Yosua 14 - Bibilia Buk na Ŋun nagon koti luŋu a

Kanana a kora ko guralan

¹ Nyena a kune gwe a kak jin lomoriot nagon ŋutu ti Yisaraele a wu i jur lo Kanana, nagon koane Elejara ko Yosua ŋuro lo Nun, se ko kusik ti midijik ti merenyejin ti kötu-mitön ti ŋutu ti Yisaraele a korakin se kunu.

² A lomoriot kase korani ko guralan, gwoso na saŋi MATAT Mose i kulya ti kötumitön buŋwan, ko i kulya ti swöt lo kötumit nu.

³ Kogwon Mose aje korakiŋdya lomoriot i kötumitön murek se ko swöt lo kötumit i nu pele na Yardene; ama a nye gwe a ko korakin Lewiŋin lomore kase kiden.

⁴ Kogwon ŋwajik ti Yosepa kulo gwon a kötumitön murek logon a ko Manase ko Epuraima; a Lewiŋin gwe a ko tiki koret i jur, ama tuŋ tiki köjinö nagon se si ’da kata, ko piritön yukisi ti toro ’bo kase ko teŋon kase.

⁵ A ŋutu ti Yisaraele koŋdi sona gwoso na saŋi MATAT Mose nu, a se kökoroji lu jur sona.

Keberon a tiki Kaleba

⁶ A ŋutu ti Yuda iti Giligala ko Yosua yu; a Kaleba ŋuro lo Yepune Kin ŋityo lo kulyani ko lepeŋ adi. Do a den kulya nagon MATAT a kulyari ko Mose ŋuto lo Ŋun i kulya kwe ko i kulya kunok Kadesa-barenea yu kunu.

⁷ Nan köju gwon ko kiŋajin merya iŋwan i diŋit nagon Mose köliŋönit lorun soŋdi nan kaŋo Kadesa-barenea i wiŋa na lo jur nu; a nan jakiŋdye lepeŋ kutuk gwoso i kulya na gwon köyö i töili kune.

⁸ Ama a luŋasirik logon yi tu liŋ kulo tokujöŋdi töilyet ti ŋutu; ama nan lo keŋoddu MATAT Ŋun liŋ ko töili liŋ liŋ.

⁹ A Mose iŋge milyeju i ŋilu lor adi, ’Diri jur logon do a ryok ko ’dapan kulök lu mo gwon a lomore ilot ko a lo ŋwajik kulök ŋupi ŋupi, kogwon do aje keŋoddu MATAT ŋun liŋ ko töili ilot liŋ.

¹⁰ Nyenagon mete, MATAT aje tiŋdu nan i gwon jorun kilo kiŋajin merya iŋwan, gwoso na kulyari nye nu, suluja i nu diŋit nagon MATAT jamakiŋdye Mose kine kulya nu, na worori ŋutu ti Yisaraele i yöbu nu; nyena mete, nan gwe ko kiŋajin merya budök wot mukanat i lo lor.

¹¹ Nan lo nyuŋ gwon i lo lor gwoso na gwoŋdi nan i lu lor logon Mose soŋdi nan lu; riŋit nio yeŋon sona gwoso na gwoŋdi riŋit nio i ŋinu diŋit nu i kulya ti gor, i lupö kaŋo ko i lupe lukata.

¹² Nyenagon soŋinana tiŋdi nan lo jur logon a merya, logon MATAT aje jambu kulya kanyit i ŋilu lor lu; kogwon do aje yiŋ i ŋilu lor adi ŋutu ti Anak lo gwon nyu kulu, se ko köjinö nago na titiyu nagon ko mariŋan. Kode ŋona MATAT mo gwon ko nan, a nan mo riköddi se kaŋo gwoso na kulyari MATAT nu.

¹³ A Yosua ’boroji Kaleba ŋuro lo Yepune; a nye tiŋdi lepeŋ Keberon a lomore nanyit.

¹⁴ Nyenagon a Keberon gwe a lomore na Kaleba ŋuro lo Yepune Kin ŋityo tolo ko lo lor; kogwon nye a keŋoddu MATAT Ŋun lo Yisaraele ko töili lonyit liŋ.

¹⁵ Ama köju ’beron karin ti Keberon a Kiryat-arba; ŋilo Arba a ŋuto duma lokukwön ko ŋutu ti Anak kiden. A jur liŋ iŋge yukan i kulya ti gor.