Yakobo 4 - Bibilia Buk na Ŋun nagon koti luŋu a

Ŋutu logon nyanyar na kak kilo a merok ti Ŋun

¹ Nyo na tiŋdu mörö se ko rerenyesi kasu kiden? Ti gwon a ’dekesi ti go ti na kak nagon momoro kasu i mugunya kine le?

² Ta ’de ’dekan go ama ta ti ryö se, nyena a ta poki i tatuja na ŋutu. Ta bebe ’ya go ama ta ti wu se; nyena a ta poki i rerenya, a möröni mörö. Ta ’bak go nagon ta ’de ’dekan kune kogwon ta a ko mulun se ko Ŋun yu.

³ Ta a mo ’yu a ta gwe a ko wu, kogwon ta a mo ’yu arabat. Ta a piyuŋdya kine go anyen tulyoŋgu ’dekesi kasu.

⁴ Ta ti jukin yiniki kogwon ta gwon gwoso wate nagon nyanyar kulye lyan. Ta a ko den le adi ŋutu logon nyanyar na kak kilo a merok ti Gun? Nyena ko ŋutu logon a ju lo na kak lepeŋ koŋdya mugun a miriku lo Ŋun.

⁵ Ta gona yeyeju adi kulya ti Ŋun na wuro kune tuggo go kana le, na jambu adi, Ŋun yiyino parik adi ti kodudwolon nagon nye a tiŋdu kayaŋ i mugunya kune nyare nyar lepeŋ ka ’de?

⁶ Ama nye a ka ’buse bia parik lwölwöggu; kogwon a wuro adi, ŋun rerenya ŋutu kabulak ti kusik, ama kölumbö kwekiŋdya ’busan i ŋutu lokoyokak.

⁷ Nyenagon kuŋge ta ŋun. Gwo ’de ta go i moro ko ŋilo kaŋöönit, a nye mo wöki kaŋo kasu i komor.

⁸ Miju ta nyona ko Ŋun ni, a lepeŋ mo miju kasu nyona. Ta katoronyak, lalane ta lala konisi kasu. Ta ŋutu logon ko yeyeesi murek murek, tokele ta toke toilyet kasu.

⁹ Wanyani ta, ko delyani ta, ko gwine ta. Ti kweni nasu lopuŋge a delya, ko ti lyöŋön nasu lopuŋge a mudwe.

¹⁰ To ’diddye ta ’börik ko Matat i komor a nye mo toduma ’yi ta.

Ko jambu kulya ti luŋösur lo yubbö arabat

¹¹ Luŋasirik, ko jambu ta ’borik arabat. Kogwon ŋutu logon jambu arabat i kulya ti luŋaser lo kudyakan lepeŋ jambu arabat i kulya ti Saresi, a ko ŋuto ’duŋökiŋdyo luŋaser arabat kudyakan lepeŋ ’duŋökiŋdyö Saresi arabat. Ama ko do ’duŋökiŋdyö Saresi arabat, do ’bayin a kakonanit lo Saresi ama do a ka ’duŋönit lo putesi.

¹² Katinunit lo Saresi ko a ka ’duŋonit lo putesi kata geleŋ, kweja adi ŋilo a nye logon bubulö lwöggu ko bubulö tukaŋu lo. Nyena do a ga logon ’duŋgö putet lo marate ilot?

An do ko bu ’ya mugun

¹³ Nyena yiŋge ta nan, ta lo kulya adi, I lo lor kode ko ’bure yi mo tu i nu köji, a yi mo gwolore nyu kiŋa geleŋ tutujaŋu i ga ’yu na gurut.

¹⁴ Ama ta ti den kulya ti ko ’bure ko kak waran ada. Ru nasu a nyo? Ta gwon gwoso luru logon meta diŋit a na ’dit a lilikara lilikara.

¹⁵ Kolumbö ta kodyö kulya adi, Ko Matat ’de ’dekan a yi mo yeŋe gwon jorun, a yi mo koŋdi na go kode nu go.

¹⁶ Ama kudyakan ta a kabulak ti kusik, ko a kapupurak ti ’borik. Pupuresi ti mugun liŋ gwoso kine a narok.

¹⁷ Nyena ko ŋutu logon a den go na ’but nagon kodyo kokona ama a gwe a ko kon lo, lepeŋ a katoronyanit.