Yoane 10 - Bibilia Buk na Ŋun nagon koti luŋu a

Lilim lo goro lo yidin

¹ ’Diri ’diri nan takiŋdya ta adi, Ŋuto logon ti lupöri kötumit na goro lo yidin, ama a kije lukata i nene pirit lo, lepeŋ a kolanit ko a karyakanit;

² ama nye lo lupöri kötumit lo a kayukunit lo yidin.

³ Katiyunit lo kötumit ŋaŋakin lepeŋ kötumit, a yidin yiŋge gworo lonyit; a nye luŋgi yidin kanyit kune ko karin, a nye meyaddi se kaŋo.

⁴ A nagon lepeŋ aje meyuŋdya se liŋ kaŋo nu, a nye iti kase ŋerot, a yidin kebbi lepeŋ kogwon se deden gworo lonyit.

⁵ A se tine kepoddu ŋuto logon a lepetyo, ama a se wöki wökön kaŋo ko lepeŋ kogwon se ti den gworolo ti ŋutu lepelok.

⁶ Ŋilo lilim Yesu aje jamakin lepeŋat, ama a se tine kurun ŋo nagon lepeŋ jamakin se kune.

Yesu a kayukunit lo ’but

⁷ Nyena a Yesu köti jamakiŋdye lepeŋat adi, ’Diri ’diri nan takiŋdya ta adi, Nan a kötumit na yidin.

⁸ ŋutu liŋ lo po köyö ŋerot köju kulu a kolak ko a karyakak, ama a yidin gwe a ko yiŋ se.

⁹ Nan a kötumit; ko lele ŋuto lupöri köyö ni a lepeŋ mo lwököni lwökö, lepeŋ mo lulupö lukata ko tutu kaŋo a mo ryeji pirit nyeŋ.

¹⁰ Kolanit po tuŋ i koko ’ya, ko i tatuja, ko i tukaŋu. Nan aje po anyen lepeŋat böŋö gwon ko ru, ko anyen wuju abur.

¹¹ Nan a kayukunit lo ’but. Kayukunit lo ’but pakiŋdya ru nanyit kogwon yidin kanyit.

¹² ŋuto lo gwogwöröki i kita, logon ’bayin a monye yidin a yidin tine gwon a kanyit lo, ko meddi lujinte i po, a nye kö ’yi yidin kune, a wöki wökön, a kirut lujinte jekaddi nene a torekiŋdye se.

¹³ A ŋuto lo wöki wökön kogwon lepeŋ gwögworöki i kita a tine yeye yidin kune.

¹⁴ Nan a kayukunit lo ’but; nan deden yidin kwe, a yidin kwe deŋdi nan,

¹⁵ gwoso nagon Baba deden nan na, nan deden Baba; a nan pakiŋdye ru nio kogwon yidin.

¹⁶ Kunie yidin kwe kata nagon ’bayin a ti lo goro. Nan ködyö jojon se köti, a se mo yiŋge gworo liŋ, a se mo gwe a teŋ geleŋ ko kayukunit geleŋ.

¹⁷ Baba nyanyar nan kogwon nan pakiŋdya ru nio anyen nan böŋö nyökuŋdyö nye.

¹⁸ Lele ŋuto ’bayin lo ’dumaddu ru nio köyö, ama nan pakiŋdya ru nio gwoso nagon nan a wakun. Nan gwon ko kido nagon nan paji ru nio, a köti gwe ko kido anyen nyökuŋdyö nye. Ŋina a ŋo nagon Baba aje sarakin nan i koŋdya.

¹⁹ Köti a Yudayaki koŋi koŋa kogwon kilo kulyaesi lo jam nye kilo.

²⁰ A jore kase kulyani adi, Lepeŋ ko mulökötyo loron, lepeŋ a mamala. Nyo ta yiyiŋ lepeŋ?

²¹ Ama a kulye kulyani adi, Ŋuto lo gwon ko mulökötyo loron ti bulö jambu gwoso ŋilo. Mulökötyo loron ŋona bubulö ŋaju konyen ti ŋutu logon a mo ’dokeno?

Yudayaki a renya Yesu

²² A i ŋinu diŋit a rorwe Yaŋanet iŋge kona Yerusalema. I nu diŋit kak lilik,

²³ a Yesu wöröni i Kadi na ŋun kata ko Solomona i baraŋöa.

²⁴ a Yudayaki dumökiŋdye lepeŋ kiden, a pije lepeŋ adi, Diŋit ŋornan nagon do möggi yi? Taki yi köke ko do a Masia.

²⁵ A Yesu waddi lepeŋat adi, Nan aje takin ta, ama a ta tine yubbö. Kitajin nagon nan kökon i karin ti Baba kune se na tökoŋu kulya kwe;

²⁶ ama a ta gwe a ko yuŋ kogwon ta ’bayin a yidin ti teŋ nio.

²⁷ Yidin kwe yiyiŋ gworo liŋ; nan deden se a se kebbi nan.

²⁸ a nan tiŋdi se ru na yeŋ nyin, a se tine twatwa kwöŋ; a lele ŋuto gwe ’bayin lo jekaddu se köyö i könin.

²⁹ Baba lo tiŋdu nan se lo a duma lwölwöŋ ŋo liŋ, a lele ŋuto gwe ’bayin lo jekaddu se ko Baba i könin.

³⁰ Yi ko Baba a ŋo geleŋ.

³¹ A Yudayaki köti ’du ’dumbe ŋurupö anyen gumbe lepeŋ.

³² a Yesu kulyani ko lepeŋat adi, Nan a kwekiŋdya ta kitajin jore na ’but nagon po ko Baba, ta gumba nan kogwon nan nase?

³³ A Yudayaki waddi lepeŋ adi, Yi ti gumba do kogwon nene ŋo na ’but nagon do a kon, ama yi gumba do kogwon do a lauŋdya Ŋun; kweja adi do logon a ŋuto kana kon mugun a Ŋun.

³⁴ A Yesu pije lepeŋat adi, A wurö kasu i Saresi adi, Ŋun lo kulya adi, Ta a ŋunyen. Ti gwon sona le?

³⁵ Ŋun luŋgu se a ŋunyen logon kulyaet lonyit a jamaki se kulo, a kulya kanyit na wurö kune tine yoŋaki a swöt.

³⁶ Nyena ko nyo ta kulya ko nan logon Ŋun Monye a gelun a iŋge sunyun i na kak lo, adi nan lauŋdya Ŋun kogwon nan a kulya adi nan a Ŋuro lo Ŋun?

³⁷ Nyena ko nan ti koŋdya kitajin ti Baba an ta ko yuŋ ta nan;

³⁸ ama ko nan kökon se, ma ’di ködyö ta ti yuŋ nan yubbe ta kitajin na kon nan kune, anyen ta ködyö gwugwulu ko deden adi Baba gwon ko nan, a nan gwe ko Baba i mugun.

³⁹ Köti a se ga ’yi morga lepeŋ; ama a nye iŋge pesaddu kaŋo kase i könisi.

⁴⁰ A nye köti yitöni i nu pele na Yardene, i pirit nagon Yöaŋe koju babatiddye nu. A nye mönuŋdye nyu,

⁴¹ a ŋutu jore iŋge tu ko lepeŋ nyu. A se kulyani adi, Yoane ’diri a ko koŋdya kweyesi. ama ŋo liŋ nagon lepeŋ a kulyari i kulya ti lo ŋuto kune a gwak.

⁴² a ŋutu jore iŋge yubbö lepeŋ nyu.