Tolupesi 3 - Bibilia Buk na Ŋun nagon koti luŋu a

Kukuesi anyen ŋuto ködyö ’debba saresi

¹ Ŋuro lio, an do ko böŋöri todinesi kwe, ama ’debbi saresi kwe konut i töili;

² kogwon se mo tindu do i gwolor ko kiŋajin jore, ko i puputuru ŋerot ’bura.

³ Ti tupalikan na töili ko to ’diri gwe ti kolokin do, ama toraki se konut i murut, ko wuroki se konut i töili.

⁴ Nyena a do mo ryeji ’busan se ko komor na ’but ko Ŋun i komor se ko i ŋutu.

⁵ Yinikindye mugun ko MATAT ko töili ilot liŋ, an do ko töggu mugun ko kurundyö inot na kulya.

⁶ Yeyeji lepeŋ ko do tu da, a nye de rikindye kikolin kulök gwogwo.

⁷ Ko yeyeju adi do a lokoŋ, ama kuŋge MATAT ko i opukundye kaŋo i kulya narok.

⁸ Ko do a kondya sona, a do mo gwe ko mugun na ’but ko kuyu iŋgo.

⁹ Bu ’ye MATAT ko ŋo kunok se ko ludweki waŋesi ti kinyojin kulök liŋ;

¹⁰ a kirut gugwo kulök mo jorene jore asut ko kinyojin, a mu ’dajin kulök mo barandi barandu ko binyo ludukö.

¹¹ Ŋuro lio, an do ko renya tojumisi ti MATAT, koti ko mandu kukuesi kanyit.

¹² Kogwon MATAT kukuju ŋuto logon nye nyanyar lo, gwoso nagon monye riŋge ŋuro logon tulyoŋgu lepeŋ.

¹³ ŋuto lo ryeju koŋon se ko lo wuju kurundyö na kulya gwon a kalyoŋok!

¹⁴ Kogwon ’bulit na koŋon Lwo-lwoŋ ’bulit na podo, a ropesi kanyit lwoŋgi ropesi ti dakap,

¹⁵ nye ko ’bulit duma Iwolwoŋ ŋurupo nator na gworo go. Nene ŋo ’bayin nagon do bubulo tojoju ko lepeŋ i ŋo liŋ nagon do ’de ’deggi kune.

¹⁶ Koŋon gwoso ŋuto na ’do ’dogga; a tindi ŋutu gwolor diŋit a najo ko könin lonyit lutaten, a tindi ŋutu tukworien ko bulet ko könin lonyit kadoŋe.

¹⁷ Kikolin kanyit nyomoddu ŋutu i lyoŋon, a gwokiot kanyit liŋ joŋgi ŋutu i gwiliŋit na ’but.

¹⁸ Lepeŋ a ködini toruet lo ŋutu lo morga lepeŋ kulo; a se logon ’depakindya i morga na lepeŋ go kulo luŋuni a kalyoŋok.

¹⁹ MATAT ko koŋon nanyit a gweu-ndya suluesi ti kak, lepeŋ ko kurundyö nanyit na ŋo liŋ a togwi ’dikindya ki go kanyit i pirit;

²⁰ a piriton nagululok buranyundye a pioŋ, a ’dikolo lilimbe lilimba kogwon tobodwan nanyit.

²¹ Ŋuro lio, ’depe go yeyeesi nakoŋ se ko totolok, an do ko koloro se kaŋo konut i komor,

²² nyena a se molu gwe a ru na kodudwo inot, ko a tokwelenyesi konut i murut.

²³ A kirut do mo worojine konut i kiko ’bak nene yoyoŋit, a do mo tine kopuko kwoŋ.

²⁴ Ko do a si ’daki kak a do mo tine kujönö; a na piriki ’e do kak i doto nu, a doto inot mo gwe paleleŋ.

²⁵ An do ko kujönö tokujönöet na po a lwön, kode karan nagon ’dukin i ŋutu lorok.

²⁶ Kogwon MATAT mo totŋgo do, a mo tiji do an moköt ilot moka ko loket.

²⁷ An do ko renya tindu ŋuto logon ŋo nanyit gwon konut, ködyö ko do kata ko riŋit konet.

²⁸ An do ko dumba marate ilot adi, Iti, ko yitwene i nene diŋit. ko ’bure nan de titikin do, a do ki ’doŋ kata ko nye.

²⁹ Ko tetenakindya nene manet a lwon i marate ilot logon diŋö ko do ko a yinikin do adi do a lo ’but.

³⁰ Ko ŋisa ko ŋuto ’bak kwe na kulya, logon a ko konakindya do nene ŋo naron.

³¹ Ko be ’ya ŋuto kamönyi, an do ko wulundyö kebbu lele kiko lonyit asut.

³² Kogwon MATAT maman ŋuto logon konesi kanyit a nakwölö-ŋok, a nye tojuline ko ŋutu lo rigwo.

³³ MATAT lömbu kadi na ŋuto loron, a nye ’boroji pirit na si ’dari ŋuto lo rigwo na.

³⁴ Ma ’di nagon nye a ’dö ’döju ka ’do ’doyök, kolumbö a nye kwekindye ’busan i ŋutu lokoyokak.

³⁵ ŋutu lokoŋ mo wuju bulet, a ŋutu lu ’böŋ mo korakine yu na kwe.