Tolupesi 5 - Bibilia Buk na Ŋun nagon koti luŋu a

Kunyaresi i kulya ti ’dekesi narok

¹ Ŋuro lio, yiŋge koŋon nio ’bura, togwi ’dikindye swö kulök i jujuwesi kwe;

² anyen do böŋö ’debba tokolor, ko anyen do tou kutuk inot i ŋo nagon do a den.

³ Kogwon ŋedep lo ŋuto nagon a kalupe ’don a siwatat, a kutuk nanyit gwe a na ’bulut lwölwöŋ welet;

⁴ ama i ’dutet a nye gwe pötwör gwoso lo ’burtölöŋ, ko a napi gwoso bandu lo pilan swötön murek.

⁵ Mokosi kanyit joŋga lepeŋ kak i twan, a lasesi kanyit kepoddi gwoke lo tu kak i pirit na mulökö;

⁶ a lepeŋ tine yeyeju kiko lo tu i ru, a nye pörti pörtu, a nye gwe a ko den.

⁷ Nyenagon ŋuro lio, yiŋge nan, an do ko kölökin kulyaesi kwe.

⁸ Mijörö pajo ko nu ŋuto i komor. an do ko tu nyona ko kötumit na kadi nanyit;

⁹ an do ko kakalakindya kwelen na gwolor inot i kulye ŋutu, kode kiŋajin kulök i ŋutu logon ko töilyet lorok;

¹⁰ an ŋutu lepelok toyimönöju ’börik ko tukwörien inot, a ŋo nagon do a kitaun ko riŋit kune lulukajine ko leŋe kadi.

¹¹ A molu i ’dutet na konesi kunök, i diŋit nagon ko lokore ko mugun aje sokan nu, a do mo delyani delya,

¹² a do mo be ’yi adi, Ko nyo nan köju maman tojumisi, a töili lio laundye kukuesi?

¹³ Nan köju a ko yiŋ gworolo ti katodinök kwe, kode tindu swö kwe i yiŋga na katojumuk kwe.

¹⁴ Nan gwe nyona ko wuju yu na kwe i komor na ŋutu lo momora.

¹⁵ Möji pioŋ konut i mu ’da, iŋkoi, pioŋ nagon lelekun konut i kidi.

¹⁶ Luruki kulök ködyö lelekara abur le, karya kulök ŋona ’do ’dokon i kikolin le?

¹⁷ Ti se gwe a kulök ka ’de, ko ti lepelok gwe ti ŋarun se.

¹⁸ Ti kidi ilot lo pioŋ ’boriani ’boria, ko ti do lyöŋi ko nakwan inot na toteton.

¹⁹ Nye kwelen gwoso ka ’bu, wörö nanyit a na ’but gwoso na nyama, ti kinasi kanyit tulyöŋgi do i diŋitan liŋ, ko ti do ŋupi yimönöni ko nyaret nanyit.

²⁰ Ŋuro lio, ko nyo nagon do ködyö toyimönöju mugun ko ŋuto nagon a kalupe, a kalabbi kido na ŋuto nagon a lepetyo?

²¹ Kogwon MATAT memet kikolin ti gwiliŋit na ŋuto, a nye tembi gwokiot wöriesi liŋ ti ŋilo ŋuto.

²² Konesi narok ti ŋuto loron na logga lepeŋ, a nye rerekani rereka go ko riŋgwaŋ na toron nanyit.

²³ A nye twane twan kogwon nye ti ’bon ’debba tojumisi, a nye liki likin kogwon tu ’böŋon nanyit duma.