Yosua 5 - Bibilia Buk na Ŋun nagon koti luŋu a

Kulya ti tawero ko laŋaddu i nu pele Giligala yu

¹ A gwe sona i diŋit nagon moran liŋti Amori, logon gwon i nu pele na Yardene i swöt lo tokotyaŋ, se ko moran liŋti Kanana logon i kijit na tör na ’balaŋ nu ko yiŋge adi, MATAT aje towere ’yu kare Yardene ko ŋutu ti Yisaraele i komor tojo ko se aje laŋgu i nu pele, a töilyet kase lwo ’yi lwöyu, a ködu dwölön kase iŋge ’doŋga mu ’diŋ, kogwon kulya ti ŋutu ti Yisaraele.

² A i ŋinu diŋit a MATAT kulyani ko Yosua adi, Tetenakiŋdye mugun ŋurupö a walya, ko taweŋi ŋutu ti Yisaraele köti daŋ tomurek.

³ Nyena a Yosua tetenakiŋdye mugun ŋurupö a walya, a taweŋi ŋutu ti Yisaraele Gibeataralot yu.

⁴ Ŋina a kwe nagon Yosua aje taweŋi se; kweja adi ŋutu lyan liŋ logon a yuun kaŋo Ejipeto yu, ŋutu liŋ logon a kamörök kulu aje twatwa i yöbu na sese i kiko, i mukök nagon se aje yuun kalor Ejipeto nu.

⁵ Kogwon ŋutu liŋ logon a yuun kaŋo kulu a tawero; ama ŋutu liŋ logon a yuŋwe i yöbu i kiko, na yuuŋdye se kalor i Ejipeto nu a ko tawero.

⁶ Kogwon ŋutu ti Yisaraele a wörö i yöbu ko kiŋajin merya iŋwan tojo ko jur liŋ a tutuŋö, kweja adi kamörök logon a yuun kalor i Ejipeto kulu. Lepeŋat a tiki i wörö sona kogwon se a ko yio gworo lo MATAT. Nyena MATAT a milyekin se adi nye ti tiŋdu se i meddya na lu jur logon nye MATAT aje milyekin komonye kase adi nye mo titin yi lu, ŋilo a jur logon ko le ko siwatat ’do ’dokon kata.

⁷ A nye tiŋdi ŋwajik kase i ruddya na piritön kase, kilo a se logon Yosua lo taweŋu kulo. Lepeŋat a ko tawero, kogwon ŋutu a ko taweŋu se i kiko.

⁸ A ko gwe sona nagon se aje tutuŋgö taweŋu jur liŋ nu, a se mönuŋdye kase i piriton i mera, tojo ko tolika nase.

⁹ A MATAT kulyani ko Yosua adi, I lo lor nan aje gwuluŋöddu ’do ’döyö nasu kalor nagon ’döyörikin ta Ejipeto yu. Nyenagon a karin ti nu pirit luŋuni a Giligala tojo ko lo lor.

¹⁰ A na mönuŋdye ŋutu ti Yisaraele Giligala nu, a se koŋdi Pasaka i perok puök wot iŋwan ti yapa i sömukö i piritön na ’dayatak ti Yeriko.

¹¹ A i lor gwak lo kebbu Pasaka lu, a se nyesi kinyojin lo kuru i lu jur, kweja adi ambatajin nagon ’bak kape se ko ’bolot lo kekelo.

¹² A mana iŋge gwo ’dan i lu ko ’bure na nyesi se kinyojin lo kuru i lu jur nu; a ŋutu ti Yisaraele gwe ’bak mana köti asut, ama a se nyesi ludweki ti lu jur lo Kanana i ŋilu kiŋa.

Yosua koŋuto logon a ’dutuŋdyö wale kaŋo

¹³ A gwe sona nagon Yosua gwe nyona ko Yeriko nu, a nye boŋgi boŋga, a meddi lele ŋuto gwo ’dan kanyit i komor, logon ko wale kanyit i könin a ’dutwe kalor i soko ’bo. A Yosua iti ko lepeŋ yu, a pipije lepeŋ adi, Do a likaŋ kode a lo merok kaŋ?

¹⁴ A nye waddi adi, A a; ama nan a po ni soŋinana a duma lo kamörök ti MATAT. A Yosua ’dorone kak rupu, a twöji twöju, a pipije lepeŋ adi, Ŋo a nyo nagon duma liŋ ’dek kulyari ko köli­pönit lonyit?

¹⁵ A duma lo kamörök ti MATAT kulyani ko Yosua adi, Rusuŋdye kamuka kulök kaijo konut i mokosi kogwon pirit na gwo ’di ’e do ŋina a nake na rurwan. A Yosua koŋdi sona.