Yoane 15 - Bibilia Buk na Ŋun nagon koti luŋu a

Yesu a ködini lo binyo gwak

¹ Nan logon a ködini lo binyo gwak, a Baba gwe a kametanit lo ŋilo ködini.

² Lepeŋ totokoro kaŋo kenia kwe liŋ nagon a ko radan ludweki, a nye ’duŋge i kune kenia liŋ nagon raradan ludweki anyen kunie kenia na wilun nagon raradan ludweki jore.

³ Kulyaesi kwe logon nan aje jamakin ta kilo aje toke ’ya ta a ta gwe a loke.

⁴ Gwe ta köyö i mugun, gwoso na gwoŋdi nan kasu i mugunya na. Kene ti bulö radan ludweki ko mugun nanyit ka ’de ko a ko gwon i ködini monye lo, nyena ta köti ti radan ludweki ko ta a ko gwon köyö i mugun.

⁵ Nan logon a ködini lo binyo, a ta gwe a kenia. ŋuto lo gwon köyö i mugun gwoso na gwoŋdi nan ko lepeŋ i mugun na, lepeŋ raradan ludweki jore, ama ko ta ti gwon köyö i mugun a ta tine bulö koŋdya nene ŋo.

⁶ Ŋuto logon ti gwon köyö i mugun lo gugubaji kaŋo gwoso kene, a teteyone teteyon. A kine kenia ’du ’dumani ’du’duma, a gubani i kimaŋ, a noke nakan.

⁷ Ko ta gwon köyö i mugun a kulyaesi kwe gwe kasu i mugunya, nyena a ta bulöni bulö piyuŋdya ŋo nagon ta ’de ’dekan, a ta mo wune wu se.

⁸ Baba bubula ko ta raradan ludweki jore; a i ŋina a ta gwe a ŋutu kwe kajujumuk.

⁹ Nan aje nyar ta gwoso nagon Baba nyaŋi nan na. Gwe ta köyö i nyaret.

¹⁰ Ta mo gwon köyö i nyaret ko ta ’de ’dep saresi kwe, gwoso na ’debbi nan saresi ti Baba na a nan gwe kanyit i nyaret.

¹¹ Nan aje jamakin ta kine kulya anyen lyöŋön nio böŋö gwon kasu i mugunya, ko anyen lyöŋön nasu böŋö jojore.

¹² Lo a saret liŋ adi, Tunyare ta tunyar ko ’börik gwoso na nyaŋi nan ta na.

¹³ Nyaŋu duma ’bayin ko lele ŋuto lwölwöŋ na, adi ŋuto a pakiŋdya mugun i tatua kogwon julin kanyit.

¹⁴ Ta a julin kwe ko ta kökon ŋo nagon nan a sarakin ta kune.

¹⁵ Nan köti tine luŋ ta a ’dupi, kogwon ’dupiet ti den ŋo nagon duma lonyit kökon; kölumbö nan luŋgu ta a julin kogwon nan aje kwekin ta ŋo liŋ nagon nan a yiŋun ko Baba kune.

¹⁶ Ta a ko wulun nan, ama nan aje wulun ta ko a gelun ta anyen ta puputuru ŋerot i radan na ludweki. Kilo ludweki kasu ködyö yeyeŋon. A kirut Baba mo tiŋdi ta ŋo liŋ nagon ta a piyun köyö i karin kune.

¹⁷ Ŋilo a saret liŋ logon nan sarakin ta adi, Tunyare ta tunyar ko ’börik.

ŋutu ti kak a kamanak

¹⁸ Ko ŋutu ti kak ni maman ta, dene ta den adi se aje man nan a kokwe nagon se a ko nyuŋ maŋdi ta na.

¹⁹ Ko ta ködyö a ti na kak, a kak na ködyö nyanyar kanyit. Ta ’bayin a ti na kak kogwon nan aje wulun ta kaŋo i na kak, nyena ko ŋina kwe a kak na mane man ta.

²⁰ Yeyene ta ŋilo kulyaet logon nan aje jamakin ta ŋilo, adi, ’Dupiet ti lwöŋ duma lonyit. Ko se a sasaŋdu nan, a se mo sasaŋdi ta köti; ko se a ’dep kulyaesi kwe, a se mo ’depe ’dep kulyaesi kasu köti.

²¹ Se mo kokonakin ta kine ŋo liŋ kogwon kulya ti karin kwe, kogwon lepeŋat ti den lepeŋ lo sunyuŋdyö nan lo.

²² Ko nan ködyö a ko po i jambu ko se, ase ködyö gwe ’bak toron; ama soŋinana lepeŋat ti bulö ’buruddu ’börik kaŋo kase i toronjin.

²³ Ŋuto logon maman nan lo köti maman Baba.

²⁴ Ko nan ködyö a ko koŋdya kitajin kase kiden nagon lele ŋuto ti bulö koŋdya kune, a se ködyö gwe ’bak toron; ama soŋinana lepeŋat aje met ko aje man nan se ko Baba.

²⁵ a ŋina gwe sona anyen kulya na wuro kase i Saresi kune böŋö kokona, adi, Lepeŋat aje man nan ’bak kwe na kulya.

²⁶ Ama Kato golonit popo logon nan mo susunyukin ta ko Baba yu lo. Ŋilo Kato golonit a Mulökötyo lo to ’diri logon po ko Baba yu, a ko nye aje po a nye mo tokoŋ kulya kwe.

²⁷ a ta köti tokoŋ kulya kwe kogwon ta aje gwon ko nan i pirit na geleŋ suluja i suluet.