Yosua 17 - Bibilia Buk na Ŋun nagon koti luŋu a

¹ A gura tikine a na kötumit na Manase; kogwon nye a ŋuro kayu lo Yosepa. A Makir ŋuro kayu lo Manase monye Gilada tikine Gilada se ko Basan kogwon nye a kamörönit.

² A guralan na gubani a ti pitönö ti kötumit na Manase gwoso i midijik kase, kweja adi ŋwajik ti Abiejer, ko ŋwajik ti Kelek, ko ŋwajik ti Keseriele, ko ŋwajik ti Sekeme, ko ŋwajik ti Keper, se ko ŋwajik ti Semida; kilo a nyakwa riat lulyan ti Manase ŋuro lo Yosepa gwoso i midijik kase.

³ Ama a Selope kada ŋuro lo Keper, ŋuro lo Gilada, ŋuro lo Makir, ŋuro lo Manase gwe ’bak ŋuro lulalet, ama a nye gwe ko ŋwajik nawate; a karin ti kinu ŋwajik kanyit nawate gwe a ko Makela, ko Noa, ko Ogela, ko Mileka, se ko Tiresa,

⁴ a sepoŋdi nyona ko koane Elejara i komor, se ko Yosua ŋuro lo Nun i komor, ko i komor na ŋutu temejik, a kulyani adi, MATAT aje sarakin Mose anyen korakiŋdya yi kak lomore ko luŋasirik kaŋ i pirit na geleŋ. Nyenagon a nye korakiŋdye se kak lomore i kiden na luŋasirik ti monye lose gwoso na saŋi MATAT nu.

⁵ Nyena a koresi puök ti kak ’duki ko Manase kökö jur lo Gilada se ko lo Basan, lo gwon i nu pele na Yardene;

⁶ kogwon ŋwajik wate ti Manase a wuju lomore i pirit na geleŋ ko ŋwajik kanyit lulyan. A jur lo Gilada korakine pitönö ti ŋwajik ti Manase.

⁷ A lokökorit lo Manase suluje Aser tojo Mike metat, na gwon i swöt lo ’yure; a lokökorit iti ŋerot i swöt lo loki tojo ko ŋutu ti Ene-tapuak.

⁸ Jur lo Tapuak gwon a lo Manase, ama köji na Tapuak na gwon i lokökorit lo Manase nu a na ŋwajik ti Epuraima.

⁹ A lokökorit dudulara kak tojo ko kare logon karin kanyit a Kana. A kune köjinö i swöt lo loki lo kare i kiden na köjinö ti Manase kune gwe a ti Epuraima. A lokökorit lo Manase gwe i nu pele na lu kare i swöt lo lobot, a nye ’dutökiŋdye i tör na ’balaŋ;

¹⁰ a jur lo gwon i swöt lo loki lo gwe a lo Epuraima, a lo gwon i swöt lo lobot lo gwe a lo Manase, a tör duma na ’balaŋ gwe a lokökorit lonyit; a yepaddi tojo Aser i swöt lo lobot, ko Yisakar i swöt lo ’yure.

¹¹ Köti Yisakar yu ko Aser yu a Manase ’debbi Bete-sean ko turön kanyit, ko Yibeleam ko turön kanyit, ko ŋutu ti Dor ko turön kanyit, ko ŋutu ti Ene-dor ko turön kanyit, ko ŋutu ti Tanak ko turön kanyit, ko ŋutu ti Megido nagon gwon i ko ’dulan musala na ko turön kanyit.

¹² Ama a ŋwajik ti Manase tine bulö morga kunu köjinö; ama kölumbö a ŋutu ti Kanana yepe si ’da i lu jur.

¹³ A ko gwe sona nagon ŋutu ti Yisaraele gwe ko riŋit nu, a se ripakiŋdye ŋutu ti Kanana i kita a tine rikörö se kaŋo asut.

¹⁴ A ŋutu ti kötumit na Yosepa pipije Yosua adi, Nyo do aje tiŋdu yi gura geleŋ ka ’de nagon a koret geleŋ a lomore? Yi a ŋutu jore, kogwon MATAT aje ’boroja yi.

¹⁵ A Yosua waddi se adi, Ko ta a ŋutu jore, iti ta i yöbu, ko tokelakiŋdye ta ’borik pirit nyu i jur lo ŋutu ti Peŋi ko ti Repa; kogwon jur lo Epuraima logon a merya lo gwon a logusu kasu.

¹⁶ A ŋutu ti kötumit na Yosepa kulyani adi, Jur logon a merya ti jukin yi; ama a ŋutu liŋ ti Kanana logon si ’da i jur lu ’dayat kulo gwe ko arabiajin lo jirikö logon a witiöt, köti se lo gwon Bete-sean kulu ko turön kanyit, ko se lo gwon i pirit na ’dir na Yejerele kulo.

¹⁷ A Yosua kulyani ko mede na Yosepa, logon a ko Epuraima ko Manase adi, Ta a ŋutu jore, a ta gwe ko riŋit a duma; ta ti gwon ko gura geleŋ ka ’de.

¹⁸ Ama a jur logon a merya lo gwe a losu; ama ma ’di nagon nye a yöbu, a ta mo toke ’yi nye, a nye mo gwe a losu tojo ko ’dutet nanyit; kogwon ta mo rikörö ŋutu ti Kanana kaŋo, ma ’di nagon se gwon ko arabiajin lo jirikö logon a witiöt, ma ’di se gwon ko riŋit.