Yoane 3 - Bibilia Buk na Ŋun nagon koti luŋu a

Yesu ko Nikodemo

¹ Lele Parusityo kata karin kanyit a Nikodemo, lepeŋ a lele lo momoret na ŋutu temejik ti Yudayaki.

² A nye poŋdi ko Yesu ni kwaje, a kulyani ko lepeŋ adi, Rabi, yi deden adi do a katodinönit logon Ŋun lo sunyuŋdyö, kogwon lele ŋuto ti bulo koŋdya kweyesi nagon do kökon kine ake ko ŋun gwon ko lepeŋ.

³ A Yesu waddi lepeŋ adi, ’Diri ’diri nan takiŋdya do adi, ko lele ŋuto a ko yuŋwe köti a ludu-kötyo, a nye tine met Tumatyan na Ŋun.

⁴ A Nikodemo pije lepeŋ adi, Ŋuto bubulö yuŋwe ada ko lepeŋ gwe a mo-doŋ? Lepeŋ bubulö lupö ko Ŋote i pele daŋ tomurek anyen yuyupwe?

⁵ A Yesu waddi adi, ’Diri ’diri nan takiŋdya do adi, ko lele ŋuto a ko yuŋwe ko pioŋ ko Mulökötyo lo Ŋun, a nye tine bulö lupö i Tumatyan na ŋonaun.

⁶ Ŋo na yuŋwe ko ŋuto na a ŋuto, a Ŋo na yuŋwe ko Mulökötyo na gwe a mulökötyo.

⁷ Kosöpu kogwon nan takiŋdya do adi ta ködyö yuyuŋwe köti a ludukö.

⁸ Köbuŋöt wuköddu i swöt logon nye ’de ’dekan, a do yiŋge wuggö nanyit, ama do ti den ko wukuŋdyö ya, kode wuköddu da, nyena gwon sona i ŋutu liŋ logon a yuŋwe ko Mulökötyo kilo.

⁹ A Nikodemo pije lepeŋ adi, Kine kulya gwon ada?

¹⁰ A Yesu waddi pija lepeŋ adi, Do a katodinönit lo Yisaraele, a do tine den kine kulya le?

¹¹ ’Diri ’diri nan takiŋdya do adi, yi jambu ŋo nagon yi deden, a tokoŋ ŋo nagon yi aje met, ama ta renya kulya na tokor yi kune.

¹² Ko nan jamakiŋdya ta kulya ti na kak ta ti yuŋ nan, a ta mo yupe ada ko nan jamakiŋdya ta kulya ti ki?

¹³ Lele ŋuto ’bayin logon aje tu ki tuŋ nye lo po kak ki yu lo, nye logon a nan Ŋuro lo ŋuto logon mede nio nu ki.

¹⁴ Nyena gwoso na ’bilikiŋdye Mose munu ki i yöbu nu, nan Ŋuro lo ŋuto agu ködyö mo ’bi ’biliki ki köti,

¹⁵ anyen ŋutu liŋ logon yuyuŋ nan kilo böŋö gwon ko ru na yeŋ nyin köyö i mugun.

¹⁶ Kogwon Ŋun nyanyar ŋutu ti na kak parik, nyena a nye tiŋdi Ŋuro lonyit pilili anyen ŋutu lio logon a yu-bbö lepeŋ kilo böŋö gwon ti twatwa, ama anyen gwon ko ru na yeŋ nyin.

¹⁷ Kogwon Ŋun a ko sunyun Ŋuro lonyit i na kak anyen ko ’duiŋgö putesi, ama anyen lwöggu ŋutu ti na kak.

¹⁸ Nye logon a yubbö ŋilo Ŋuro lo ti ’duŋöki putet; ama nye logon a ko yuŋ lo kulya kanyit aje ’beron ’duŋöki, kogwon nye a ko yubbö Ŋuro pilili lo Ŋun.

¹⁹ Nyena ’duŋet na putet gwon sona adi parara aje po i na kak, ama kölumbö a ŋutu nyaŋi mudwe lwölwöŋ parara, kogwon lepeŋat koŋdya Ŋo narok.

²⁰ Kogwon ŋutu liŋ lo koŋdya arabat kilo maman parara, a tine po i parara, an konesi kase narok ko dena;

²¹ ama ŋuto lo koŋdya to ’diri lo po i parara, anyen ŋutu deden adi Ŋun gwon ko lepeŋ i ŋo liŋ nagon nye kökon kine.

Yesu ko Yoane

²² A ko gwe sona, i mukök na kine kulya, a Yesu se ko ŋutu kanyit kajujumuk iti i jur lo Yudaya; a nye si ’dani nyu ko se i pirit na geleŋ babatiddya.

²³ A Yoane köti gwe i batiddya Ainon yu nyona ko Salim, kogwon pioŋ jore kata nyu; a ŋutu yeoe wörö i batisa;

²⁴ kogwon Yoane a ko nyuŋ tiki i kadi rereket.

²⁵ A kulye kajujumuk ti Yoane suluje rerenya ko lele Yudayakityo i kulya ti keri lalaet.

²⁶ a se iti ko Yoane yu, a takiŋdye lepeŋ adi, Katodinönit, ŋuto logon do gwon ko lepeŋ i nu pele na Yardene, logon do tökoŋu kulya kanyit lo, lepeŋ ŋilu babatiddya, a ŋutu liŋ wöröni ko lepeŋ yu.

²⁷ a Yoane waddi adi, ŋuto ti bulö wuju nene ŋo ake ko Ŋun a tikin lepeŋ.

²⁸ Ta ko ’börik bubulö tökoŋu adi nan a jambu adi, Nan ’bayin a Masia, ama nan aje sunyue ko lepeŋ ŋerot.

²⁹ Nye logon yemba nakwan lo a kayemanit; ju lo kayemanit logon gwogwo ’dan nyona i yiŋga na lepeŋ lo, lyölyöŋön parik na yiŋge nye gworo lo kayemanit nu. Nyena ŋina lyöŋön nio soŋinana aje jore.

³⁰ Lepeŋ ködyö totodumala ama nan ködyö toto ’dita.

Nye lo po ki lo

³¹ Nye lo po ki yu lo a duma parik lwölwöŋ ŋo liŋ. Nye logon a lo na kak lo a lo na kak, a jambi gwoso na jambi ŋutu ti na kak kulo. Nye lo po ki yu lo a duma lo ŋo liŋ.

³² Lepeŋ tökoŋu ŋo nagon nye aje met ko a yiŋ kune, ama a ŋuto gwe ’bayin lo ruggö ŋo na tokor nye kune.

³³ Ŋuto lo ruggö ŋo na tokor nye kune lo a tanyakiŋdya könin a kweyet adi Ŋun a lo to ’diri.

³⁴ Kogwon nye logon Ŋun aje son lo jambu kulyaesi ti Ŋun, kogwon Ŋun tiŋdu Mulökötyo abur ’bak temet.

³⁵ Ŋun Monye nya nyar ŋuro lonyit, a iŋge tikin ŋo lio kanyit i könin.

³⁶ Ŋuto logon yuyuŋ ŋilo Ŋuro gwon ko ru na yeŋ nyin; nye logon ti twö ŋilo Ŋuro mo ti met ru na yeŋ nyin, ama woran na Ŋun mo si ’da ko lepeŋ.Yesu ko Ŋuto na Samaria