Tolupesi 21 - Bibilia Buk na Ŋun nagon koti luŋu a

¹ Toili lo mor gwon ko MATAT i könin gwoso kikolin ti pioŋ i melesen; a nye lopuköddi lepeŋ i pirit nagon nye ’de ’deggi gwoso pioŋ na ’bulöki i melesen.

² Ŋuto yeyeju adi ŋo lio nagon nye kökon kune meta a na ’but kanyit i konyen, ama kudyakan MATAT tetem töilyet ti ŋutu.

³ Kondya na ŋo nagon a na ’but ko ŋo nagon gwon jojo tutulyöŋ MATAT lwölwöŋ nagon do ’duŋökindyö lepeŋ rubaŋga.

⁴ Konyen ’du ’duŋesi ko töili bulet lo mugun— kine toronjin a lombojin ti ŋutu lorok.

⁵ Ŋuto lo yeyeju ’bura ko a kakite gwon ko ’bulit, ama ŋuto lo nyogga ’de ’de ’bak yeyeju mo wora a lomeri.

⁶ Ŋuto logon ŋa ’yu tukwörien ko kutusen ’burönök kulya kase ’ba ’bakara gwoso köpuröt; a se lo ŋa ’yu lepeŋ kulo ŋa ’yi twatwa.

⁷ Konesi nagon ti ŋutu lorok mo na suköddu se kaŋo, kogwon se a renya kondya ŋo nagon rigwo.

⁸ Ŋuto katoronyanit kondya ko tukwölöŋ, ama konesi ti ŋuto loke a na rigwo.

⁹ Bia si ’da i tuset lo lo ’dek lo ’dayat, lwölwöŋ si ’da i kadi geleŋ ko nakwan kawogonit.

¹⁰ Ŋuto loron yöŋö ŋisa, lepeŋ ti ’bön nyaŋu maratejin kanyit.

¹¹ Ko ka ’dö ’döyönit a wuju riŋet a ŋuto logon ko yeyeesi a namunyak tokoŋoni tokoŋo; a ko ŋuto lokoŋ a todinö a lepeŋ ryeji kurundyö na kulya.

¹² ŋun lo rigwo memet mede na ŋuto loron; lepeŋ gugubakin katoronyak kak a tukaŋi se.

¹³ Ko ŋuto logon ’dija swö kanyit an yiŋga gwiet lo ŋuto lomeri, lepeŋ ko mugun nanyit mo gwi-gwien paraki a ŋuto gwe ’bayin lo yiŋga.

¹⁴ ’Doket na ’dumwe i jeba a lwön toligga woran; a ’doket nagon a namumuk suŋge woran na pape.

¹⁵ Ko putet a ’duŋöki gwogwo tutulyöggu ŋutu lo rigwo, ama a tukaŋi ŋutu kakonak ti kulya narok.

¹⁶ Ko ŋuto a girara kaŋo i kiko lo kurundyö na kulya, lepeŋ mo yuyukan i momoret na ŋutu lo twatwa.

¹⁷ Ŋuto logon nyanyar tulyöŋgu mugun mo wora a lomeri, a nye lo nyaŋu binyo ko welet mo tine gwon a kwörinit.

¹⁸ Ŋuto loron dakarikin ŋuto lo rigwo, a kadumanit gwe i pirit na ŋuto lo ’but.

¹⁹ Bia si ’da geleŋ i yöbu na sese lwölwöŋ gwon ko narakwan kawogonit nagon a kawore.

²⁰ Tukwörien na rye ŋo ko welet gwon ko ŋuto lokoŋ kadi, ama a ŋuto lu ’böŋ wi ’ye se adi mot.

²¹ Ŋuto logon kebbu löti lo ’but se ko ’busan mo ryöryo ru, ko torigwo, se ko bula.

²² Ŋuto lokoŋ kiyaddu i lukata na köji na ŋutu ti riŋit, a to ’doro ’yi pirit nago na titiyu nagon se yiyinikin na.

²³ Ŋuto logon tiju kutuk nanyit ko ŋedep lonyit, lepeŋ gwon pajo i sasanyesi.

²⁴ Ŋuto kabulanit lo mugun ko a ka ’du ’duŋanit karin kanyit a Ka ’dö ’döyönit, lepeŋ kita ko bu ’ya na mugun nagon a lwöggu.

²⁵ ’Dekesi ti ŋuto yoke se na tatuja lepeŋ, kogwon könisi kanyit ti ’bön kita;

²⁶ a i tuparan liŋ lepeŋ be ’yi be ’ya ko yöŋö a duma, ama ŋuto lo ’but titindu ’bak renya.

²⁷ MATAT maman rubagga lo katoronyanit; a naron bia parik ko nye wukindya ko töili loron.

²⁸ Katokoronit ’burönit mo twa-twan, ama kulyaesi ti ŋuto kayiŋanit mo yeyeŋoro ŋupi.

²⁹ Ŋuto loron gwon ko kwe a nago, ama ŋuto lo rigwo titi kikolin kanyit.

³⁰ Koŋon, ko kurundyö, ko jujuwet ’bayin nagon bubulö te ’ya MATAT.

³¹ Kusan a tetenaki ajo a na lor lo ŋor, ama nagon MATAT lo tindu ŋutu i te ’ya.