Yoane 16 - Bibilia Buk na Ŋun nagon koti luŋu a

¹ Nan aje jamakin ta kine kulya anyen ta gwon ti kukutörö bot.

² Ŋutu mo rikun ta kaŋo i kadijik momoresi. ’Diri diŋit mo popo nagon ŋutu liŋ logon a tatuja ta kilo mo yeyeju adi se koŋdya kita na Ŋun.

³ Se mo kökon kine ŋo kogwon se a ko den Baba, koti se a ko den nan.

⁴ Ama nan aje takin ta kine kulya anyen ko diŋit nase aje po nagon koŋdi kine ŋo, a ta mo kuru kurun adi nan aje takin ta. Nan a ko tukökin ta kine kulya a kokwe, kogwon nan gwon ko ta i pirit na geleŋ.

Kita na Mulökötyo Loke

⁵ Ama soŋinana nan lu iti ko lepeŋ lo sunyuŋdyo nan lo yu, ama a lele losu gwe ’bayin lo pija nan adi, Do tu da?

⁶ Kölumbö a ta delyani delya parik kasu i töilyet kogwon nan aje jamakin ta kine kulya.

⁷ Nyenagon nan takiŋdya ta to ’diri adi, bia a na ’but kasu ko nan tutu, kogwon ko nan ti tu, a Kato golonit lo tine po kasu ni, ama ko nan a tu, a nan mo sunyuŋdye lepeŋ kasu ni.

⁸ Ko nye mo a po, a nye mo tokurukiŋdye ŋutu ti na kak adi se a lyaŋan i kulya ti toron, ko i kulya ti tugwakan, ko i kulya ti ’duŋgö na putet.

⁹ Adi, se a lyaŋan i kulya ti toron kogwon se a ko yuŋ nan;

¹⁰ se köti a lyaŋan i kulya ti tugwakan kogwon nan lo iti ko Baba yu, a ta mo tine met nan koti;

¹¹ adi, se a lyaŋan i kulya ti ’duŋgo na putet, kogwon matat lo na kak aje ’duŋöki putet.

¹² Nan nyuŋ gwon ko kulya jore nagon jamaki ta, ama se pömöni nagon ta ti jukin ’doggu se soŋinana;

¹³ ama ko Mulökotyo lo to ’diri a po a nye mo nyömöddi ta i to ’diri liŋ; kogwon nye mo ti jambu kulya kanyit ti mugun, ama a nye mo takiŋdye ta ŋo nagon nye a yiŋun, a mo tukökiŋdye ta kulya na popo.

¹⁴ A nye mo bu ’ye nan, kogwon nye mo ’dumuŋdya ŋo kwe a tokurukiŋdye ta se.

¹⁵ Ŋo liŋ nagon Baba gwon ko se kune a kwe; ŋina a kwe nagon nan a kulyari adi, Mulökötyo lo to ’diri mo ’dumuŋdya ŋo kwe a mo tokurukiŋdye ta se.

Delya nasu mo wora a lyöŋön

¹⁶ Yöŋgi diŋit a na ’dit ta mo ti met nan; köti diŋit a na ’dit a ta mo meddi nan.

¹⁷ A kulye ŋutu kanyit kajujumuk totopine ko ’börik adi, Lepeŋ kulya adi nyo, na kulyari nye koyi adi, Yöŋgi diŋit a na ’dit ta ti met nan; koti adi, Yöŋgi diŋit a na ’dit ta mo memet nan? Köti na kulyari nye adi, Nan lo iti ko Baba yu?

¹⁸ Nyena a se totopine adi, Na kulyari nye adi, Yöŋgi diŋit a na ’dit, lepeŋ kulya adi nyo? Yi ti den ko lepeŋ jambu kulya ti nyo.

¹⁹ A Yesu iŋge den adi lepeŋat ’de ’dekan pija nye, nyena a nye pije lepeŋat adi, Ta totopi ko ’börik le, i ŋo nagon nan a kulyari adi, Yoŋgi diŋit a na ’dit ta mo ti met nan; köti adi, Yöŋgi diŋit a na ’dit a ta mo meddi nan?

²⁰ ’Diri ’diri, nan takiŋdya ta adi ta mo gwigwien ko lulujö, ama a ŋutu ti kak ni mo lyöŋi lyöŋön; ta mo dedelya, ama a delya nasu mo worani a lyoŋön.

²¹ Ko ŋuto nakwan gwon i ta ’duuŋdyö, lepeŋ ŋoŋoŋga kogwon diŋit nanyit aje po, ama ko nye aje ta ’duuŋdyö lupudi, a nye böŋöni böŋö ŋoŋga nanyit a lyöŋi lyöŋön kogwon ŋuro lulalet aje yuŋwe kaŋo i na kak.

²² Ta köti dedelya soŋinana, ama nan mo memet ta koti, a töilyet kasu mo lyöŋi lyoŋön, a ŋutu gwe ’bayin lo ’dumaddu lyöŋön nasu.

²³ i ŋilu lor a ta mo tine pija nan ko kunie piesi. ’Diri ’diri, nan takiŋdya ta adi Baba mo titin ta ŋo liŋ nagon ta a piyun köyö i karin.

²⁴ Suluja ’beron tojo ko soŋinana ta a ko pija nene ŋo i karin kwe; pije ta, a ta de wune wu, anyen lyöŋön nasu böŋö jojore.

Yesu a te ’ya na kak

²⁵ Nan aje jamakin ta kine kulya i lilimon. Diŋit ŋina popo nagon nan mo tine jambu ko ta i lilimön köti, ama nan mo tutukökin ta köke i kulya ti Baba.

²⁶ I ŋilu lor ta mo pipi i karin kwe, a nan tine kulya ko ta adi nan mo momo ’yu Baba kogwon kulya kasu,

²⁷ kogwon Baba ko mugun nanyit nyanyar ta, kogwon ta nyanyar nan a iŋge yubbö adi nan po ko Ŋun yu.

²⁸ Nan po ko Baba yu, a nan poŋdi i na kak; soŋinana nan kokölökin na kak a köti yitöni ko Baba yu.

²⁹ A ŋutu kanyit kajujumuk kulo kulyani, ko lepeŋ adi, Mete, soŋinana do jambu köke, ’bayin i lilimön.

³⁰ Soŋinana yi dene den adi do deden ŋo liŋ, ’bulit ’bayin nagon ŋutu pije do; kogwon ŋina kwe yi a yuŋ adi do po ko Ŋun yu.

³¹ A Yesu pije lepeŋat adi, Ta soŋinana aje yuŋ le?

³² Mete ta, diŋit ŋina popo, ’diri aje ’dur, nagon ta mo totoreki, ta liŋ geleŋ geleŋ tu kasu i midijik, a ta mo kö ’yi nan geleŋ; ama nan ti gwon geleŋ, kogwon Baba gwon ko nan.

³³ Nan aje jamakin ta kine kulya anyen ta boŋö gwon ko taliŋ köyö i mugun. I na kak ta gwon i diŋit ŋoŋet. Ama togo ’yi ta töilyet, kogwon nan aje te ’ya na kak.