Tolupesi 11 - Bibilia Buk na Ŋun nagon koti luŋu a

¹ MATAT maman mijan nagon temarikki ko mumulugga, ama nye lyolyopon ko temet nagon temarikin jojo.

² Ko bu ’ya na mugun kata, a yu na kwe koti gwe kata; ama a ŋuto lokoyok gwe a lokoŋ.

³ ŋutu lo rigwo nyomo ko to ’diri nase, a kolumbo a ŋutu kadumak tuka-rani kogwon dudumuja nase.

⁴ Tukworien ’bak ’bulit i lor lo woran, ama loti lo rigwo Lwolwöggu ŋuto i twan.

⁵ Loti lo ’but lo ŋuto logon ’bak ŋoit tindu kiko lonyit gwon gwogwo, ama kolumbo a ŋuto loron ’dorone kogwon toron nanyit.

⁶ Loti lo ’but Iwoggu ŋutu lo rigwo, ama a kadumak ’dorone i meyitan ti ’dekesi kaise narok.

⁷ Ko ŋuto loron a twan, a yenet nanyit kakaŋi kakaŋu, iŋkoi, yenet na ŋuto logon ti twoju ŋun gwon a ŋo kana.

⁸ Ŋuto lo rigwo Iwolwokwe kaŋo i sasanyesi, a ŋuto loron lo ruddye ’doro i pirit nanyit.

⁹ Ŋuto logon ti twoju Ŋun kokor marate lonyit ko kutuk nanyit, ama ŋutu lo rigwo Iwolwoko kogwon dendya na kulya.

¹⁰ Ko ŋuto lo rigwo a puputuru ŋerot ’bura a ŋutu ti köji lyoŋi lyoŋon; a ko ŋuto loron a twan, a ŋutu sirani sira ko lyoŋon.

¹¹ ’Boriet na ŋuto lo rigwo a ’bilikin köji ki, ama a kulyaesi ti ŋutu lorok dukakindye nu köji kak.

¹² Ŋuto logon a ka ’da ’daranit lo marate lonyit ’bayin a lokoŋ, ama ŋuto lo kukurundyö kulya lo yiŋa tatiŋ.

¹³ Ŋuto logon a kajamanit lo ŋutu arabat topukundyo Iwono, ama Ŋuto logon yiyiniki adi nye a lo ’but lo ’de ’de ’ya kulya.

¹⁴ Jur ’do ’doro ko a ko sara ’bura, ama a telet gwe kata ko kajujuwak jore.

¹⁵ Ko ŋuto logon a gwo ’dan i kulya ti leŋe lepeŋ mo ’be ’beleŋo ko tömiesi, ama ŋuto logon maman gwo ’dan i kulya ti leŋe gwon a luitot.

¹⁶ ŋuto nakwan nagon toili lonyit a jore ko ’busan lepeŋ bubula, a ŋutu logon ko toilyet a lurwok ryeji tukworien.

¹⁷ Kanyaranit lo ŋutu konakindya mugun ’bura, ama nye logon a kapa lo böŋoddu mugun.

¹⁸ Ŋuto loron wuju ropesi mumulukesi, ama nye lo weja torigwo lo ŋepa ropet nagon a gwak.

¹⁹ Ŋuto logon a petakindya toili lonyit i loti lo rigwo mo gwogwolor, ama nye lo kebbu toron lo mo twatwan.

²⁰ Matat maman ŋutu logon yeyeesi kase a nakwolorok, ama a nye lyoŋi ko ŋutu logon kikolin kase ’bak yuyukesi.

²¹ ’Diri gwak ŋuto loron mo ti köloji kana ’bak riŋet, ama a se logon ko loti lo rigwo mo lwokoni lwoko.

²² ŋuto nakwekwelen nagon ’bak totolok nagwon gwoso reyat na dakap ko wuri i kume.

²³ Ŋutu lo rigwo yoŋo ŋo nagon a na ’but ka ’de, ama a yenesi ti ŋutu lorok ’duddye a woran.

²⁴ ŋutu ka ’dokanit ’do ’dogga abur, a kölumbö a nye tukworiene tukworien, a ŋuto logon a wele worani a lomeri.

²⁵ Ŋuto katinunit mo puputuru Ŋerot ’bura, iŋkoi, nye lo tumaddu ŋutu ko pioŋ lo mo tumatani ko pioŋ koti.

²⁶ ŋutu lombu nye lo ’de ’ya ’bolot kanyit lo, ama a ŋuto lo tugwoŋu ’bolot kanyit lo ’boriani ’boria.

²⁷ Ŋuto logon ga ’yu ŋo na ’but ko pusok ga ’yu ’busan, ama a toron ’duki i ŋuto logon ga ’yu nye lo.

²⁸ Ŋuto logon yinikindyo mugun i tukworien nanyit lo mo ’do ’doro, ama a ŋuto lo rigwo lo mo wile wilan koro po jore.

²⁹ Ŋuto logon sasandu mede nanyit lo mo ruddya kobuŋot, ama a ŋuto lu ’boŋ mo gwe a koliponit lo ŋuto lokoŋ.

³⁰ Ludweki ti ŋuto lo rigwo gwon a ködini toruet lo ŋutu, ama a kulya ti mwon tolikindye ru na ŋutu.

³¹ Ko ködyö ŋuto lo rigwo a ropaki toron nanyit i na kak, a bia parik kulya ti ŋuto loron logon a katoronyanit lo kirut mo ropakine ada?