Yoane 13 - Bibilia Buk na Ŋun nagon koti luŋu a

Yesu a lalaju mokosi ti ŋutu kanyit kajujumuk

¹ Nyena a diŋit na rorwe lo Pasaka gwe a ko nyuŋ po. A Yesu iŋge den adi diŋit nanyit aje jo anyen nye wuwuddye i na kak i tu ko Monye yu. Lepeŋ nyanyar ŋutu kanyit lo gwon kak ni kulo, a nye nyaŋi se parik tojo ko ’dutet.

² A kaŋöönit aje ’beron tiŋdu yeyeet naron ko Yuda i töili ŋuro lo Simona Isikariota anyen tiŋdu Yesu i tatua. A na gwoŋdi se i nyesu nu,

³ a Yesu iŋge den adi Monye aje tin ŋo liŋ kanyit i könin, ko adi nye po ko Ŋun yu, ko köti a yitöni ko Ŋun yu,

⁴ a nye ŋine ki i nyesu, a rusuŋdye boŋgwat kanyit kune kaŋo, a ’dumuŋdye boŋgo toliliket, a pitakiŋdye kanyit i mukök;

⁵ a kirut nye ’bukökiŋdye pioŋ i saani a suluje lalaju mokosi ti ŋutu kanyit kajujumuk kulo, a seji se ko boŋgo toliliket na pitakin nye kanyit i mukök na.

⁶ A nye ko ’dure ko Simona Petero, a Petero pije lepeŋ adi, MATAT, do lo lalaju mokosi kwe?

⁷ A Yesu waddi lepeŋ adi, Do ti den ŋo na kon nan soŋinana na, ama do mo kukurun i mukök.

⁸ A Petero kulyani ko lepeŋ adi, Do de ti lala mokosi kwe kwöŋ! A Yesu waddi adi, Ko nan ti lala do a do tine parundya kulya kwe.

⁹ A Simona Petero kulyani ko lepeŋ adi, MATAT, an do ko lalaju mokosi kwe ka ’de, ama köti lalane könisi kwe se ko kwe nio.

¹⁰ a Yesu kulyani ko lepeŋ adi, Ŋuto logon aje kwö lo, mugun nanyit liŋ gwe a nake, a tine ’dekan lalaju köti ake lalaju mokosi; ta a loke, ama ti gwon a ta liŋ.

¹¹ Lepeŋ kulya adi, Ta liŋ ti gwon a loke, kogwon lepeŋ aje den ŋuto lo tiŋdu lepeŋ i tatua lo.

¹² A nagon nye aje jo lalaju mokosi kase nu, a nye jupukiŋdye boŋgwat kanyit kune köti, a si ’dakine kak, a nye pije se adi, Ta ŋona kukurun ŋo nagon nan aje konakin ta kine le?

¹³ Ta luŋgu nan a Katodinönit ko a MATAT, nyena ŋo na jam ta kine a gwak kogwon nan a nye.

¹⁴ A ko nan logon a MATAT ko a Katodinönit losu aje lalaju mokosi kasu, nyena ta ködyö köti tutulala mokosi kasu.

¹⁵ Kogwon nan aje kwekin ta miret, anyen ta ködyö mirakiŋdya ŋo nagon nan a konakiŋdya ta kune.

¹⁶ ’Diri ’diri nan takiŋdya ta adi, ’dupiet ti lwöŋ duma lonyit, a ŋuto lo sunyue lo tine lwöŋ ŋuto lo sunyuŋdyö lepeŋ lo.

¹⁷ Ko ta deden kine kulya ta a kalyöŋök ko ta kökon se.

¹⁸ Nan ti jambu i kulya kasu liŋ. Nan deden ŋutu logon nan aje wulun kilo; ama kulya ti Ŋun na wurö kine ködyö kokona nagon kulya adi, Ŋuto logon nyesu kinyo liŋ lo a ’bi ’yu moköt ki a gwoji nan.

¹⁹ Nan tukökiŋdyö ta kine kulya soŋinana a kokwe nagon a ko nyuŋ pokin nu, anye ko aje pokin a ta böŋö yubbe adi nan a nye.

²⁰ ’Diri ’diri nan takiŋdya ta adi, nye lo wuju ŋuto logon nan a son lo wuju nan, a ko ŋa lo wuju nan lepeŋ wuju nye lo sunyuŋdyö nan lo.

Yesu tuggö adi nye mo titiki i tatua

²¹ A nagon Yesu aje kulya sona nu, a nye delyani delya parik kanyit i töili, a tokoŋ adi, ’Diri ’diri nan takiŋdya ta adi, lele losu mo titin nan i tatua.

²² a ŋutu kanyit kajujumuk totoboŋe ko ’börik dyadya ’yu ko nye jambu ko kulya ti ŋa.

²³ A lele lo ŋutu kanyit kajujumuk logon Yesu nyanyar lo, gwe ko Yesu i merete.

²⁴ a Simona Petero kwetuŋdye lepeŋ, a kulyani adi, Pine lepeŋ ko nye jambu i kulya ti ŋa.

²⁵ A ŋilo kajujumunit tökökiŋdye mugun ko Yesu i kido, a pije adi, MATAT, ŋuto lo a ŋa?

²⁶ A Yesu waddi adi, Ŋuto logon nan de nyelakiŋdya ŋina ambata a ŋutukiŋdye lepeŋ lo, nye ŋilo ŋuto ŋilo. A nye ko nyelakiŋdye ambata na, a ŋutukiŋdye Yuda ŋuro lo Simona Isikariota.

²⁷ A i mukök na ŋutukiŋdye nye Yuda ambata na, a Satani lupöni ko Yuda i töili. A Yesu takiŋdye lepeŋ adi, Koŋdi ŋo nagon do kökon na ’de ’de.

²⁸ A ŋuto gwe ’bayin i se logon gwon i nyesu kulo, logon a kurun ko Yesu jambu kine kulya sona ko lepeŋ ko kwe na nyo.

²⁹ Kulye yeyeju adi kogwon Yuda ’debba jurak lo gurut, kode ŋona Yesu takiŋdya lepeŋ anyen tu i gwöruŋdyö na ŋo nagon se ’de ’dekan a ti rorwe, kode adi ti lepeŋ ’doggi lomerika.

³⁰ A nagon Yuda aje wuju ambata na nyelaki na, a nye iti kaŋo ’de ’de. A kak gwe a tukwaje.

Saret ludukötyo

³¹ A nagon Yuda aje tu kaŋo nu, a Yesu kulyani adi, Soŋinana nan Ŋuro lo ŋuto bubula, a Ŋun bulani köyö i mugun.

³² A ko Ŋun bula köyö i mugun, a Ŋun köti mo titin nan i bula gwoso na bulari nye.na, a nye mo tiŋdi nan i bula ’de ’de.

³³ Ŋwajik kwe, nan yöŋgi diŋit a na ’dit i si ’da ko ta. Ta mo gaga nan, nyena, soŋinana nan takiŋdya ta gwoso na takiŋdye nan Yudayaki köju nu adi, Pirit na tiri nan kata nu ta ti ’dur kata.

³⁴ Nan lo tiŋdu ta saret ludukötyo adi, tunyare ta tunyar ko ’börik. Tunyare ta tunyar gwoso na nyaŋi nan ta na.

³⁵ Ko ŋina kwe a ŋutu liŋ mo dene den adi ta a ŋutu kwe kajujumuk ko ta tutunyar ko ’börik.

Yesu tuggö adi Petero mo rerenya nye

³⁶ A Simona Petero pije lepeŋ adi, MATAT, do tu da? A Yesu waddi adi, Do ti bulö moraddu ko nan soŋinana i pirit nagon nan tu kata nu, ama do mo keporo nan i mukök.

³⁷ A Petero pije lepeŋ adi, MATAT, nyo nan ti bulö moraddu ko do soŋinana? Nan mo pakiŋdya muguni tatua kogwon kulya kunök.

³⁸ A Yesu nyobbi pija adi, Do ’diri mo pakiŋdya mugun i tatua kogwon kulya kwe le? ’Diri ’diri nan takiŋdya do adi, a kokwe nagon sukuri a ko nyuŋ sira nu, do mo rerenya nan daŋin musala adi do a ko den nan.