Tolupesi 12 - Bibilia Buk na Ŋun nagon koti luŋu a

¹ Ŋuto logon nyanyar to Jumisi nyanyar dendya na kulya, ama nye lo mandu kukuesi lo gwon gwoso kijakutat.

² Ŋuto lo ’but ryeju ’busan ko MATAT, ama a nye ’duŋge kulya ti ŋuto logon tetendya mwönyesi arabat.

³ Ŋuto ’bayin logon bubulo togwo’da go ko kulya nakwolorok, ama a kokori ti ŋuto lo rigwo mo tine ’dutwe kaŋo kwoŋ.

⁴ Nakwan na ’but gwon a Iŋguya lo lalet; ama a nye na Jondya yu na kwe na gwe a kato ’burönit na kuyu ti lalet.

⁵ Yeyeesi ti ŋutu lo rigwo gwon gwogwo, a ŋutu lorok yeyeji dumba.

⁶ Kulyaesi ti ŋutu lorok domba rima, ama a kutusen ti ŋutu lo rigwo lwöggi ŋutu.

⁷ Ŋutu lorok a gubaki kak a gwe ’bayin, ama a kotumit na ŋutu lo rigwo mo gwo ’de gwo ’dan.

⁸ Ŋuto ŋura kogwon denesi kanyit nakoŋ, ama a ŋuto logon ko yeyeesi nakwolorok lawene lawe.

⁹ A na ’but i ŋuto kana lo kitakindya mugun Iwolwoŋ ŋuto lo ’dulukindya mugun ki a gwe ’bak kinyo.

¹⁰ Ŋuto lo ’but yeye gwiliŋit lo turu ’buti nanyit na wöwörö, ama a won na konyen na ŋuto loron gwe a tukaŋan.

¹¹ Ŋuto logon kuŋu kak nanyit mo gwon ko kinyo a duma, ama nye logon kebbu ŋo kana lo gwon ’bak denesi.

¹² Kadi nago na ŋuto loron ’do ’doro kak, ama kokorite na ŋuto lo rigwo ’bekoddu kak go.

¹³ Ŋuto loron moka ko kulya narok ti kutuk nanyit, ama ŋuto lo rigwo gigiran i sasanyesi.

¹⁴ Ŋuto yimönö ko ŋo na ’but kogwon kulyaesi ti kutuk nanyit, a ŋuto ropakine kita nagon nye a kon na.

¹⁵ Ŋuto lu ’böŋ yeyeju adi kikolin kanyit a lo ’but, ama ŋuto lokoŋ yiyiŋga jujuwesi.

¹⁶ Yulon na ŋuto lu ’böŋ dedena ’de ’de, ama ŋuto lokoŋ lalaun ’da ’daresi.

¹⁷ Kajamanit lo rigwo jambu kulya nagon a gwak, ama katokoronit ’burönit tökoŋu kulya ’burönö.

¹⁸ Kulyaesi lo rarame a lopi gwoso bandu, ama ŋedep lo ŋuto lokoŋ totoligga.

¹⁹ Kulya na jama ko kutuk na to ’diri yeyeŋon ŋupi, ama kulya na jama ko ŋedep ’burönit likin diŋit a na ’dit döndi.

²⁰ Ŋuto logon yeyeju kondya toron gwon ko töilyet mumulukesi, ama ŋuto lo yeyeju kondya ’busan gwon ko lyöŋön.

²¹ Ŋo naron ’bayin na ’dukin ko ŋuto lo rigwo loki, a kölumbö ŋutu lorok tojorene ko sasanyesi.

²² MATAT maman ŋutu lo jambu ’burönö, ama a nye lyöŋi ko ŋutu lo kondya to ’diri.

²³ Ŋuto lokoŋ muggö dendya nanyit, ama a töilyet ti ŋutu lu ’böŋ laŋe tu ’böŋön nase.

²⁴ Könin lo ŋuto kakite mo gwon ko riŋit saret, ama a ŋuto yoke mo ri ’dikine i kita.

²⁵ Töili logon a jore ko wiwinyesi nyönyökun ŋuto kak, ama kulyaet lo ’but tulyöŋgu lepeŋ.

²⁶ Ŋuto lo rigwo lölöpukundyö kaŋo i kiko lo toron, ama kiko lo ŋutu lorok togiraddu lepeŋat.

²⁷ Ŋuto yoke ya ŋun kana i goŋa, ama ŋuto kakite mo wuju tukwörien nagon joŋga gurut jore.

²⁸ Kiko lo torigwo joŋga ŋutu i ru, ama kiko kata lo tu i twan.