Biblia Todo Logo
Bìoball air-loidhne

- Sanasan -

Tolupesi 13 - Bibilia Buk na Ŋun nagon koti luŋu a

1 Ŋuro lokoŋ yiyiŋ tojumisi ti monye, ama ka ’dö ’döyönit ti ’bön yiŋga yuyukesi.

2 Ŋuto lo ’but nyesu ŋo na ’but kogwon kulyaesi ti kutuk nanyit, ama ’deket na kadumanit gwon a mörö.

3 Ŋuto logon tiju kutuk nanyit tiju ru nanyit, a nye logon pakindya kutuk nanyit a nagalaŋ lo köröni körö.

4 Ŋuto yoke yayama ko magor, ama kinyo ’bayin, ama a kakite worani a lopir.

5 Ŋuto lo rigwo maman kulya ’burönö, ama a konesi ti ŋuto loron gwe a lut ko a ti yu na kwe.

6 Torigwo tiju ŋuto logon kiko lonyit gwon gwogwo, a toron kölumbö to ’doro ’yi kato-ronyanit.

7 Kulye ŋutu kondya ’börik a kwörinikö, a kudyakan nene ŋo ’bayin; a kulye kondi ’börik a lomerika, a kudyakan gwon ko tukwörien a duma.

8 Ŋuto kwörinit dadakun ru nanyit ko tukwörien, ama a ŋuto lomeri tine yeye tokujönöesi.

9 Parara na ŋutu lo rigwo kokobbu a nake, ama a lombojin ti ŋutu lorok mo tatuani tatua.

10 Ŋuto lu ’böŋ logon ’bak yeyeet jondya rerenyesi, ama koŋon gwon i ŋutu lo yiŋga kukuesi.

11 Tukwörien na rye ’de ’de kijek kakaraddu, ama nye lo momora ku ’dik ku ’dik lo kölumbö ’ya ’ya ’yu.

12 Yendu na ŋo nagon karakin diŋit a najo totomijo toili, ama ko ŋo nagon ŋuto ’de ’deggi kune a tiki lepeŋ a gwe a ködini toruet.

13 Ŋuto lo ’do ’doju kulyaet jakindya mugun twan, ama nye lo twötwö saresi lo mo roröpaki.

14 Todinet na ŋuto lokoŋ gwon a kidi lo pioŋ toruesi, anyen ŋutu boŋo jojo giran i birya na twan.

15 Yeyeesi nakoŋ tindu ŋuto i nyara, ama a kiko lo kadumanit joŋgi lepeŋ i kulya na pape.

16 Ŋutu lokoŋ kita ko dendya i ŋo liŋ, ama a ŋutu lu ’boŋ kweji tu ’boŋo nase.

17 Luyökie loron jakindya ŋutu kulya, ama ŋuto lo sosonyo logon a lo to ’diri lo tindu ŋo liŋ tu ’bura.

18 Ŋuto logon lalaun tojumisi wuju tolomerian se ko yu na kwe, ama a ŋuto logon yiŋga kukuesi lo bulani bula.

19 Ŋo nagon ŋuto ’de ’dekan ko a tiki lepeŋ na gwon a na ’but kanyit i toili, ama ŋuto lu ’böŋ maman löpukun-dyo kaŋo i toron.

20 Woroni ko ŋuto lokoŋ i pirit na geleŋ a do mo worani a lokoŋ, ama ŋuto lo töjulin ko ŋutu lu ’boŋ mo ŋoŋoŋga.

21 Toron kebbu ŋutu katoronyak, ama puputuru ŋerot ’bura gwon a ropet na ŋutu lo rigwo.

22 Ŋuto lo ’but kokolokindyo nya-kwariat kanyit rutat, ama a tukworien na katoronyanit kolumbo ’delakine ŋuto lo rigwo.

23 Kak na ŋuto lomeri nagon a ko kuru diŋit a najo raradan kinyo a duma, ama nye a tu ’bakala kogwon ’duŋgo gwogwo ’bayin.

24 Ŋuto logon a jaran i ’biddyo na ŋuro lonyit maman lepeŋ, ama nye logon nyanyar lepeŋ lo totojum lepeŋ ’bura.

25 Ŋuto lo rigwo nyesu a yimönö, ama a ŋutu lorok si ’dani ko magor.

Bari Bible © United Bible Societies, 1979.

Bible Society in South Sudan
Lean sinn:



Sanasan