Yosua 13 - Bibilia Buk na Ŋun nagon koti luŋu a

Nyenagon a Yosua gwe a

¹ A modoŋ ko kiŋajin jore; a MATAT kulyani ko lepeŋ adi, Do gwe a modoŋ ko kiŋajin jore, jur logon a pituŋdyö i moka lo nyuŋ gwon a luŋalaŋ parik.

² A ŋilo gwe a jur logon nyuŋ a pituŋdyö i moka, kweja adi kak liŋ na ŋutu ti Pelesete, ko kak liŋ na ŋutu ti Gesur;

³ (nagon suluja Sikor na gwon i swöt lo ’yure lo Ejipeto, tojo ko lokökorit lo Ekron i swöt lo lobot, ŋilo swöt a kenaki a lo ŋutu ti Kanana; a kimak ti Pelesete gwe mukanat, logon a ti Gaja, ko Asedoda, ko Asekelon, ko Gata, ko Ekron). Köti koresi ti ŋutu ti Awa nyuŋ a pituŋdyö i moka,

⁴ a i swöt lo loki gwe a jur liŋ lo ŋutu ti Kanana, se ko Meara nagon a na ŋutu ti Sidona, tojo ko Apek i lokökorit lo ŋutu ti Amori,

⁵ ko jur lo ŋutu ti Gibeli, ko Libanon liŋ, i swöt lo nyeruŋdye kolor lu, suluja Bala-gada i mukök na mere Eremon tojo ko kwake nagon lupörikin Kamat.

⁶ A nan lepeŋ mo riköddi kaŋo ko ŋutu ti Yisaraele i komor ŋutu liŋ ti merya suluja Libanon tojo ko Misere ŋot-maim, iŋkoi ŋutu ti Sidona liŋ; ama tuŋ ti do korakiŋdye ŋutu ti Yisaraele lo jur a lomore, gwoso na saŋi nan do na.

⁷ Nyenagon koraki lo jur i kötumitön buŋwan, se ko swöt lo kötumit na Manase a lomore.

Kak nagon a koraki Manase ko Rubena ko Gada

⁸ A Rubena se ko Gada wuji kak nase lomore ko lele swöt lo kötumit na Manase i pirit na geleŋ, nagon Mose a tin se i nu pele na Yardene i swöt lo ’yure nu, gwoso nagon Mose köliŋönit lo MATAT aje tikiŋdye se nu.

⁹ Kak nase lomore suluja Aroer na gwon nyona ko kare Arenon, se ko köji na gwon i kiden na lu kare ko jur liŋ lo gwon i ko ’du na ’dayat na Medeba tojo ko Dibon;

¹⁰ ko jurön liŋ ti Sikon mor lo ŋutu ti Amori, logon tumatyan Kesebon yu tojo ko lokökorit lo ŋutu ti Amon;

¹¹ ko Gilada, se ko koresi ti ŋutu ti Gesur, se ko ti Maka, ko mere Eremon liŋ, ko Basan liŋ tojo ko Saleka,

¹² kweja adi tumatyan liŋ na Oga Basan yu, logon tumatyan Asatarot ko Ederei (ŋilo lo pituŋdyö i pitönö ti ŋutu ti Repa). Mose a te ’ya kulo ŋutu a iŋge riköddu se kaŋo.

¹³ Ama a ŋutu ti Yisaraele tine riköddu ŋutu ti Gesur, se ko ti Maka; ama a ŋutu ti Gesur ko ti Maka yeŋe si ’da ko ŋutu ti Yisaraele kiden tojo ko lo lor.

¹⁴ Ama tuŋ a Mose gwe a ko korakin kotumit na Lewi kak a lomore nase;ŋo nagon ’yuraki MATAT ŋun lo Yisaraele kune se na gwon a lomore nase, gwoso na kulyari nye ko Mose nu.

¹⁵ A Mose tiŋdi kötumit na ŋutu ti Rubena kak lomore gwoso i miriŋik kase.

¹⁶ A kak nase suluje Aroer na gwon nyona ko kare Arenon, se ko köji na gwon i kiden na kare ko jur liŋ lo gwon i ko ’du na ’dayat nyona ko Madeba nu;

¹⁷ ko Kesebon, se ko köjinö kanyit liŋ na gwon i jur lo gwon i ko ’du na ’dayat lu. Kine köjinö a ko Dibon,

¹⁸ ko Bamot-bala, ko Bete-bala-meon; ko Yasa, ko Kedemot, ko Mepata,

¹⁹ Kiryataim, ko Sibema, ko Seret-sakar i lu mere ki lo gwon i pirit na ’dir lu;

²⁰ ko i Bete-peor, ko dudulesi ti Pisiga, ko Bet-yesimot;

²¹ kweja adi köjinö liŋ ti jur lo gwon i ko ’du na ’dayat, ko tumatyan liŋ na Sikon mor lo ŋutu ti Amori, logon tumatyan Kesebon. Mose a te lepeŋ i pirit na geleŋ ko kimak ti Midiyan, ko Ewi, ko Rekem, ko Sur, ko Kur, ko Reba, logon a kimak ti Sikon. Kilo kimak si ’da i pilu jur.

²² A ŋutu ti Yisaraele köti tatuje Balam kawananit logon a ŋuro lo Beor ko baŋdu i kiden na kulye kase lo tatua kulu.

²³ A loko-korit lo ŋutu ti Rubena gwe a Yardene.ŋina gwon a kak lomore na ŋutu ti Rubena gwoso i midijik kase, ko i köjino kase, ko i turön kase.

²⁴ A Mose köti korakiŋdye kötumit na ŋutu ti Gada kak lomore gwoso i midijik kase.

²⁵ A koret nase gwe a Yajer, ko köjino liŋ ti Gilada, se ko swöt lo jur lo ŋutu ti Amon, tojo ko Aroer na gwon i swot lo ’yure lo Raba,

²⁶ suluja Kesebon tojo Ramat-misepe se ko Betonim, koti suluja Makanayim tojo ko koret na Debir;

²⁷ mora ko Bet-aram, ko Bet-nimera, ko Suköt, se ko Saŋon na gwon i pirit na ’dir; kine a pitönö ti tumatyan na Sikon mor lo Kesebon, a Yardene gwe a lokökorit lose, tojo ko ’dutesi ti tör na Kineret i nu pele na Yardene i swöt lo ’yure.

²⁸ A ŋina gwe a kak lomore na ŋutu ti Gada gwoso i midijik kase, ko i köjinö kase, se ko i turön kase.

²⁹ A Mose korakiŋdye swot lo kötumit na Manase kak lomore; a tiki swöt lo kötumit na ŋutu ti Manase gwoso i midijik kase.

³⁰ a koret nase suluje Makanayim, a gwe i Basan liŋ, ko tumatyan liŋ na Oga mor lo Basan, ko turön liŋ ti Yari na gwon Basan yu, kweja adi köjinö merya buker;

³¹ ko swöt lo Gilada, ko Asatarot, ko Ederei, nagon a köjinö ti tumatyan na Oga na gwon Basan yu kunu; kine köjinö a koraki ŋutu ti Makir ŋuro lo Manase, köti a ti swöt lo ŋutu ti Makir gwoso i midijik kase.

³² Kune a kak jin lomoriot nagon Mose lo korakiŋdya se i piritön na’dayatak ti Moaba, i nu pele na Yardene Yeriko yu i swöt lo ’yure.

³³ Ama a Mose gwe a ko korakin kötumit na Lewi lomoriot; kweja adi MATAT Ŋun lo Yisaraele tuŋ lo gwon a lomore lose, gwoso na kulyari nye ko lepeŋat nu.