Yosua 2 - Bibilia Buk na Ŋun nagon koti luŋu a

Ŋutu kawirak a sonyo Yeriko

¹ A Yosua ŋuro lo Nun sonyo ddi ŋutu murek kalor a lwön Sitim yu a kawirak kulya adi, Iti ta i wiŋa na lu jur, kegga Yeriko. A se iti tu, a ’duröki ko nene kalupe kadi nagon karin kanyit a Raba, a mönuŋdye nyu.

² A mor lo Yeriko takine adi, Mete, kulye ŋutu ti Yisaraele kilo aje poŋdya ni i tukwaje i wiŋa na lo jur.

³ A mor lo Yeriko sunyukiŋdye Raba kutuk adi, Joŋdi kilo ŋutu kalor logon aje poŋdya konut ŋini kilo, logon a lupö konut kadi kilo; kogwon se a poŋdya i wiŋa na lo jur ’bukuluŋ.

⁴ Ama a nuŋuto joŋgi kulu ŋutu murek, a iŋge ’de ’ya se; a nye kulyani adi, ’Diri kilo ŋutu a poŋdya köyö ni, ama nan ti den ko se poŋdya ya;

⁵ a ko gwe sona nagon diŋit aje temakiŋdya anyen kötumit na köji kikinu nagon kak gwe a mudwe nu, a kulu ŋutu iti kalor; ko kulu tu da a nan tine den; ’demene ta lepeŋat ’de ’de; kogwon ta de wowokun se.

⁶ Ama kölumbö nye aje joŋga se ki tojo i lo ’dek, a ’delakiŋdye se i waro pisite nagon nye a petakin i lowa i lo ’dek loki kunu.

⁷ A kulu ŋutu lo sonyo kulo ’demeji se i kiko lo tu Yardene tojo ko piritön nanye ’delak; a ’de ’de nagon ŋutu lo ’demeja lepeŋat kulu aje tu kalor nu, a lupet iŋge kinu.

⁸ A kokwe nagon kulu ŋutu a ko nyuŋ peron kak nu, aŋinu ŋuto kije ki kase yu i lo ’dek;

⁹ a nye kulyani ko se adi, Nan deden adi MATAT aje tiŋdu ta lo jur, a kujönö nikao na ta aje mok yi, a ŋutu liŋ ti jur reyara kalor kasu i komor.

¹⁰ Kogwon yi aje yiŋ gwoso nagon MATAT aje towere ’yi piŋo ti Tör Nator kalor kasu i komor nu, na yuuŋdye ta kalor i Ejipeto nu, köti yi aje yiŋ ŋo nagon ta a konakin Sikon ko Oga logon a moran murek ti Amori nu, lo gwon i nu pele na Yardene kulu, logon ta aje tukar asut kulu.

¹¹ A yi ko yiŋge sona, a töilyet kaŋ lwö ’yi lwö ’yu, a ködu dwölön ti ŋutu liŋiŋge ’doŋga mu ’diŋ kogwon kulya kasu; kogwon MATAT Ŋun losu nye lepeŋ logon a Ŋun lo ki yu se ko lo kak ni.

¹² Nyenagon boŋo milyekiŋdye ta nan ko MATAT i komor adi gwoso nagon nan a konakiŋdye ta ’bura na, a ta köti mo konakiŋdye kötumit na baba ’bura, ko tiŋdi ta nan kweyet na to ’diri,

¹³ ko lwökuŋdye ta baba se koyaŋgo, ko luŋasirik kwe ko kiasirik kwe koŋo liŋ na gwon a kase kune, ko lwökuŋdye ta ru nikaŋ i twan.

¹⁴ A kulu ŋutu kulyani ko lepeŋ adi, Ti ru nikaŋ togwouŋdye ru nasu i twan. Ko do ti tuggö kulya kao, ’diri ’diri a yi mo konakiŋdye do ’bura ko to ’diri i diŋit na tiŋdi MATAT yi lo jur na.

¹⁵ Nyena a nye dodoruŋdye se kak ko nekenet i kulupit, kogwon kadi nanyit a ’duköki i gorom loki na mariŋ na köji, a nye si ’dani i mariŋ loki.

¹⁶ A nye kulyani ko lepeŋat adi, Iti ta i merya kata, a ŋutu lo ’demeja ta kulo ko ’bunyökin ta; ko ’de ’yi ta ’börik nyu ko perok musala, tojo ko kilo ka ’demeyak aje yitwe; nyena a i mukök nanyit a ta bulöni bulö morga kiko losu.

¹⁷ A kulu ŋutu kulyani ko lepeŋ adi, Yi mo gwon a loke i kulya ti Ŋilo milye ilot logon do aje tomilyeji yi ŋilo.

¹⁸ Mete, koyi mo lupene i lo jur, a do mo torakiŋdye ŋina nekenet nator i kulupit nagon do dodoruŋdye yi kak na; a do momorakiŋdye konut kadi ŋini munyi ko Ŋuti ko luŋösurök se ko ŋutu liŋti mede na munyi.

¹⁹ Ko lele ŋuto a tu kalor i kötumitön ti kadi inot tojo i kiko, ti rima kanyit gwe kanyit i kwe, a yi mo gwe a loke; ama ko könin a ’buluki i lele lo ŋutu lo gwon konut kadi kilo, a rima kanyit mo gwe kayaŋ i kusik.

²⁰ Ama ko do aje tuggö kulya kaŋ, a yi mo gwe a lui i milye ilot logon do aje tomilyeji yi lo.

²¹ A ŋina ŋuto kulyani adi, Ti gwe gwoso kulyaesi kasu. A nye sonyoddi se kalor, a se iti tu; a nye torakiŋdye nekenet nator i kulupit.

²² A se iti tu tojo i merya kata, a mönuŋdye nyu ko perok musala, tojo ŋutu lo ’demeja se kulo aje yitwe; a ka ’demeyak kulo galaddi se i lu kiko liŋ a tine ryö se.

²³ Nyena a kulu ŋutu murek köti kiyuŋdye kak i merya, a laŋaddi laŋaddu, a ’dure ko Yosua Ŋuro lo Nun yu; a nyönyökökiŋdye lepeŋ ŋo liŋna pukökin i se kunu.

²⁴ Asetakiŋdye Yosua adi, ’Diri MATAT aje pakin lu jur liŋ kayan i könisi; köti kulu ŋutu liŋ ti lu jur a reyara kaŋo kayaŋ i komor.