Yosua 21 - Bibilia Buk na Ŋun nagon koti luŋu a

Köjinö ti Lewijin

¹ Nyena a kusik ti midijik ti merenyejin ti Lewijin ŋoki i komor na koane Elejara ko Yosua ŋuro lo Nun, ko i komor na kusik ti midijik ti merenyejin ti kötumitön ti ŋutu ti Yisaraele.

² A lepeŋat kulyani ko se Silo yu i jur lo Kanana adi, MATAT aje saŋu ko Mose i kutuk adi yi ködyö titiki köjinö nagon yi si ’da kata, se ko piriton yukisi nagon yi yuggi toro ’bo kaŋ.

³ A ŋutu ti Yisaraele korakiŋdye Lewijin kine köjinö se ko piriton yukisi ti toro ’bo kase a lomoriot kase, gwoso na saŋi MATAT nu.

⁴ A gura na ’duki a na midijik ti Kowat. Nyena a Lewijin logon a nyakwariat ti Arona kulo wuji i guba na guralan köjinö puök wot musala i kiden na kötumit na Yuda, ko na kötumit na Simeona, se ko i kötumit na Benyamina.

⁵ A kulye ŋutu ti Kowat wuji i guba na guralan köjinö puök i kiden na midijik ti kötumit na Epuraima, ko na kötumit na Dan, ko na swöt lo kötumit na Manase.

⁶ A ŋutu ti Gereson wuji i guba na guralan köjinö puök wot musala i kiden na midijik ti kötumit na Yisakar, ko na kötumit na Aser, ko na kötumit na Napatali, se ko na swöt lo kötumit na Manase lo gwon Basan yu kulu.

⁷ A ŋutu ti Merari wuji köjinö puök wot murek, gwoso i midijik kase i kiden na kötumit na Rubena, ko i kiden na kötumit na Gada, se ko na kötumit na Jebulun.

⁸ A ŋutu ti Yisaraele kökorakiŋdye Lewijin kine köjinö se ko piritön yukisi ti toro ’bo kase i guba na guralan, gwoso na saŋi MATAT ko Mose i kutuk nu.

⁹ Lepeŋat ’dumuŋdya köjinö nagon a ’dinya ko karin kine i kiden na kötumit na ŋutu ti Yuda, ko i kiden na kötumit na ŋutu ti Simeona:

¹⁰ a se gwe a ti nyakwariat ti Arona, logon a ti midijik ti Kowat, logon a Lewijin; kogwon gura na kokwe a ’dukin a nase.

¹¹ A se tiŋdi lepeŋat Kiryat-arba na gwon i jur lo Yuda logon a merya, se ko piritön kanyit na lolorga lepeŋ nagon a yukisi ti toro ’bo. Kiryat-arba a Keberon, köti Arba a monye Anak.

¹² Ama a meleseno ti nu köji se ko turön kanyit tikine Kaleba ŋuro lo Yepune a kanyit.

¹³ A se tiŋdi nyakwariat ti koane Arona Keberon, nagon a köji rupit na katatuak ko piritön kanyit yukisi ti toro ’bo, ko Libina ko piritön kanyit yukisi,

¹⁴ ko Yatir ko piritön kanyit yukisi, ko Esetemoa ko piritön kanyit yukisi;

¹⁵ ko Kölön ko piritön kanyit yukisi, ko Debir ko piritön kanyit yukisi;

¹⁶ ko Ain ko piritön kanyit yukisi, ko Yuta ko piritön kanyit yukisi, se ko Bete-semese ko piritön kanyit yukisi; kweja adi kine a köjinö buŋwan i kiden na kine kötumitön murek.

¹⁷ A i kiden na kötumit na Benyamina a se tiŋdi Gibeon ko piritön kanyit yukisi, ko Geba ko piritön kanyit yukisi;

¹⁸ ko Anatot ko piritön kanyit yukisi, ko Alemon se ko piritön kanyit yukisi; kweja adi kine a köjinö iŋwan.

¹⁹ A köjinö ti nyakwariat ti Arona logon a koanejin kulo gwe a köjinö puök wot musala se ko piritön kase yukisi.

²⁰ A kunie midijik ti ŋutu ti Kowat logon köti a Lewijin kulo korakine köjinö kase i kiden na kötumit na Epuraima i guba na guralan.

²¹ A se tiŋdi lepeŋat Sekeme ko piritön kanyit yukisi i jur lo Epuraima logon a merya, nagon a köji rupit na katatuak, ko Gejer ko piritön kanyit yukisi;

²² ko Kibesayim ko piritön kanyit yukisi, ko Bete-koron ko piritön kanyiŋ yukisi; kweja adi kine a köjinö iŋwan.

²³ a i kiden na kötumit na Dan a se tiŋdi Eleteke ko piritön kanyit yukisi, ko Gibeton ko piritön kanyit yukisi,

²⁴ ko Ayalon ko piritön kanyit yukisi, ko Gata-rimon se ko piritön kanyit yukisi; kweja adi kine a köjinö iŋwan.

²⁵ a i kiden na swöt lo kötumit na Manase a se tiŋdi Tanak ko piritön kanyit yukisi, ko Gata-rimon se ko piritön kanyit yukisi; kweja adi kine a köjinö murek.

²⁶ A köjinö liŋ ti midijik ti kulye ŋutu ti Kowat kulo gwe a puök se ko piritön kase yukisi.

²⁷ A midijik ti ŋutu ti Gereson logon köti a Lewijin kulo korakine köjinö murek i kiden na swöt lo kötumit na Manase, kweja adi Golan na gwon Basan yu ko piritön kanyit yukisi, nagon a köji rupit na katatuak, ko Be-esetera se ko piritön kanyit yukisi.

²⁸ A se korakine i kiden na kötumit na Yisakar Kisiyon ko piritön kanyit yukisi, ko Daberat ko piritön kanyit yukisi;

²⁹ ko Yarmut ko piritön kanyit yukisi, ko Ene-ganim se ko piritön kanyit yukisi; kweja adi kine a köjinö iŋwan.

³⁰ A se korakine i kiden na kötumit na Aser Misala ko piritön kanyit yukisi, ko Abidon ko piritön kanyit yukisi;

³¹ ko Kelekat ko piritön kanyit yukisi, ko Rekoba se ko piritön kanyit yukisi; kweja adi kine a köjinö iŋwan.

³² A i kiden na kötumit na Napatali a se korakine Kedese na Galilaya se ko piriton kanyit yukisi, nagon a köji rupit na katatuak, ko Kamot-dor ko piritön kanyit yukisi, ko Kartan se ko piritön kanyit yukisi; kweja adi kine köjinö musala.

³³ A köjinö liŋ ti ŋutu ti Gereson gwoso i midijik kase gwe a köjinö puök wot musala se ko piritön kanyit yukisi.

³⁴ A midijik ti ŋutu ti Merari logon köti a Lewijin kulo, korakine Yokeneam ko piritön kanyit yukisi ti toro ’bo i kiden na kötumit na Jebulun, ko Karta ko piritön kanyit yukisi,

³⁵ ko Dimena ko piritön kanyit yukisi, ko Nagala se ko piritön kanyit yukisi; kweja adi kine a köjinö iŋwan.

³⁶ a i kiden na kötumit na Rubena a se korakine Beser ko piritön kanyit yukisi, ko Yakasa ko piritön kanyit yukisi,

³⁷ ko Kedemot ko piritön kanyit yukisi, ko Mepata se ko piritön kanyit yukisi; kweja adi kine a köjinö iŋwan.

³⁸ A i kiden na kötumit na Gada a se korakine Ramot na gwon Gilada ko piritön kanyit yukisi, nagon a köji rupit na katatuak, ko Makanayim ko piritön kanyit yukisi,

³⁹ ko Kesebon ko piritön kanyit yukisi, ko Yajer se ko piritön kanyit yukisi; kweja adi kine a köjinö iŋwan liŋ.

⁴⁰ a köjinö ti pitönö ti midijik ti ŋutu ti Merari liŋ geleŋ geleŋ logon a Lewijin kulo gwe a köjinö puök wot murek na koraki se i guba na guralan.

⁴¹ A köjinö liŋ ti Lewijin i kiden na lomoriot ti ŋutu ti Yisaraele gwe a köjinö merya iŋwan wot budök se ko piritön kase yukisi ti toro ’bo.

⁴² a kine köjinö liŋ gwe ko piritön kase yukisi i lolorga na se; a kine köjinö liŋ gwe sona.

ŋutu ti Yisaraele a morga jur

⁴³ Nyena a MATAT tiŋdi ŋutu ti Yisaraele jur liŋ logon nye aje milyekin tiŋdu merenyejin kase lu; a lepeŋat morgi nye a lose, a si ’dani nyu.

⁴⁴ A MATAT tiŋdi lepeŋat yukan i swötön kase liŋ, gwoso i ŋo liŋ na milyekin nye tiŋdu merenyejin kase kunu; a lele ŋuto gwe ’bayin lo merok kase liŋ logon te ’ya lepeŋat; kogwon MATAT aje pakin merok kase liŋ kase i könisi.

⁴⁵ A nene ŋo gwe ti jaran kona i ŋo na ’but liŋ na jamakin MATAT kötumit na Yisaraele kune; ama ŋo liŋ a kona.