Tolupesi 16 - Bibilia Buk na Ŋun nagon koti luŋu a

Tolupesi i kulya ti gwiliŋit lo ŋutu se ko konesi kase

¹ Ŋuto yeyeju kanyit i töili ŋo nagoŋ nye kökon, ama MATAT lepeŋ lo tindu ŋuto kulyaesi lo jajama.

² Ŋuto yeyeju adi ŋo liŋ nagoŋ nye kökon kune meta a nake kanyit i metet, ama kudyakan MATAT tetem ködu-dwölön ti ŋutu.

³ Wukindye MATAT ŋo liŋ nagoŋ do kökon kune, a ŋo na yeye do kune mo konakine konaki.

⁴ MATAT a gweja ŋo liŋ ko kitaesi kase ka ’de ka ’de, ma ’di ŋuto loron köti gwoŋ ko lor lonyit sasanyet.

⁵ MATAT maman ŋutu liŋ kabulak ti ’borik; dene ta den adi se mo ti tu kana ’bak riŋa.

⁶ Nyaŋu nagoŋ ti ’duddyo kwoŋ se ko to ’diri seyaddu toron kaŋo, a ko ŋuto gwoŋ a kakukanit lo MATAT a nye lopukundye kaŋo i toron.

⁷ Ko MATAT a lyoŋgi konesi ti ŋuto, lepeŋ titindu ma ’di merok ti lu ŋuto i gwoŋ taliŋ ko lepeŋ.

⁸ A na ’but i gwoŋ ko ŋo ku ’dik ko do ryo i kiko lo ’but, lwölwöŋ ’buliton dumalak na wuyu i kikolin lorok.

⁹ Ŋuto yeyeju kiko lonyit ko toili lonyit, ama MATAT lo tuworoju lepeŋ.

¹⁰ Liliet na kulya gwoŋ ko mor i kutuk gwoso nagoŋ nye a piyu-ndye ko ŋun na; kutuk nanyit ti lyaŋan i ’duŋgo na putet.

¹¹ Temba jojo ko mijan a kulya ti MATAT, lepeŋ lo tetendya witiöt liŋ temesi lo gwoŋ i Jurak.

¹² A ŋo naron parik ko moran a kondya arabat, kogwoŋ loti lo rigwo lo mor lo tindu si ’daet na tumatyan nanyit i gwo ’dan ŋo.

¹³ Moran lyolyoŋon ko jamesi ti ŋutu logon jambu gwogwo, a lepeŋat nyaŋi ŋutu lo jambu kulya nagon a gwak.

¹⁴ Woran na mor jondya twan, a ŋutu lokoŋ ŋa ’yi toliŋga ŋina woran.

¹⁵ Ko ködyö komor na mor a na ’but ŋutu gwogwolor a lo ’but, a ’busan nanyit gwe gwoso ’dikolo ti kudu na ’don i kiser.

¹⁶ A na ’but parik i wuju na koŋon Iwolwoŋ dakap, iŋkoi, bia nagoŋ do wulundyo wuju na kurundyö na kulya Iwolwoŋ wuju na podo.

¹⁷ Kiko duma lo ŋuto lo rigwo gwoŋ a lopukundyö kaŋo i toron, a nye lo tiju gwoke lonyit lo Iwoŋgi ködudwö nanyit.

¹⁸ Bu ’ya na mugun jondya karan, a ’du ’dugga to ’doro ’yi ŋutu.

¹⁹ Bia si ’da ko lomerika i pirit na geleŋ lwölwöŋ koŋa na ryakat ko ŋutu kabulak ti ’börik.

²⁰ Ŋuto lo titiriku saresi mo pupu-turu ŋerot, a nye logon yinikindyo mugun ko MATAT lo gwe a kalyöŋi.

²¹ Ŋuto logon ko toili lokoŋ luŋu a ŋuto logon deden kulya, kulyaesi lo paleleŋ lulukundya ŋutu pölilyö.

²² Koŋon gwoŋ a kidi lo pioŋ toruesi ti ŋuto logon gwoŋ ko nye na, a tu ’böŋön gwe a kurubat lo ’bitorikin ŋutu lu ’böŋ.

²³ Töili lo ŋuto lokoŋ tindu jamiat kanyit gwon gwogwo, a tindi lepeŋ i lulukundya na ŋutu pölilyö ko kulyaesi ti kutuk nanyit.

²⁴ Kulyaesi lo paleleŋ gwon gwoso kele lo siwatat, se paleleŋ i ködudwö ko tindu mugun na ŋuto gwon ’bura.

²⁵ Kiko kata logon ŋuto met a lo ’but, ama ’dutet na ŋilo kiko gwon a twan.

²⁶ Magor lo kakitanit lo tokitaju lepeŋ, a kutuk nanyit nagoŋ ’dek kinyo na ri ’dikindye lepeŋ.

²⁷ Ŋuto logon ’bak ’bulit ŋa ’yu lorga ŋutu ko meyi, a kulyaesi kanyit gwe a kimaŋ na tototumbö.

²⁸ Ŋuto logon a ’burönit toreaddu ŋoma, a kamoranit toreji julin.

²⁹ Ŋuto lögon ko töili lurwö lulukaddu marate lonyit, a nyömöddi lepeŋ i kiko loron.

³⁰ Ŋuto kamimi ’dikanit lo konyen yeyeju kondya ŋo naron, a ŋuto logon toŋa kutuk nanyit ko woran jondi kulya narok.

³¹ Kupir lokwe ti kwe a Iŋguya lokwekwelen logon a rye ko gwiliŋit lo ’but.

³² Nye logon ’di ’dikö i woran lo a lo ’but lwölwöŋ kamörönit, a nye logon suŋga mugun lo gwe a lo ’but lwölwöŋ ŋuto logon riŋundya köji.

³³ Guralan ŋuba i lukata na boŋgo muit nagoŋ a gudula, ama ’dutet na kulya MATAT lo dendya ka ’de.