Yosua 1 - Bibilia Buk na Ŋun nagon koti luŋu a

Ŋutu a teteŋdya anyen te ’ya Kanana

¹ A ko gwe sona i mukök na twaji Mose kölipönit lo MATAT nu, a MATAT kulyani ko Yosua ŋuro lo Nun, logon a kaparanit lo Mose lo adi,

² Mose kölipönit lio aje twan; nyenagon Ŋine ki, laŋaddi ta i nu pele na ŋilo Yardene, ta se ko kilo ŋutu liŋ ti Yisaraele, tojo i jur logon nan titikin lepeŋat lu.

³ Nan aje tiŋdu ta piriton liŋ a ryoryok ta ko ’dapan kasu kine gwoso na kulyari nan ko Mose nu.

⁴ A jur lo Kiti liŋ tojo ko Tor Duma na ’balaŋ na metaddu i swöt lo ’doro ’i kolor lu mo gwe a koresi kasu, suluja i yöbu na sese ko i na Libanon tojo ko kare duma logon a kare Perat.

⁵ Aŋuto lele mo gwe ’bayin logon bubulö te ’ya do perok liŋti gwiliŋit inot; a nan mo gwe ko do koti gwoso na gwoŋdi nan ko Mose nu; a nan mo tine koruŋdya mugun kalor konut kode ko ’yu do.

⁶ Gwe do a iŋgo ko a purutat; kogwon do mo tiŋdu kulo ŋutu i morga na lu jur logon nan a milyekin merenyejin kase adi nan mo titin se lu.

⁷ Tuŋ gwe do a iŋgo ko a purutat gwak, i tiju i koŋdya gwoso i saresi liŋ logon Mose kölipönit liŋ aje saŋi do kulu; an do ko lopukoddu kalor i se i könin lutaten kode i kadoŋe; anyen kulya kunok böŋo gwon ’bura i piritön liŋ na tiri do kunu.

⁸ Na buk na saresi ti wusaddu kalor konut i kutuk, ama do yeyeju lepeŋ ko tuparan ko tukwaje, anyen do boŋo tiju i koŋdya gwoso liŋ na wuröki lukata kune; a kirut do mo puputuru ŋerot, a kulya kunök mo gwe ’bura.

⁹ Ti gwon a nan lo saŋu do le? Gwe do a iŋgo ko a purutat; an do kujönö ko an do ko delya; kogwon nan MATAT Ŋun ilot gwon ko do i piriton liŋ na tiri do kunu.

¹⁰ A Yosua saŋi temejik ti ŋutu kulo adi,

¹¹ Wöröjine ta i kiden na mera, ko saŋi ta kilo ŋutu adi, Tetenakiŋdye ta ’borik kinyo; kogwon i kiden na perok musala ta de laŋaddu i nu pele na nilo Yardene, i morga na jur logon MATAT Ŋun losu titin ta i morga lu.

¹² A Yosua kulyani ko ŋutu ti Rubena ko ti Gada ko swot lo kötumit na Manase adi,

¹³ Yiyiuŋdye ta kulya nagon Mose kölipönit lo MATAT a saŋi ta kine, adi, MATAT Ŋun losu titin ta i yukan; a mo tiŋdi ta ŋilo jur.

¹⁴ A wate kasu ko ŋwajik kasu ko toro ’bo kasu mo mönuŋdye i Ŋilo jur logon Mose a tikin ta i nu pele na Yardene lu, ama ŋutu kasu walan liŋ mo laŋ addu ŋerot ko luŋosurök i komor a jupu tito moriesi, a mo parakiŋdye lepeŋat,

¹⁵ tojo ko MATAT aje tiŋdu luŋosurök i yukan gwoso nasu na, a se köti morgi lu jur logon MATAT Ŋun losu titin lepeŋat lu; nyena a ta mo yitöni i jur lomore losu, a mo ’debbi lepeŋ, kweja adi ŋilu jur logon Mose kölipönit lo MATAT a tikin ta i nu pele na Yardene i swöt lo nyeruŋdye kolor lu.

¹⁶ A se waddi Yosua adi, Yi mo kökon ŋo liŋ na sarakin do yi kune, a yi mo iti i piritön liŋ na sonyoddi do yi kata kine.

¹⁷ A yi de yiŋge do köti, gwoso na yiŋge yi Mose i liŋ nu; tuŋ böŋö ti MATAT Ŋun ilot gwe ko do, gwoso na gwoŋdi nye ko Mose nu.

¹⁸ Koŋa lo renya lo saret ilot, a tine yiŋga kulyaesi kulök i Ŋo liŋ na saŋi do lepeŋ kine, a nye mo tatuani tatua. Tuŋ gwe do a iŋgo ko a purutat.