Tolupesi 7 - Bibilia Buk na Ŋun nagon koti luŋu a

Kalupe a kalulukanit na ŋutu

¹ Ŋuro lio, ’debbi kulyaesi kwe, ’delaki saresi kwe konut i töili.

² ’Debbi saresi kwe ko do yöŋö gwon jörun; tiji todinesi kwe gwoso kiden na koŋe ilot.

³ Dukuki se konut i morin, wuröki se konut i töili.

⁴ Kulyani ko Koŋon adi, Do a kiaser nio, luŋgi Kurundyo na kulya a ju inot nyaratti;

⁵ anyen se lwöggu do i kalupe nagon a nakwan na leŋe ko a kalulukanit.

⁶ Nan a ku ’dilundyö kaŋo i kwiliset na kulupit na kadi nio,

⁷ a nan iŋge meddya i kiden na ŋwajik logon yeyeesi kase a namunyak, a nan iŋge kurun titinti logon ’bak denesi i kiden na kilo teton.

⁸ lepeŋ lwöpöddu i kiko nyona ko pirit nagon ŋinu ŋuto si ’da kata, a tiri kiko lo tu ko ŋinu kalupe mede,

⁹ i sömukö, i muso na kak, i diŋit nagon kak gwe a tukwaje ko a mudwe nu.

¹⁰ A kirut diŋit a na ’dit, a ŋuto nakwan pondi i rum ko lepeŋ, a jupu gwoso kawute, a töili lonyit iŋge jore ko dumesi.

¹¹ Lepeŋ woŋon parik, a kondi gwoso nagon nye ’de ’dekan na, lepeŋ ti nyar si ’da kanyit midi;

¹² lepeŋ wala abur i kikolin ko i piriton terereki, a mömondi i keresi ti kikolin liŋ.

¹³ A nye morgi ŋilu titinti a kalabbi lepeŋ, a kulyani ko lepeŋ ko kwe a nago adi,

¹⁴ Nan dika a wukindya rubaŋga gwoso na saraki ’e na, nan aje kondya milyeesi kwe i lo lor;

¹⁵ nyena ŋina a kwe nagon nan pöri kaŋo i rum ko do, i ga ’yu na do ko pusök, nan aje ryo do.

¹⁶ Nan aje peddya dotoet nio ko mukesi na gweya ko waratat na jwe Ejipeto, nagon a sowa ko gweyarijin ti buyajin ka ’de ka ’de.

¹⁷ Nan aje gwagwaddu dotoet nio ko riyajin logon a mur, ko alowa se ko girpat.

¹⁸ Po, ti yi ko biryeni ko ’börik teŋ ko ko ’bure tojo koyi a yimönö, ti yi tulyöŋgi ’börik ko nyaŋu.

¹⁹ Kogwon lalet lio ’bayin midi, lepeŋ a jolö pajo parik;

²⁰ lepeŋ a baraddu jurak lo gurut, lepeŋ mo ko yitwene mede ko yapa gwe a duma.

²¹ A nye lulukundye ŋilo titinti ko kulyaesi jore tojo ko nye a ruk, a nye mimi ’deŋ lepeŋ ko jamiat lulukesi.

²² A lu titinti kepoddi lepeŋ ’de ’de kijek gwoso dwöt lo jikö i ’duŋö, ko gwoso la ’ba na moka go ko birya,

²³ tojo lowe a kek lepeŋ i munyet, ko gwoso kwenti na ’da ’daaddu ’de ’de i patala lokesi, a gwe a ko den adi nye tolikindyö ru nanyit.

²⁴ Nyenagon yiŋge nan pon ŋuro lio, togwi ’dikindye swö i yiŋga na ŋo nagon nan jajam kune.

²⁵ Ti töili ilot gwe ti togirara do i kikolin kanyit, an do lyapara kanyit i gwokiot;

²⁶ kogwon nye aje rembu ŋutu jore, iŋkoi, öpuö logon nye aje tatu kulo gwe jore parik.

²⁷ Kadi nanyit a kiko lo tu i pirit na mulökö, logon lulurara kak tojo i kadijik ti twan.