enoka toburyo lo nyakwariat ti Adama a keju koju i kulya kase adi, Mete, Matat mo popo ko malaikajin kanyit loke alipan ti alipan.

¹⁵ Nye po i joŋdya na ŋutu liŋ i putet, ko i ’duŋokiŋdyo na ŋutu liŋ logon ti twoju lepeŋ kilo, kogwon konesi liŋ nagon ’bayin a twoyesi nagon se a kon kune, se ko kulyaesi laesi logon kilo ŋutu katoronyak logon ti two lepeŋ kilo a jam arabat i kulya kanyit kulo.

¹⁶ Kilo ŋutu a kawiwinyak a tine lyoŋon i nene ŋo, lepeŋat woro i ’dekesi kase narok, a jambi kulyaesi lobot logon a ŋo kana, a ’bu ’buddye kulye ŋutu anyen ryeju nene ŋo.

Jujuwesi se ko saresi

¹⁷ Ama ta julin kwe lo nyanyara, ta agu kodyo yeye ŋo nagon luyökie ti Matat likaŋ Yesu Kristo koju a jam kune.

¹⁸ Lepeŋat koju takiŋdya ta adi, Kulye ŋutu logon a ka ’dö ’döyök mo pupukun i perok ti ’dutet, logon woro i ’dekesi kase narok nagon ’bayin a twoyesi ti Ŋun.

¹⁹ Kilo a ŋutu logon joŋdya kulya ti kökoroja. Lepeŋat gwolor a ti mugun a gwe ’bak Mulokotyo Loke.

²⁰ Ama ta julin kwe lo nyanyara, gweyuŋdye ta ’borik ki i pipilet na yupet nasu nake parik; momo ’yi ta i riŋit na Mulokotyo Loke.

²¹ Yeŋe ta i nyaret na Ŋun, ko möŋdi ta yatet na Matat likaŋ Yesu Kristo i tiŋdu na ta ru na yeŋ nyin.

²² Wone ta konyen ko ŋutu logon dyadya ’yu i yupet kilo;

²³ lwök ta kulye i jekuŋdya na se kaŋo i kimaŋ; wone ta konyen ko kulye, ama kunyar ta, mane ta man ma ’di boŋgo nagon a bobota ko lut nagon a ’dekesi ti mugun.

Bubulesi

²⁴ Ti bulet gwe ko ŋun geleŋ Kalwokonit likaŋ, logon bubulo oju ta i ’doro, a bulöni bulö tiŋdu ta i gwo ’dan ’bak körit ko lyoŋön a duma i komor nanyit nagon a minyo.

²⁵ Ti bulet, ko tomoran, ko saret, ko kido, gwe ko lepeŋ kogwon kulya ti Yesu Kristo Matat likaŋ, suluja a kokwe i diŋitan liŋ, ko i na diŋit, se ko i diŋit na popo ŋupi ŋupi. Amin.