Yoane 12 - Bibilia Buk na Ŋun nagon koti luŋu a

Maria a we ’ya mokosi ti Yesu Betania yu

¹ A i perok buker i ŋerot na rorwe lo Pasaka, a Yesu iti Betania i pirit na gwoŋdi Lajaro nu. ŋilo a Lajaro logon nye aje tuŋaun i twan lu.

² A se derakiŋdye lepeŋ kinyo na tokotyaŋ nyu, a Marata na ’yi ’ye; ama a Lajaro si ’dani i nyesu ko Yesu i pirit na geleŋ se ko kulye ŋutu.

³ Nyena a Maria joŋdi rotolo geleŋ lo welet nake na mon ’bura nagon gwörö go, na luŋu a narada, a we ’yi mokosi ti Yesu a seji se ko kupir kanyit ti kwe. A kadi liŋ iŋge tikwe ko mon na welet.

⁴ Ama a Yuda Isikariota logon a lele lo ŋutu kanyit kajujumuk, logon ködyö tiŋdu lepeŋ i tatua lo, pije adi,

⁵ Nyo ŋina welet ködyö ti gwöröji ko gurut alipan musala, a kine gurut korakine lomerika?

⁶ Lepeŋ jambu sona ti gwon kogwon lepeŋ mi lomerika, ama kogwon lepeŋ a kolanit, a lepeŋ yeyeggi jurak lo gurut a ’dumakiŋdye mugun i ŋo nagon a tiki kata kune.

⁷ A Yesu kulyani adi, Kölöki ta na ŋuto; ti lepeŋ ’dele ’de tojo ko lor lo nukari nan;

⁸ kogwon ta ŋupi si ’da ko ŋutu lomerika, ama nan mo ti si ’da ko ta ŋupi.

Ŋutu ga ’yu mwön ko Lajaro

⁹ A ŋutu jore parik ti Yudayaki ko yiŋge adi Yesu lu yu, a se iti i meddya na lepeŋ; ama ti gwon a lepeŋ ka ’de, ama i meddya na Lajaro köti logon lepeŋ aje tuŋaun i twan lo.

¹⁰ Nyena a kiŋanejin temejik teteŋdi mwön ko Lajaro köti,

¹¹ kogwon Yudayaki jore aje kö ’yu se i kulya ti lepeŋ a se yubbe Yesu.

Yesu a lupö Yerusalema ko todumalan

¹² A kotumalu lodir duma lo ŋutu logon aje po i rorwe kulo ko yiŋge adi Yesu lo po Yerusalema,

¹³ a se gögöŋdi kenia ti kiat a iti i dodogga na lepeŋ. A se yeŋe woŋoro ki adi, Osana! Ŋuto lo po i karin ti MATAT lo ti ’boriani ’boria! Ti Mor lo Yisaraele ’boriani ’boria!

¹⁴ A Yesu ryeji kaine kolojityo, a kije a si ’dakine i loki nanyit, gwoso na wuröri adi,

¹⁵ Köji na Siona, ko kujönö, mete ta, Mor losu ŋilo popo kasu ni, si ’da ’e i kaine kolojityo.

¹⁶ A i ŋinu diŋit a ŋutu kanyit kajujumuk kulo tine kurun kine kulya, ama i mukök nagon Yesu aje bula a se kuru kurun adi kine kulya köju a wurö i kulya ti lepeŋ ko adi aje konaki lepeŋ.

¹⁷ A ŋutu logon gwon ko lepeŋ i pirit na geleŋ kulo, na lupundye nye Lajaro kaŋo i gulöm a tuŋauŋdye lepeŋ i twan nu, tokoŋ ŋo nagon se aje met kune.

¹⁸ Nye ŋina kwe nagon lodir lo ŋutu tu i dodogga na lepeŋ kogwon se aje yiŋ adi lepeŋ aje koŋdya ŋina kweyet.

¹⁹ A Parusijin totopine ko ’börik adi, Ta a met, ’bulit a nyo? Yi ti koŋdya nene ŋo. Mete ta, ŋutu ti kak ’bukuluŋ kekebbi lepeŋ.

Kulye Giriki ga ’yu meddya Yesu

²⁰ A kulye ŋutu ti Giriki gwe kata nyu i kiden na ŋutu lo tu Yerusalema i kwakwaddu i diŋit na rorwe.

²¹ Nyena a kulo ŋutu poŋdi ko Pilipo ni logon a lo Betesaida na Galilaya, a kulyani adi, Pon duma, yi ködyö ’de ’dekan meddya Yesu.

²² A Pilipo iti a takiŋdye Andarea, a se murek iti i takiŋdya na Yesu.

²³ A Yesu waddi se adi, Diŋit aje ’dur nagon bulari nan Ŋuro lo ŋuto.

²⁴ ’Diri ’diri nan takiŋdya ta adi, Ko koŋe lo ’buluti ködyö a ko ’doro kak i kujoŋ a twane twan, a nye ködyo yeŋe geleŋ sonu, ama ko a twan, a lepeŋ tore toran ’bolot jore.

²⁵ Ŋuto lo nyaŋu ru nanyit lo mo totolikin ru nanyit, ama ko ŋa lo maŋdu ru nanyit i na kak, lepeŋ mo ’de ’dep tojo ko ru na yeŋ nyin.

²⁶ Ko lele ŋuto ’de ’dekan kitakiŋdya nan ti lepeŋ agu ködyo kebbi nan, a i pirit na gwoŋdi nan kata nu a kölipönit liŋ koti mo gwe nyu. Ko lele ŋuto kitakiŋdya nan, a Baba mo bu ’ye lepeŋ.

Yesu jambu kulya ti twan nanyit

²⁷ Soŋinana töili liŋ dedelya, a nan kulyani nyo? Ti nan kulyani adi, Baba lwöki nan i na diŋit? ’Bayin, ama nan a ’durökin ko ŋina kwe i na diŋit anyen nan ŋoŋoŋga.

²⁸ Baba, tiki karin kunök i bula. A gworo lo kuu ki yu adi, Nan aje tin karin kunök i bula, a nan mo köti tiŋdi i bula.

²⁹ a lodir lo ŋutu lo gwogwo ’dan nyona kulo ko yiŋge, a kulyani adi ŋilo a kipya lo ki lo woŋon. A kulye kulyani adi, Malaikatat a jambu ko lepeŋ.

³⁰ a Yesu waddi se adi, Ŋilo gworo ti jambu ko kulya kwe, ama ko kulya kasu.

³¹ Soŋinana na gwe a diŋit ’duŋet na kulya ti ŋutu ti na kak; soŋinana matat lo na kak mo gubaji kaŋo.

³² A ko nan mo a ’biliki ki i na kak, a nan mo pikuŋdye ŋutu liŋ köyö ni.

³³ Lepeŋ jambu kine kulya kweja adi ko nye mo twan ada.

³⁴ A lodir lo ŋutu waddi lepeŋ adi, Yi aje yiŋ i Saresi ti Mose adi, Masia yeyeŋon ŋupi. Nyo do jambu adi, Ŋuro lo ŋuto agu ködyö ’bi ’biliki ki? Ŋilo Ŋuro lo ŋuto a ŋa?

³⁵ A Yesu waddi se adi, Parara yöŋgi diŋit a na ’dit kasu kiden. Wöröni ta na gwoŋdi ta nyuŋ ko parara na, anyen ta gwon ti ’bunyöki ko mudwe. Ŋuto lo wörö i mudwe lo ti den ko nye tu da.

³⁶ Na gwoŋdi ta nyuŋ ko parara na, yubbe ta parara, anyen ta böŋo gwon a ŋutu ti parara. A i mukök nagon Yesu aje jambu kilo kulyaesi nu, a nye wuddye wuddya kase kiden, a ’de ’deleji mugun.

Yudayaki ’bak yupet

³⁷ Ma ’di ködyö nagon lepeŋ aje koŋdya kweyesi jore kase i komor a se tine yuŋ lepeŋ,

³⁸ anyen kulyaesi ti nebi Yisaya böŋö kokona logon lepeŋ köju a jam kulu adi, MATAT, ŋa logon a yuŋ lore logon yi a tuk lo? a Riŋit na MATAT aje kweki ŋa?

³⁹ Nyena ko ŋina kwe a se tine yubbö kogwon Yisaya köti a kulya adi,

⁴⁰ Ŋun aje tomo ’dokeju konyen kase, a tiŋdi töilyet kase i gwon pomöni. Ko ködyö nye a ko koŋdya sona lepeŋat ködyö memet ko konyen kase, a kuru kurun ko töilyet kase, a löpukuŋdye kanyit ni a nye ködyö toke ’yi se.

⁴¹ Yisaya köju jambu kine kulya kogwon lepeŋ a met minyo lonyit, a jambi kulya ti lepeŋ.

⁴² Ma ’di sona ŋutu temejik jore a yubbö lepeŋ, ama kogwon kulya ti Parusijin a se gwe a ko pukun köke kogwon se kukujönö, an se ko rikwe kaŋo i kadi momoret;

⁴³ kogwon se nyanyar bula ko ŋutu lwölwöŋ bula ko Ŋun.

Kulyaesi lo jam Yesu kulo mo lo ’duggö kulya ti ŋutu

⁴⁴ A Yesu kulyajine ki adi, Ŋuto lo yubbö nan lo ti yubbö nan ka ’de, ama lepeŋ yubbö nye lo sunyuŋdyö nan lo.

⁴⁵ Ŋuto lo meddya nan lo meddya nye lo sunyuŋdyö nan lo.

⁴⁶ Nan aje po i na kak a parara, anyen ŋutu liŋ logon a yubbö nan kilo böŋö gwon ti si ’da i mudwe.

⁴⁷ Ko lele ŋuto a yiŋ kulyaesi kwe a tine ’dep se, nan ti ’duŋökin kulya ti lepeŋ; kogwon nan a ko po i ’duŋgö na kulya ti ŋutu ti na kak ama i lwöggu na se.

⁴⁸ ŋuto lo renya nan a tine ’dep kulyaesi kwe lo, ka ’duŋönit kata lo ’duŋgö kulya kanyit. Kulyaet lo kulyari nan lo mo lo ’duŋgö kulya kanyit i lor ’dutet;

⁴⁹ kogwon nan ti jambu kulya kwe, ama Baba lo sunyuŋdyö nan lo, lepeŋ ko mugun nanyit aje sarakin nan ko nan ködyö kulya nyo kode jambu nyo.

⁵⁰ Nan deden adi saresi kanyit a ru na yeŋ nyin. Nyenagon ŋo nagon Baba aje jamakin nan kune, nan jambu se.