Yosua 9 - Bibilia Buk na Ŋun nagon koti luŋu a

Mumulugga na ŋutu ti Gibeon

¹ A ko gwe sona na yiŋge moran liŋ lo gwon i nu pele na Yardene kine kulya nu, kweja adi se lo gwon i merya ki, ko i jur lo gwon i dudulet, ko i kijit na tör duma na ’balaŋ na gwon i komor na Libanon, a kilo moran ti ŋutu ti Kiti, ko ti Amori, ko ti Kanana, ko ti Peŋi, ko ti Kiwi, ko ti Yebusi

² tomori ’borik i pirit na geleŋ ko töili geleŋ, i moro ko Yosua se ko ŋutu ti Yisaraele.

³ Ama a na yiŋge ŋutu ti Gibeon ŋo na konakin Yosua Yeriko se ko Ai nu,

⁴ a se koŋdi ’borik a lokoŋ, a iti i teteŋdya na kinyojin, a tiŋdi suaran ŋörökök ko kaineki loki, ko jurakan ŋörökök ti binyo logon a kekerenya ko a rurugala,

⁵ kökamuka ŋörökök lo kopa logon se a sukin kase i mokosi, ko boŋgwat ŋörökök a na jujupu; a ambatajin liŋ nagon a jolisi iŋge teteyon, ko aje buggi.

⁶ A se iti ko Yosua yu i mera nagon gwon Giligala nu, a kulyani ko lepeŋ se ko ŋutu ti Yisaraele adi, Yi a poŋdya i jur lo pajo; nyenagon ti yi teteŋdi tomoret ko ta.

⁷ a ŋutu ti Yisaraele kulyani ko ŋutu ti Kiwi kulo adi, Kodeŋona ta si ’da kayaŋ kiden; nyena a yi buloni bulo teteŋdya tomoret ko ta ada?

⁸ A se kulyani ko Yosua adi, yi a köliŋönök kulok. A Yosua pipije lepeŋat adi, Ta a kuŋa? Taŋo ya?

⁹ A se waddi lepeŋ adi, Yi köliŋönök kulok a poŋdya i jur lo pajo parik kogwon kulya ti karin ti MATAT ŋun ilot; kogwon yi a yiŋ kuörö nanyit, koŋo liŋ na konakin lepeŋ i Ejipeto kunu,

¹⁰ koŋo liŋ na konakin lepeŋ i moran murek ti Amori lo gwon i nu pele na Yardene, logon a ko Sikon mor lo Kesebon se ko Oga mor lo Basan, lo gwon Asatarot kulu.

¹¹ A temejik kaŋ se ko ŋutu liŋ ti jur likaŋ kulyani koyi adi, ’Dumakiŋdye ta kinyojin jolisi kasu i könisi, ko iti ta i törumbo ko se, kulyani ta ko se adi, Yi a köliŋönök kasu; nyena ti yi teteŋdi tomoret ko ta.

¹² Ambatajin kaŋ makine; yi a ’dumun se kaŋo kayaŋ i kadijik a kinyo jolit nagon se nyuŋ pape i lor lopiuŋdye yi i kasu ni lu, ama soŋinana mete ta, se aje teteyon, ko aje buggi.

¹³ Kulo jurakan ti binyo logon yi aje tojore kulo köju a ludukö, ama mete ta, se aje pupu ’dotu, a kune boŋgwat kaŋ se ko kamuka kaŋ aje wora aŋörökök kogwon na jolo a najo parik.

¹⁴ A ŋutu kulo wuji lele kinyo lose, a tine piyuŋdya kulya ko MATAT i kutuk.

¹⁵ A Yosua koŋdi töjulin ko se, a teteŋdi tomoret ko se, anyen kolökin se jörun; a temejik ti momoret milyekiŋdye se milye.

¹⁶ A ko gwe sona i mukök na perok musala na teteŋdi se tomoret nase nu, a se yiŋge adi kulu ŋutu a maratejin kase, adi se si ’da kase kiden.

¹⁷ A ŋutu ti Yisaraele jölöni jölö, a ’dure kase i köjinö i lor tomusala lonyit. Nyena a köjinö kase gwe a ko Gibeon, ko Kepi-ra, ko Berot, se ko Kiryat-yarim.

¹⁸ A ŋutu ti Yisaraele tine tatu se, kogwon temejik ti Yisaraele aje milyekin se i karin ti MATAT Ŋun lo Yisaraele. A momoret liŋ rerenyani rerenya ko temejik kase.

¹⁹ Ama a temejik liŋ kulyani ko momoret liŋ adi, Yi aje milyekin se milye i karin ti MATAT Ŋun lo Yisaraele, nyenagon soŋinana a yi tine bulö ’bo ’yu se.

²⁰ Yi de konakin sesona, a kölökiŋdye se jörun, an woran nanyit koŋokin kayaŋ loki, kogwon kulya ti milye logon yi a milyekin se lo.

²¹ A temejik kulyani ko se adi, Ti se gwe jörun; a se gwe a katokok ti kaden ko a ka ’yilak ti pioŋ ti na momoret liŋ, gwoso na kulyari temejik ko lepeŋat nu.

²² A Yosua luŋgi se, a pipije lepeŋat adi, Nyo ta mumulugga yi adi ta gwon pajo parik koyi; ki ’doŋ ta si ’da kayaŋ kiden?

²³ Nyenagon ta a lömö, a kulye kasu ŋupi mo gwe a ’dupi, ko a katokok ti kaden, ko a ka ’yilak ti pioŋ ti kadi na Ŋun lio.

²⁴ A se waddi Yosua adi, Yi a koŋdya sona kogwon yi köliŋönök kulök a taki a gwak adi, MATAT ŋun ilot a sarakiŋdya Mose köliŋönit lonyit i tiŋdu na ta lo jur liŋ ko i tukaŋu na ŋutu liŋ tijur kasu i komor; nyenagon yi a kujönö parik kogwon ru nikao kogwon kulya kasu.

²⁵ Niyena mete, yi kulo gwon konut i könisi; konakiŋdye yi gwoso nagon do a met a na ’but ko a rigwo i konakiŋdya na yi.

²⁶ A nye konakiŋdye se sona, a nye lwökuŋdye se kaŋo i könisi ti ŋutu ti Yisaraele; a se tine tatu lepeŋat.

²⁷ I ŋilu lor a Yosua tiŋdi se i gwon a katokok ti kaden ko a ka ’yilak ti pioŋ ti nu momoret, ko ti pirit ’yuret na rubaŋgajin ti MATAT i nu pirit na wulun nye nu tojo ko lo lor.