Yosua 3 - Bibilia Buk na Ŋun nagon koti luŋu a

Ŋutu ti Yisaraele a laŋgu Yardene

¹ A Yosua Ŋine ki ko ’bure kobubut, aŋiörö kaŋo Sitim yu se ko ŋutu ti Yisaraele liŋ, a se ’duröki Yardene, a mönuŋdye nyu a kokwe na laŋgu nase.

² A ko gwe sona i mukök na perok musala a temejik wöröjine i kiden na mera,

³ a saŋi ŋutu kulo adi, Na meddi ta koanejin Lewijin i ’dokoddu na saŋduk na tomoret na MATAT ŋun losu nu, a ta mo ŋiörö kalor kasu i piritön a kepoddi nu saŋduk.

⁴ Kölumbö a kwake mo kölökine i kiden nasu ko lepeŋ, gwoso i temet na lokiliŋan alipan murek; an ta mijun nyona ko lepeŋ, anyen ta deden kiko logon ta ködyö titiri ŋilo; kogwon ta a ko nyuŋ göröddu i ŋilo kiko.

⁵ A Yosua kulyani ko kulo ŋutu adi, Toke ’yi ta ’börik; kogwon ko ’bure MATAT mo koŋdya kulya sörösi kasu kiden.

⁶ A Yosua kulyani ko kulu koanejin adi, ’Biluddi ta saŋduk na tomoret ki, ko laŋaddi ta ko kulu ŋutu ŋerot. A se ’biluddi saŋduk na tomoret ki, a iti tu ko kulu ŋutu ŋerot.

⁷ A MATAT kulyani ko Yosua adi, I lo lor nan de suluja töduma ’yu do ko ŋutu liŋti Yisaraele i metet, anyen se böŋö deden adi gwoso na gwoŋdi nan ko Mose köju nu, a nan de gwe ko do koti.

⁸ A do de saŋi koanejin logon ’doggu saŋduk na tomoret kilo adi, Na ’durökiŋdye ta i kijit na kare Yardene nu, a ta de gwo ’de gwo ’dan i Yardene kata nyu.

⁹ A Yosua kulyani ko ŋutu ti Yisaraele adi, Po ta ni i yiŋga na kulyaesi ti MATAT Ŋun losu.

¹⁰ A Yosua waddi adi, I kine kulya ta de deden adi Ŋun lo gwon jörun lo gwon kasu kiden, a nye tine jaran i riköddu na ŋutu ti Kanana kalor kasu i komor, ko ŋutu ti Kiti, ko ti Kiwi, ko ti Periji, ko ti Giriŋasi, ko ti Amori, se ko ti Yebusi.

¹¹ Mete ta, saŋduk na tomoret na MATAT lo kak liŋ mo laŋaddu kasu ŋerot i Yardene lukata.

¹² Nyenagon soŋinana ’dumuŋdye ta ŋutu puök wot murek i kötumitön ti Yisaraele, ŋuto geleŋ i kötumit geleŋ.

¹³ A de gwe sona na mönuŋdye ’dapan ti mok ti koanejin logon ’dokoddu saŋduk na MATAT, MATAT lo kak liŋ i kare Yardene nu, a piŋo ti Yardene de gwo ’de gwo ’dan i ’dokon, a pioŋ na poŋdya i swöt lo loki kune gwi ’diki a ’dome geleŋ.

¹⁴ A ko gwe sona na yuöddi ŋutu kalor kase i kemialan anyen laŋaddu i nu pele na Yardene nu, a koanejin lo ’doggu saŋduk na tomoret kulo iti ŋerot ko ŋutu i komor;

¹⁵ a na ’durökiŋdye ka ’dokök ti saŋduk Yardene nu, a mokosi ti koanejin ka ’dokök ti saŋduk kulo iŋge juru töki i kijit na kare, (kogwon Yardene a baranyaddu kalor i diŋit na ’butun lio)

¹⁶ a piŋo na poŋdya i swöt lo ki kune gwo ’de gwo ’dan a poŋdi a ’dome pajo Adama yu, nu köji na diŋö ko Saretan, a se nagon ’dukun kak tojo i tör na Araba nagon a tör nagon piŋo kanyit a ’balaŋ parik kune a ’duŋöji kalor liŋ; a kulu ŋutu laŋaddi i swöt lo metaddu Yeriko.

¹⁷ A koanejin ka ’dokök ti saŋduk na tomoret na MATAT kulo gwi ’diki go i kak nateyon I kiden na Yardene, a Yisaraele liŋ laŋgi i kak nateyon, tojo ko jur liŋ a tutuŋgö laŋaddu i nu pele na Yardene.