Yosua 22 - Bibilia Buk na Ŋun nagon koti luŋu a

Pirit ’yuret na rubaŋgajin na gwon nyona ko Yardene

¹ A Yosua luŋgi ŋutu ti Rubena, ko ti Gada se ko ti lele swöt lo kötumit na Manase,

² a kulyani ko se adi, Ta a ’deŋ ŋo liŋ nagon Mose köliŋönit lo MATAT aje saŋi ta kune, a ta köti i ŋge yi ŋga gworo liŋ i ŋo liŋ na saŋi nan ta kune;

³ a ta gwe a ko kölökin lu pösurök i kilu perok jore tojo ko lo lor, ama ta aje ’deŋ saret lo MATAT ŋun losu ’bura.

⁴ So pinana MATAT Ŋun losu aje tiŋdu lu pösurök i yukan, gwoso na kulyari nye ko se nu; nyenagon so pinana yitöni ta ko iti ta kasu i midijik i jur losu lomore, logon Mose köliŋönit lo MATAT aje tin ta i nu pele na Yardene lu.

⁵ Ama meddi ta ’bura i koŋdya na jujuwet se ko saret, logon Mose köliŋönit lo MATAT aje saŋi ta kilo, i nyaŋu na MATAT ŋun losu, ko i wörö kanyit i kikolin liŋ, ko i ’debba na saresi kanyit, ko i ’depakiŋdya go ko lepeŋ, ko i kitakiŋdya na lepeŋ ko töilyet kasu liŋ se ko ködu dwölön kasu liŋ.

⁶ Nyena a Yosua ’boroji se, a soŋdi se; a se iti kase i midijik.

⁷ Ama a Mose iŋge tiŋdu lele swöt lo kötumit na Manase lomore Basan yu; ama a Yosua tiŋdi lele swöt lo lomore i kiden na luŋasirik kase i nu pele na Yardene i swöt lo tokotyaŋ. Köti na soŋdi Yosua se kase i midijik nu, a nye ’boroji se,

⁸ a kulyani ko se adi, Yitöni ta kasu i midijik ko tukwörien a duma, se ko toro ’bo jore parik, ko pödö, ko dakap, ko mölwö, ko witi, se ko boŋ-gwat jore; koŋi ta ko luŋösurök ŋo nagon ta a ryakun i merok kasu kune.

⁹ A ŋutu ti Rubena ko ŋutu ti Gada se ko swöt lo kötumit na Manase yitöni bot, a koraddi ’börik kaŋo i ŋutu ti Yisaraele Silo yu, na gwon i jur lo Kanana, anyen tu i jur lo Gilada. Ŋilo a jur lo mok se a lomore lose i saret lo MATAT ko Mose i kutuk lu.

¹⁰ A se ko ’dure i jur lo gwon i k ŋit na Yardene logon nyuŋ a jur lo Kanana lu, a ŋutu ti Rubena ko ŋutu ti Gada, se ko swöt lo kötumit na Manase dibbe pirit ’yuret na rubaŋgajin nagon a duma nyona ko Yardene, anyen ŋutu liŋ memet.

¹¹ A ŋutu ti Yisaraele ko yiŋge adi, Mete ta, ŋutu ti Rubena ko ŋutu ti Gada se ko swöt lo kötumit na Manase aje dibba pirit ’yuret na rubaŋgajin nagon diraddu i jur lo Kanana nyona ko Yardene, i na pele na kare nagon a na ŋutu ti Yisaraele na.

¹² A ŋutu ti Yisaraele ko yiŋge kine kulya, a momoret ’bukuluŋ na ŋutu ti Yisaraele pepenu-ŋdye Silo, anyen tu i mörö ko lepeŋat.

¹³ A ŋutu ti Yisaraele soŋdi Pinasa ŋuro lo koane Elejara i ŋutu ti Rubena ko ti Gada, se ko ti swöt lo kötumit na Manase i jur lo Gilada yu.

¹⁴ A kimak puök gwe ko Pinasa i pirit na geleŋ, kweja adi matat geleŋ temba i midijik ti merenyejin ti kötumitön geleŋ geleŋ ti Yisaraele; a se geleŋ geleŋ gwe a kusik ti midijik ti merenyejin i kiden na ’dupesi ti Yisaraele.

¹⁵ A se ’duröki i ŋutu ti Rubena ko i ŋutu ti Gada, se ko i swöt lo kotumit na Manase i jur lo Gilada yu, a kulyani ko se adi,

¹⁶ Momoret ’bukuluŋ na MATAT a kulya sona adi. Na toron a nyo nagon ta a konakin Ŋun lo Yisaraele na i löpuköddu kaŋo i lo lor i keŋoddu na MATAT, i dipaki-ŋdya na ’börik pirit ’yuret na rubaŋgajin i lo lor, anyen ta renya MATAT na?

¹⁷ Toron na kona Peor nu a na ’dit kayaŋ le? Yi a ko nyuŋ toke ’ya ’börik kata tojo ko lo lor, ma ’di nagon twanti iŋgo a ŋokin i momoret na MATAT.

¹⁸ Ŋina ŋo a na ’dit anyen ta ŋona löpuköddu kaŋo i lo lor i keŋoddu na MATAT le? A mo gwe sona adi, I lo lor ko ta a renya MATAT, a kotumalu nye mo wore woran ko momoret na Yisaraele ’bukuluŋ.

¹⁹ Ama ko jur losu lomore gwon a lut, nyena a ti ta lwöpuŋdye i jur lomore lo MATAT, logon kemia na MATAT si ’da kata lo, ko ’debbi ta lomoriot kasu kayaŋ kiden; ama an ta ko renya ta MATAT, köti an ta ko tiŋdu ta yi i renya na lepeŋ i dibba na pirit ’yuret na rubaŋgajin lwölwöŋ ’yuret na rubaŋgajin ti MATAT Ŋun likaŋ.

²⁰ A kana ŋuro lo Jerak köju a ko ’beleŋgu saret le i ŋo nagon a gelwe a nake na rurwan kunu, a woran na MATAT iŋge ’dukin i momoret liŋ na Yisaraele? Lu ŋuto a ko twan geleŋ i toron nanyit.

²¹ Nyena a ŋutu ti Rubena ko ŋutu ti Gada se ko ti swöt lo kötumit na Manase kulo waddi kusik ti kötumitön ti ŋutu ti Yisaraele adi,

²² MATAT ŋun lo totoŋun punyen liŋ! Iŋkoi MATAT ŋun lo totoŋun punyen liŋ! lepeŋ deden, ko köti ta ŋutu liŋ ti Yisaraele dene ta den ko ’börik ko ködyö yi a renya kode a toroŋdya MATAT, an ta ko pitökin ta yi i lo lor.

²³ Ti MATAT ko mugun nanyit ropakiŋdye kayaŋ i kusik ko ködyö yi a dipakiŋdya ’börik pirit ’yuret na rubaŋgajin anyen löpuköddu kaŋo i keŋoddu na MATAT; kode anyen wukiŋdya rubaŋga lo ’yu ’yura ’buluŋ kata kode ’doket na ’bolot, kode anyen wukiŋdya rubaŋgajin ti taliŋ kata.

²⁴ Ama tuŋ yi a koŋdya sona kogwon yi kukujönö adi i diŋit na ŋoŋo an ŋwajik kasu ködyö ko pija ŋwajik kaŋ adi, Kulya kasu a nyo ko MATAT Ŋun lo Yisaraele?

²⁵ MATAT aje tiŋdu Yardene a lokökorit kayaŋ kiden ko ta. Ta ŋutu ti Rubena ko ta ŋutu ti Gada, kulya kasu ’bayin ko MATAT. Nyena a ŋwajik kasu mo tiŋdi ŋwajik kaŋ i kö ’yu kugga na MATAT.

²⁶ Nyenagon yi a kulya adi. Ti yi so pinana dibbe pirit ’yuret na rubaŋgajin, ti gwon a na rubaŋgajin lo ’yu ’yura ’bulu ŋ, kode a na rubaŋgajin lo ’du ’du ŋö;

²⁷ ama anyen gwon a tokoret i kiden nikaŋ ko ta, ko köti i kiden na nyakwariat kaŋ kayaŋ i mukök, anyen yi bo ŋö kitakiŋdya MATAT kanyit i komor ko ruba ŋgajin kaŋ lo ’yu ’yura ’buluŋ, ko ruba ŋgajin kaŋ lo ’du ’du ŋö se ko ruba ŋgajin kaŋ ti taliŋ; an ŋwajik kasu molu ko jambu ko ŋwajik ka ŋ adi, Ta ’bak koret ko MATAT,

²⁸ Nyenagon a yi yeyeji adi, Ko ködyö mo a jamaki yi kode jamaki nyakwariat ka ŋ sona i di ŋit na ŋoŋo nu, a yi kodyö kulyani adi, Mete ta miret na pirit ’yuret na ruba ŋgajin ti MATAT, na teten kobaba na, ti gwon a na ruba ŋgajin lo ’yu ’yura ’buluŋ, kode a na rubaŋgajin lo ’du ’du ŋö; ama anyen gwon a tokoret i kiden nika ŋ ko ta.

²⁹ Ti gwe ti gwon sona adi yi ködyö renya MATAT, anyen löpuköddu kaŋo i lo lor i keŋoddu na MATAT, anyen dibba pirit na rubaŋgajin lo ’yu ’yura ’buluŋ, kode na ’dokesi ti ’bolot, kode na ruba ŋgajin, mora ko nu pirit ’yuret na ruba ŋgajin ti MATAT Ŋun likaŋ na gwon i komor na kemia nanyit nu.

³⁰ Nyena a koane Pinasa, se ko kimak ti momoret logon a kusik ti kötumitön ti Yisaraele lo gwon ko nye i pirit na geleŋ kulu, ko yiŋge kulyaesi lo jam ŋutu ti Rubena, ko ŋutu ti Gada se ko ŋutu ti Manase kulu nu, a se i ŋge lyö ŋön parik.

³¹ A Pinasa ŋuro lo koane Elejara kulyani ko ŋutu ti Rubena ko ŋutu ti Gada, se ko ti Manase kulo adi, I lo lor yi a den adi MATAT gwon kayaŋ kiden, kogwon ta a ko konakin MATAT ŋina toron: nyena so pinana ta aje lwöku-ŋdyö ŋutu ti Yisaraele kaŋo ko MATAT i könin.

³² A Pinasa ŋuro lo koane Elejara, se ko kimak kö ’yi ŋutu ti Rubena ko ŋutu ti Gada i jur lo Gilada a yitöni i jur lo Kanana ko ŋutu ti Yisaraele yu, a nyönyökökiŋdye se lo ŋe.

³³ A kune kulya tulyöŋgi ŋutu ti Yisaraele; a ŋutu ti Yisaraele pupurje ŋun, a tine jambu kulya ti tu nase i mörö ko lepeŋat, i köŋu na lu jur logon ŋutu ti Rubena se ko ŋutu ti Gada si ’da kata lu.

³⁴ a ŋutu ti Rubena se ko ŋutu ti Gada gwiŋe nu pirit ’yuret na rubaŋgajin a Tokoret; kogwon se a kulya adi, Ŋina a tokoret kayaŋ kiden adi MATAT logon a ŋun.