Tolupesi 6 - Bibilia Buk na Ŋun nagon koti luŋu a

Kunyaresi i kulya ti toyokan se ko jambu ’burönö

¹ Ŋuro lio, ko do a gwo ’dan a togwoet i kulya ti leŋe, ko ta a torukökin ko milye i kulya ti lwakatyo,

² kweja adi do a moka ko riŋgwaŋ na kulyaesi ti kutuk inot, do a rereka ko kulyaesi kulok.

³ Nyenagon kondi sona ŋuro lio, anyen do böŋo lwölwök mugun. Kogwon do a ’doro ko leŋe i könin, nyena iti ko tokoyok i mimi ’daŋ na lepeŋ.

⁴ Ti konyen kulök gwe ti ga ’yu doto, ko ti se gwe ti lur,

⁵ ama lwoggi mugun gwoso nyama na giran ko katogoranit i könin, ko gwoso kwenti na pesaddu i könin lo kalokanit lo kwen.

⁶ Do ŋilo yoke, iti ko meddi gwiliŋit na miki, anyen do gwon a lokoŋ.

⁷ Lepeŋat ’bak matat, kode kame-tanit, kode kasaranit,

⁸ ama lepeŋat ga ’yu kinyojin kase i diŋit na ja ’be; iŋkoi, a kwökwoddi se i diŋit na ’butun.

⁹ Do ŋilo yoke, diŋit ŋoman nagon do yeŋon doto? Do de ko ŋien ki nanu i doto?

¹⁰ Doto a na ’dit, ko lur a na ’dit, ko kalabbu na konisi a na ’dit anyen yuyukan,

¹¹ nyena a tolomerian mo ’duki konut loki gwoso karyakanit, a yoŋo inot na ŋo mo morgi do gwoso ŋuto logon a jupu tito moriesi.

¹² Ŋuto loron logon ’bak ’bulit wöröji abur i jamaddu na kulya nakwolöŋok.

¹³ Lepeŋ a kamimi ’dikanit lo konyen, ko a kaselekanit lo moköt, a yuyutuji kulya ko morinet.

¹⁴ Lepeŋ köti a ŋuto logon ko töili loron logon yeyeju kulya narok, ko a katojulönit i diŋitan liŋ.

¹⁵ Nyena a nene ŋo naron mo ’duki kanyit ki wulek; ’de ’de kijek a nye gwalakani gwalaka adi ’bwa!

¹⁶ Do jore kata nagon MATAT maman,

¹⁷ gwoso konyen gorelesi, ko ŋedep ’burönit, ko könisi lo ’buköddu rima na mamaŋa,

¹⁸ ko töili logon yeyeju köŋu kulye ŋutu, ko mokosi lo rumakin i kondya na toron,

¹⁹ ko katokoronit kamumulukanit lo jambu ’burönö, se ko ŋuto katojulönit lo luŋasirik. Kunyaresi i kulya ti lubbö

²⁰ Ŋuro lio, ’debbi saresi ti munyi, an do ko renya todinesi ti ŋuti.

²¹ Doke se konut i töili perok liŋ, tore se konut i murut.

²² A na wöröji ’e do nu, a se mo nyömöddi do, a na piriki ’e do kak i doto nu, a se mo tiji do, a na purwe ’i do i doto nu, a se mo tujambi do.

²³ Kogwon saresi gwon gwoso lombo, a todinesi gwe gwoso parara, a kukuesi tojumisi gwe gwoso kiko lo tu i ru,

²⁴ anyen gaju do i ŋuto naron, i ŋedep lo nakwan na leŋe nagon a kalulukanit.

²⁵ Ti töili ilot gwe ti be ’ya kwelen nanyit, ko ti do gwe ti ruk lepeŋ i toŋga na do ko konyen;

²⁶ kogwon ŋuto nagon a kawute bubulö gwörwe ko ropet na ambata ka ’de, ama nakwan na leŋe ga ’yu ’bija ru liŋ na ŋuto.

²⁷ Ŋuto ŋona bubulö jekundya kimaŋ a tindi i lukata na boŋgo muit nagon kanyit i mugun, a boŋgwat kanyit liŋ tine nokan le?

²⁸ Ŋuto ŋona bubulö wörö i kuk ti kimaŋ na tutule a mokosi kanyit tine nokan le?

²⁹ Nyena gwon sona i ŋuto logon a doto ko narakwan na marate lonyit; lele ŋuto ’bayin lo ’bo ’yu lepeŋ lo tu kana ’bak riŋet.

³⁰ Ŋuto ŋona ti bulo mandu kolanit ko nye a koko ’ya anyen toyimonoju pele nanyit i diŋit nagon nye gwon ko magor nu le?

³¹ A ko nye a moka nye ŋona agu ti roŋ daŋin buryo, a tindi ŋo liŋ nagon kanyit kadi kune le?

³² Ama ŋuto logon torondya ko ŋuto nakwan lo lepeŋ ’bak denesi kwoŋ; nye logon kondya kine kulya lo tukaŋu mugun.

³³ Lepeŋ mo gwugwuto, a lawene lawe, a yu nanyit na kwe mo tine boŋörikin kwöŋ.

³⁴ Kogwon yulön tindu lalet i woran parik, a nye mo tine won konyen i lor lo ropakindye nye toron lu.

³⁵ Lepeŋ mo ti ’bön meddya ŋo nagon do ’dek ropakindya a mukesi ti toron kune. a nye mo tine ruk ma ’di nagon do a tindu ’dokesi jore.