Yosua 6 - Bibilia Buk na Ŋun nagon koti luŋu a

Doro na Yeriko

¹ A Yeriko iŋge titikö go i lukata ko kaŋo nanyit kogwon kulya ti ŋutu ti Yisaraele, a lele ŋuto gwe ’bayin lo tu kaŋo, kode lo lupö lukata.

² A MATAT kulyani ko Yosua adi, Mete, nan aje pakiŋdya Yeriko konut i könin, ko mor lonyit se ko walan kanyit iŋgo.

³ A do se ko ŋutu kamörök liŋ wöröjine i lorga na nu köji daŋ geleŋ. A ta mo koŋdi sona ko perok buker.

⁴ A koanejin mo ’depaddi toriot buryo logon a oŋgwora ti lopijoki i ŋerot na nu saŋduk; a i lor toburyo lonyit, a ta mo lorgi nu köji daŋin buryo, a koanejin mo kuddye kilo toriot.

⁵ A mo gwe sona na kuddye se kutet najo ko oŋgwora ti lopijoki, a na yiŋge ta woŋon na toriot nu, a ŋutu liŋ sirajine ki parik; a mariŋ na ŋina köji mo ’dorone kak kanyit i pirit, a ŋutu liŋ mo laŋaddi lukataŋadi juŋ a komor nanyit.

⁶ A Yosua ŋuro lo Nun lupundye koanejin kulo, a kulyani ko se adi, ’Dumuŋdye ta saŋduk na tomoret, ko ti koanejin buryo ’depaddi toriot buryo logon a oŋgwora ti lopijoki ko saŋduk na MATAT i komor.

⁷ A nye kulyani ko ŋutu kulo adi, Iti ta ŋerot, ko lorgi ta köji, ko ti ŋutu lo jupu tito möriesi kulo iti ŋerot ko saŋduk na MATAT i komor.

⁸ A ko gwe sona gwoso na takiŋdye Yosua kulu ŋutu nu, a koanejin buryo ka ’depak ti toriot buryo logon a oŋgwora ti lopijoki ko MATAT i komor kulu iti ŋerot, a kuddye kulu toriot, a saŋduk na tomoret na MATAT kipuŋdye se.

⁹ A ŋutu lo jupu tito möriesi kulo iti ko koanejin kakutak ti toriot ŋerot, a se logon tiju mukök kulu kepoddi nu saŋduk, a toriot kutajine kutaji i tu nase.

¹⁰ A Yosua saŋi ŋutu kulo adi, An ta ko sira ta, ko ti gworolo kasu gwe ti yiŋa, ti lele kulyaet gwe ti lupuŋdyö kaŋo kasu i kutusen, tojo ko ŋilu lor logon nan mo takiŋdye ta i sira lu; nyena a ta mo sirani sira.

¹¹ Nyena a nye tiŋdi saŋduk na MATAT i lorga na köji, a lorgi lepeŋ daŋ geleŋ; a se lupuŋdye i mera, a dotoni i mera.

¹² A Yosua ŋine ŋien ko ’bure kobu­but, a koanejin ’dumuŋdye saŋduk na MATAT.

¹³ A koanejin buryo ka ’depak ti toriot buryo logon a oŋgwora ti lopijoki ko saŋduk na MATAT i komor kulu, iti tu kutaddu toriot gwo; a ŋutu lo jupu tito möriesi kulo iti kase ŋerot, a se lo tiju mukök kulo kepoddi saŋduk na MATAT, a toriot kutajine kutaji i tu nase.

¹⁴ A i lor tomurek lonyit a se lorgi köji daŋ geleŋ, a yitöni i mera; a se koŋdi sona ko perok buker.

¹⁵ A ko gwe sona i lor toburyo lonyit, a se ŋine ŋien ’beron i baŋun na kak, a lorgi köji daŋin buryo gwoso na kulu perok nu; tuŋ i ŋilu lor geleŋ a se lorgi köji daŋin buryo.

¹⁶ A ko gwe sona i daŋ toburyo, na kuddye koanejin toriot nu, a Yosua takiŋdye ŋutu kulo adi, Sirani ta sira; kogwon MATAT aje tin ta na köji.

¹⁷ A na köji se koŋo liŋ na gwon lukata kune de gelakine MATAT a na rurwan; tuŋ ake Raba geleŋ kalupe na de na kölöki jörun, se ko ŋutu liŋ lo gwon ko lepeŋ kadi kulu, kogwon nye aje ’de ’ya luyökie lo sonyi kulo.

¹⁸ Ama ta kulo teŋgi ta ’börik i nagon a gelwe a na rurwan, anyen ko ta aje gelun lepeŋat, an ta ko ’dumun nene nagon a gelwe; i tiŋdu na mera na Yisaraele a na rurwan, i sasaŋdu na lepeŋ.

¹⁹ Ama a pödö liŋ se ko dakap, ko tito nagon a ti mölwö ko ti witi kana kine a nake na rurwan ti MATAT; a se mo ’delani i pirit nagon ’delarikin tito ti MATAT na.

²⁰ Nyena a ŋutu kulo sirani sira, a toriot kutani kuta; a ko gwe sona na yiŋge ŋutu toriot nu, a ŋutu sirajine ki parik, a mariŋ ’dorone kak kanyit i pirit, nyena a ŋutu laŋaddi i lukata na köji, ŋutu liŋ geleŋ geleŋ ŋadi juŋ a komor nanyit, a se morgi nu köji.

²¹ A se tukaŋi ko baŋdujin asutoŋ liŋ na gwon i nu köji kunu, kweja adi ŋutu lyan ko nawate, ko ŋwajik, ko muduŋin, ko dwönin, ko yidin, se ko kaineki.

²² A Yosua kulyani ko ŋutu murek kawirak kulu adi, Lupöni ta ko kalupe nu kadi, ko joŋdi ta nuŋuto kaŋo se ko ŋutu liŋ lo gwon ko lepeŋ kulu, gwoso nagon ta aje milyekiŋdye lepeŋ nu.

²³ A kulu teton kawirak lupöni lukata a joŋdi Raba kaŋo ko monye, ko ŋote, ko luŋasirik, se ko ŋutu liŋ lo gwon ko lepeŋ kulu; a se joŋdi karu kanyit kaŋo liŋ köti, a se tiŋdi lepeŋat i kaŋo na mera na ŋutu ti Yisaraele.

²⁴ a se ’yuŋe nu köji koŋo liŋ na gwon lukata kunu ko kimaŋ; ama a se tiŋdi pödö ko dakap, ko tito nagon a ti mölwö se ko ti witi kune i kadi nagon ’delarikin tito ti kadi na MATAT na.

²⁵ Ama a Yosua lwökuŋdye Raba kalupe na jörun ko mede na monye liŋ, se ko ŋutu liŋ lo gwon ko lepeŋ kulu; a nye si ’dani ko Yisaraele kiden tojo ko lo lor, kogwon nye a ’de ’ya kulu luyökie logon Yosua a sonyoro i wiŋa na Yeriko kulu.

²⁶ A Yosua sarakiŋdye se ko milye adi, Lu ŋuto lölömö ko MATAT i komor logon ŋi ki i ’duggö na ŋina köji Yeriko. Na togwi ’dikiŋdye nye gwo ’diesi ti na köji nu, a ŋuro lonyit kayu mo twane twan, a na togwi ’dikiŋdye nye kötumitön ti nu köji nu, a nyakwari lonyit mo twane twan.

²⁷ Nyenagon a MATAT gwe ko Yosua; a nye kune kuön i lu jur ’bukuluŋ.