Yosua 18 - Bibilia Buk na Ŋun nagon koti luŋu a

Kökoratu na jur Silo yu

¹ A momoret ’bukuluŋ na ŋutu ti Yisaraele pepenuŋdye Silo, a ’bikikiŋdye kemia torumet nyu; a jur liŋ iŋge tela kase i komor.

² A kötumitön buryo na pituŋdye i kiden na ŋutu ti Yisaraele logon a ko nyuŋ kökoraki lomoriot kase.

³ A Yosua pipijeŋutu ti Yisaraele adi, Diŋit ŋoman nagon ta ’da ’daggi i lupö i morga na lu jur logon MATAT ŋun lo merenyejin kasu aje tin ta lu?

⁴ Wuluŋdye ta ŋutu musala i kötumitön liŋ geleŋ geleŋ, a nan mo soŋdi se, a se moriöröŋiöro i woŋu na lu jur, a wuŋe kulya kanyit gwoso i kak jin lomoriot kase; a se mo yitwene köyö ni.

⁵ A se kökoroji lepeŋ i swötön buryo, kweja adi kötumit na Yuda si ’da i lokökorit lonyit i swot lo loki, a kötumit na Yosepa si ’dani i lokökorit lose i swot lo lobot.

⁶ A ta wuŋe kulya ti jur i swötön buryo, a jakiŋdye nan kulya na wurö kune; a nan mo gumbe guralan a kasu ni ko MATAT ŋun likaŋ i komor.

⁷ Kogwon Lewijin ’bak koret kasu kiden; kogwon tokoaŋan nase ko MATAT i komor gwon a lomore nase; a Gada ko Rubena se ko swöt lo kötumit na Manase iŋge wuju lomoriot kase nagon Mose köliŋönit lo MATAT aje tin se kunu, i nu pele na Yardene i swöt lo ’yure.

⁸ A kulu ŋutu ŋine ŋien, a iti tu; a Yosua saŋi ŋutu logon tu a kawurök ti kulya ti lu jur kulo adi, Wöŋi ta jur, ko wuŋe ta kulya kanyit, ko yitwene ta köti köyö ni, a nan mo gumbe guralan a kasu ni Silo ko MATAT i komor.

⁹ A kulu ŋutu wöŋi lu jur, a wuŋe kulya kanyit i buk a köjinö köjinö i swötön buryo, a kirut se ’duröki ko Yosua yu i mera na gwon Silo nu.

¹⁰ A Yosua gumbe guralan a kase Silo yu ko MATAT i komor; a Yosua kökorakiŋdye jur i ŋutu ti Yisaraele ŋadi geleŋ ko koret nanyit.

Kak na koraki ŋutu ti Benyamina

¹¹ A gura na kötumit na ŋutu ti Benyamina ’duki a nase, gwoso i midijik kase, a kak nagon a koraki se na gwe i kiden na kak na ŋutu ti Yuda ko na ŋutu ti Yosepa.

¹² A lokökorit lose i swöt lo lobot suluje Yardene; a lokökorit iti ŋerot tojo ko goŋet lo Yeriko i swöt lo lobot, a lwoŋöddi jur logon a merya i swot lo tokotyaŋ; a ’dutökiŋdye i yöbu na Bet-awen.

¹³ A lokökorit lwöŋöddi ŋerot nyu tojo ko Luja, i goŋet lo Luja (ŋina a Betele), i swöt lo loki; a lokökorit dudulara kak tojo ko Atarot-adar, i mere lo gwon i swot lo loki lo Betekoron na gwon i dudulet.

¹⁴ A lokökorit kiladdi, a neŋaddi i swöt lo tokotyaŋ tojo ko loki, a suluje i mere logon diŋö ko Bete-koron i swöt lo loki; a ’dutökiŋdye Kiryat-bala (ŋina a Kiryat-yarim), nene köji na ŋutu ti Yuda. Na a koret na swöt lo tokotyaŋ.

¹⁵ A koret na swot lo loki suluje i ’dutet na Kiryat-yarim; a lokökorit iti ŋerot i swot lo tokotyaŋ, tojo ko lelekesi ti jor na Nepetoak;

¹⁶ a lokökorit dudulara kak tojo ko ’dutet na mere logon todir ko pirit na ’dir na ŋuro lo Inoma, na gwon i pirit na ’dir na ŋutu ti Repa i swöt lo lobot; a dudulara kak nyu tojo ko pirit na ’dir na Inoma i goŋet lo ŋutu ti Yebusi i swot lo loki, a dudulara kak nyu tojo ko Ene-rŋgele;

¹⁷ A kiladdi i swöt lo lobot, a lwöŋöddi Ene-semese tojo ko Gelilot nagon todir ko kak nagon gwolopara a ko ’du na Adumim; a dudulara kak tojo ko ŋurupit na Boana ŋuro lo Rubena;

¹⁸ a lwöŋöddi ŋerot i goŋet diŋö ko Bet-araba i swöt lo lobot, a dudulara kak nyu tojo ko Araba;

¹⁹ a lokökorit nabbi goŋet lo Bete-kŋgela i swöt lo lobot; a lokökorit ’duddye i kume lo tör nagon ti ’dokon nagon pioŋ kanyit a ’balaŋ parik na nagon a julumaddu kaŋo i swöt lo lobot, i ’dutet na Yardene i swot lo loki; a ŋilo gwe a lokökorit lo loki.

²⁰ A Yardene gwe a lokökorit lonyit i swöt lo ’yure. Aŋina gwe a kak lomore na ŋutu ti Benyamina, i loköko-ritan kase lo lolorga se, gwoso i midijik kase.

²¹ A köjinö ti kötumit na ŋutu ti Benyamina gwoso i midijik kase gwe a ko Yeriko, ko Bete-kŋgela, ko Emeke-kesisi;

²² ko Bet-araba, ko Semaraim, ko Betele,

²³ ko Awim, ko Para, ko Opera,

²⁴ ko Kepar-amonai, ko Openi, se ko Geba; kweja adi kine a köjinö puök wot murek se ko turön kase.

²⁵ Köti a Gibeon, ko Rama, ko Berot;

²⁶ ko Misepe, ko Kepira, ko Mosa;

²⁷ ko Rekem, ko Yirapele, ko Tarala;

²⁸ ko Sela, ko Eleŋ, ko Yebusi (ŋina a Yerusalema), ko Gibeat, se ko Kiryat-yarim; kweja adi kine a köjinö puök wot iŋwan se ko turön kase. Aŋina gwe a kak lomore na ŋutu ti Benyamina gwoso i midijik kase.