Yoane 6 - Bibilia Buk na Ŋun nagon koti luŋu a

Yesu a tunyeju nutu alipan mukanat

¹ A i mukok na ŋina, a Yesu laŋgi i nu pele na tor na Galilaya. (Tor na Galilaya luŋu a Tor na Tiberia.)

² A ŋutu Jore parik kepoddi lepeŋ kogwon se aje met kweyesi nagon lepeŋ kokonakin ŋutu logon a gigilotu kunu.

³ A Yesu kijiki i mere, a si ’dani nyu se ko ŋutu kanyit kajujumuk i pirit na geleŋ.

⁴ A rorwe lo Yudayaki logon a Pasaka gwe nyona.

⁵ A Yesu ko boŋgi, a nye meddi ŋutu jore parik i po kanyit ni, a nye pije Pilipo adi, Yi de gworundyo ambatajin ya anyen kulo ŋutu nyonyo?

⁶ Lepeŋ jambu kine kulya moru Pilipo; kogwon lepeŋ ko mugun nanyit deden ko nye kodyo koŋdya nyo.

⁷ A Pilipo waddi lepeŋ adi, Gurut alipan murek ti jukin gwöruŋdyö ambatajin nagon temakiŋdya i ŋutu anyen se wuju a na ’dit na ’dit.

⁸ A lele lo ŋutu kanyit kajujumuk logon a Andarea luŋaser Simona Petero, tukokiŋdye lepeŋ adi,

⁹ Lele ŋuro lo ni logon ko ambatajin mukanat ti ’bolot saora se ko somot murek; ama kine koŋdya nyo i ŋutu jore gwoso kilo?

¹⁰ A Yesu kulyani adi, Tosi ’dane ta ŋutu kak. Nu pirit a doru, nyena a ŋutu lyan si ’dakine kak; a se gwe gwoso alipan mukanat.

¹¹ A Yesu ’dumuŋdye ambatajin kune, a tiŋdi Ŋun tinate, a kökorakiŋdye i ŋutu lo si ’da kak kulo, a nye koti koŋdi sona ko somot murek kune. A se liŋ iŋge nyesu gwoso nagon se ’de ’dekan.

¹² A nagon se aje yimönö nu, a nye takiŋdye ŋutu kanyit kajujumuk kulo adi, ’Du ’dume ta pitönö nagon a ko nyei kine, an nene böŋö likin.

¹³ Nyena a se poki i ’du’dumba, a iŋge totojore kupöjin puök wot murek ko pitönö ti ambatajin mukanat ti ’bolot saora nagon a ko nyei kune.

¹⁴ A na meddi ŋutu kweyet nagon Yesu aje kon nu, a se kulyani adi, Lo ’diri a nebi logon adi popo i kak ni lo.Kiko lo gwon Yerusalema lukata

¹⁵ A Yesu ko dene adi lepeŋat ’dek po i ripakiŋdya na nye a mor nu, a nye kö ’yi se a iti i mere koti nye geleŋ.

Woro na Yesu i tor loki

¹⁶ A nagon sömukö aje po nu, a ŋutu kanyit kajujumuk kulo lulurara i tor,

¹⁷ a kiyaddi i ki ’bo kata, a yitöni i nu pele na tor tu Kaperanauma. A kak gwe a mudwe nagon Yesu a ko nyuŋ po kase ni nu;

¹⁸ a kobuŋöt duma wuŋge wuggö a tor ya ’yi ya ’yu.

¹⁹ A nagon se aje kamaddu mailijin musala kode iŋwan nu, a se metuŋdye Yesu wori ’e i pioŋ loki, po nyona ko ki ’bo; a se kujönoni kujönö.

²⁰ Ama a nye kulyani ko lepeŋat adi, Ko kujönö ta, ŋo lo a nan.

²¹ A se ’deke wuyuŋdya lepeŋ i ki ’bo kata, ama ’de ’de a ki ’bo ’dure i pirit nagon se tu kata nu.

ŋutu a galaddu Yesu

²² A kotumalu lodir lo ŋutu gwogwo’dine i nu pele na tör. Se koju a met ki ’bo geleŋ tuŋ, a Yesu gwe a ko kiyaddu i ki ’bo kata anyen tu ko ŋutu kanyit kajujumuk kulo i pirit na geleŋ, ama ŋutu kanyit kajujumuk kulo aje tu ka ’de.

²³ Nyenagon a ki ’bojin lo po Tiberia kulo ’dure i pirit nagon MATAT aje tiŋdu Ŋun tinate a ŋutu iŋge nyesu ambatajin kata nu.

²⁴ A lodir lo ŋutu ko meddi adi Yesu gwe ’bayin yu ma ’di ŋutu kanyit kajujumuk, a se ko ’börik kije i ki ’bojin kata a iti Kaperanauma galaddu Yesu.

Yesu logon a ambata toruet

²⁵ A se ko ryeji lepeŋ i nu pele na tör, a se pije lepeŋ adi, Katodinönit, do po ni nanu?

²⁶ A Yesu waddi se adi, ’Diri ’diri nan takiŋdya ta adi, ta ga ’yu nan ti gwon kogwon ta a meddya kweyesi, ama kogwon ta aje nyesu ambatajin a yimönö.

²⁷ Ko kita ta kinyo lo ’ba ’baka, ama kitani ta kinyo lo yeyeŋon logon a kinyo lo ru na yeŋ nyin. Ŋilo kinyo nan Ŋuro lo ŋuto mo titikin ta; kogwon Ŋun Baba a nya ’doddu nan ko kweyet adi nan a lonyit.

²⁸ Nyena a se pije lepeŋ adi, Yi ködyö koŋdya nyo anyen koŋdya kitajin ti Ŋun?

²⁹ A Yesu waddi se adi, Na a kita na Ŋun, adi ta kodyö yuyuŋ ŋuto logon Ŋun a sunyun lo.

³⁰ A kirut se pije lepeŋ adi, Do koŋdya nan kweyet anyen yi böŋö memet ko anyen yubbö do? Do koŋdya nan kita?

³¹ Merenyejin kaŋ a nyesu mana i yöbu, gwoso na wuröri adi, Nye aje tikin lepeŋat ambata na po ki anyen nyönyö.

³² A Yesu kulyani ko lepeŋat adi, ’Diri ’diri nan takiŋdya ta adi, Mose ’bayin lo tiŋdu ta ambata na po ki, ama Baba lo tiŋdu ta ambata nagon po ki a na to ’diri.

³³ Kogwon nye logon po kak ki yu lo a tiŋdi ŋutu ti na kak ru lo, nye a ambata nagon Ŋun lo tiŋdu.

³⁴ A se mo ’yi lepeŋ adi, Pon duma likaŋ, tiki yi ŋina ambata diŋitan liŋ.

³⁵ A Yesu waddi lepeŋat adi, Nan logon a ambata toruet; ŋuto logon a po köyö ni lo mo ti magora kwöŋ, köti ŋuto logon a yubbö nan lo mo ti moka kure kwöŋ.

³⁶ Ama nan aje takin ta adi ta aje met nan ama a kölumbö a ta tine yubbö.

³⁷ Ŋutu liŋ logon Baba titin nan kilo mo popo köyö ni, nyena ŋuto logon a po köyö ni lo nan mo ti rikörö kwöŋ,

³⁸ kogwon nan aje po kak ki yu i koŋdya na ’dekesi ti lepeŋ lo sunyuŋdyö nan lo, ama ti gwon i koŋdya na ’dekesi kwe.

³⁹ Lepeŋ lo sunyuŋdyö nan lo ’de ’dekan adi, ti nan ködyö gwe ti tolikin lele geleŋ lo ŋutu liŋ logon nye aje tikin nan kilo, ama ti nan ködyö toŋiji se ki i twan i lor lo ’dutet.

⁴⁰ Kogwon Baba ’de ’dekan adi, ti ŋutu liŋ logon memet nan Ŋuro ko a yuŋ nan kilo ködyö wuji ru na yeŋ nyin; a nan mo toŋiji se ki i twan i lor lo ’dutet.

⁴¹ A Yudayaki poki i wiwinya ko ’börik i kulya ti lepeŋ, kogwon lepeŋ a kulya adi nye a ambata na po kak ki yu.

⁴² A se totopine adi, Lo a Yesu ŋuro lo Yosepa, logon monye se ko ŋote yi deden lo, ’bayin sona le? Nyo nye kulya soŋinana adi, Nan a po kak ki yu.

⁴³ A Yesu waddi lepeŋat adi, Kölöki ta wiwinya ko ’börik.

⁴⁴ Lele ŋuto ’bayin logon bubulö po köyö ni, ake ko Ŋun Monye lo sunyuŋdyö nan lo a pikun lepeŋ; a nan mo toŋiji lepeŋ ki i twan i lor lo ’dutet.

⁴⁵ Nebijin köju a wuŋö adi, Ŋun mo totodin se liŋ. ŋutu liŋ lo yiŋga Ŋun Monye a jujumuŋdye ko lepeŋ kilo popo köyö ni.

⁴⁶ Ti gwon adi lele ŋuto aje met Ŋun Monye ake nye lo po ko Ŋun yu lo aje met Ŋun Monye.

⁴⁷ ’Diri ’diri nan takiŋdya ta adi, ŋuto lo yubbo lo gwon ko ru na yeŋ nyin.

⁴⁸ Nan a ambata toruet.

⁴⁹ Merenyejin kasu köju a nyesu mana i yöbu, a se iŋge twatwa.

⁵⁰ Ama ambata nagon po kak ki yu na gwon sona adi, ŋuto bubulö nyesu a tine twan.

⁵¹ Nan a ambata na gwon jörun na po kak ki yu. Ko lele ŋuto a nyesu na ambata a nye mo gwe jörun ŋupi; a ŋina ambata nagon nan mo titin lepeŋ na a mugun nio, nagon nan a tikin anyen ŋutu ti kak böŋö gwon jörun.

⁵² Nyenagon a Yudayaki woŋe ko ’börik pipija adi, Lo ŋuto bubulö tiŋdu yi i nyesu na mugun nanyit ada?

⁵³ a Yesu waddi lepeŋat adi, ’Diri ’diri nan takiŋdya ta adi, ko ta ti nyesu mugun nio na Ŋuro lo ŋuto a tine möju rima kwe, a ta mo tine gwon ko ru kasu i mugunya.

⁵⁴ Ŋuto lo nyesu mugun nio a möji rima kwe lo, lepeŋ gwon ko ru na yeŋ nyin, a nan mo toŋi lepeŋ ki i twan i lor lo ’dutet.

⁵⁵ Kogwon mugun nio a kinyo lo to ’diri, a rima kwe gwe a ŋo na mamata ti to ’diri.

⁵⁶ Ŋuto lo nyesu mugun nio a moji rima kwe lo, lepeŋ gwogwolor koyo i mugun, a nan gwolore ko lepeŋ mugun.

⁵⁷ Nyena gwoso nagon Ŋun Monye lo gwogwolor lo aje sunyun nan, a nan gwolore kogwon lepeŋ, köti gwon sona adi ŋuto lo nyesu nan lo mo gwogwolor kogwon nan.

⁵⁸ Na a ambata na po kak ki yu; nye ti gwon gwoso ambata nagon merenyejin kasu köju a nyö a twatwane twatwa nu, ama kulya kanyit gwon sona adi, ŋuto lo nyesu ŋina ambata lo mo gwogwolor ŋupi.

⁵⁹ Yesu a jambu kine kulya na todiŋdye nye i kadi momoret Kaperanauma nu.

Kulyaesi ti ru na yeŋ nyin

⁶⁰ A ŋutu kanyit kajujumuk jore ko yiŋge kine kulya, a se kulyani adi, Kilo kulyaesi a iŋgo, a yi koti yiŋe kine kulya a ti nyo?

⁶¹ A Yesu iŋge den kanyit i töili adi ŋutu kanyit kajujumuk wiwinya i kine kulya, a nye pije se adi, Kine kulya köpuggö ta le?

⁶² a kirut mo gwe ada ko ta a met nan Ŋuro lo ŋuto i tu ki i pirit na gwoŋdi nan a kokwe nu?

⁶³ Mulökötyo titiŋdu ru, a mugun tine koŋdya nene ŋo. Kulyaesi logon nan aje jamakin ta kilo a ti mulokotyo a toruje torujo.

⁶⁴ Ama kulye kasu kata logon a ko yubbo. Kogwon Yesu aje den i suluet ko ko ŋa logon ti yubbö, koti ko ŋa lo tiŋdu lepeŋ i tatua.

⁶⁵ A nye kulyani adi, Ŋina a kwe nagon nan kulyari ko ta adi ŋuto ’bayin logon bubulö po köyö ni ake ko Ŋun Monye a rukokin lepeŋ.

⁶⁶ A i ŋina a ŋutu kanyit kajujumuk jore kukutöro bot, a tine moraddu ko lepeŋ koti.

⁶⁷ a Yesu pije ŋutu kajujumuk puök wot murek kulo adi, Ta köti ’de ’dekan kö ’yu nan le?

⁶⁸ a Simona Petero waddi lepeŋ adi, MATAT, yi tu i lon ŋuto? Kulyaesi ti ru na yeŋ nyin gwon konut.

⁶⁹ Yi aje yubbö ko aje kurun adi do a Loke lo Ŋun.

⁷⁰ a Yesu pije se adi, Nan köju a ko wuluŋdyö ta puök wot murek le? Ama a lele losu gwe a satani.

⁷¹ A nye jambi sona i kulya ti Yuda ŋuro lo Simona Isikariota, kogwon nye lepeŋ lo tiŋdu Yesu i tatua ma ’di nye a lele lo ŋutu kajujumuk puök wot murek kulo.