Tito 1 - Bibilia Buk na Ŋun nagon koti luŋu a

Romesi

¹ Nan Paulo a ’dupiet lo Ŋun ko a luyökie lo Yesu Kristo, anyen tiŋdu yupet na ŋutu lo wulwe ti Ŋun i puputuru i ŋerot, ko anyen se deden kulya ti to ’diri nagon a ti keri lo Ŋun,

² se ko i yeŋdu na ru na yeŋ nyin. Ŋina ru a ŋo nagon Ŋun a milyekin tiŋdu i diŋitan ti ’beron, lepeŋ ti gwon a ’burönit.

³ ŋun Kalwokonit likaŋ a wuluŋdyo diŋit na ’but, a iŋge kwekiŋdya kulyaet lonyit köke, a lepeŋ iŋge yinikin nan i tokujo na kulyaet lonyit gwoso i saret lonyit.

⁴ Nan a roman ko do Tito ŋuro lio ’diri I yupet nagon yi papar na adi, Ti ’busan ko taliŋ na po ko Ŋun Monye na po ko Kristo Yesu Kalwokonit likaŋ na gwe ko do.

Kita na Tito Kurete yu

⁵ Nan koju a kölökin do Kurete ŋini anyen do kodyö teteŋdya pitöno ti kulya nagon kodyo kokona kine, a nan iŋge sarakiŋdya do anyen do kodyo wuluŋdyo temejik ti momoresi ti kayu-pok i köjino liŋ.

⁶ Kilo ŋutu kodyo gwon ’bak yuyukesi, ko gwon ko wate geleŋ geleŋ. Ŋwajik kase kodyo gwon a kayupok, a ŋutu gwe ti jambu adi lepeŋat gwon ko gwiliŋit loron, kode adi se a kalaak.

⁷ Kogwon kametanit duma kodyo gwon ’bak yuyuket, kogwon lepeŋ a katiyunit lo mede na Ŋun. Lepeŋ agu kodyo ti koŋdya gwoso nagon nye ’de ’dekan, lepeŋ kodyo ti woran ’de ’de, kode gwon a kamere, kode a kamörönit, kode goma gurut.

⁸ Lepeŋ agu kodyo gwon a kawuyunit lo kömu, ko a kanyaranit lo ŋo na ’but liŋ. Lepeŋ agu kodyo gwon a katiyunit lo mugun, ko a lo loti lo rigwo, ko a kakukanit lo Ŋun, ko a kateŋonit lo mugun.

⁹ Lepeŋ agu kodyo ’de ’dep lo kulyaet go logon jojo yupo lo, gwoso na todiniki ’e nye na. Ko ŋina kwe a lepeŋ mo buloni bulo togo ’yu kulye ŋutu ko todiŋdyo nagon tiŋdu ŋutu gwon ’bura, anyen teluŋdya ŋutu logon a karerenyak i kulya ti ŋilo kulyaet kilo.

¹⁰ Kogwon ŋutu jore kata logon ti ’bon sara, logon a kajamak ti ŋo kana, ko a kamumulukak, kegga Yudayaki logon a kayupok.

¹¹ Toyiŋaji kilo ŋutu, kogwon lepeŋat köŋu yeyeesi ti ŋutu liŋ lo gwon i kunie midijik, lepeŋat ’bak yu na kwe i todiŋdyo na ŋo nagon se kodyo ti todin kune anyen ga ’yu ’bulit.

¹² Lele lo ŋutu ti Kurete logon a nebi koju a kulya adi, Ŋutu ti Kurete ŋupi jambu ’burönö, ko a gwuruŋin, ko a yokia, ko a kagomak.

¹³ Kulya na jam lepeŋ kune a gwak. Nyena ko ŋina kwe ririŋe ririŋ lepeŋat parik anyen se boŋö gwon a lo ’but i yupet nase,

¹⁴ ko ti se gwe ti ’depakiŋdya i likikirilon ti Yudayaki se ko i saresi ti ŋutu logon aje lopukuŋdyo kaŋo i kulya ti to ’diri kilo.

¹⁵ Ŋo liŋ a nake i ŋutu logon ko toilyet a loke, ama nene ŋo ’bayin nagon a nake i ŋutu logon toilyet a lut ko ti yubbo kilo, kogwon yeyeesi kase se ko toilyet kase denesi aje toluta.

¹⁶ Lepeŋat kulya adi se deden Ŋun, ama se renya lepeŋ kogwon konesi kase. Lepeŋat a loron parik, lepeŋat ti twoju, ko ti jukin i koŋdya na nene ŋo na ’but kwoŋ.