Saumajin 122 - Bibilia Buk na Ŋun nagon koti luŋu a

Yerusalema ŋuŋura

¹ Nan gwon ko lyöŋön na jamakindye se nan nu adi, Yi a tu ta ko MATAT kadi!

² Do Yerusalema, yi a gwogwo ’di i kötumitön kunök lukata!

³ Yerusalema, do a ’dukö gwoso köji nagon ŋutu kanyit si ’da ko töili geleŋ!

⁴ Ŋina a köji nagon ŋutu ti kötumitön ti MATAT kiyaddi nyin, anyen tindu MATAT lyöŋesi ’dindya karin kanyit, gwoso na saraki ’e ŋutu ti Yisaraele nu.

⁵ Kogwon si ’daesi ’duŋesi ti ŋutet a ŋeta nyu, iŋkoi, si ’daesi ti tomoran na kötumit na Dawidi.

⁶ Momo ’yi ta ko Yerusalema anyen gwon taliŋ! Ti ŋutu logon nyanyar do Yerusalema kulo ti kulya kase puputuru ŋerot ’bura!

⁷ Ti ŋutu si ’dani ko taliŋ konut i mariŋ lukata, ti ŋutu logon si ’da konut i kadijik temejik kulo gwe ’bak kujönö!

⁸ Nan bubulö jambu adi, Ti taliŋ gwe konut lukata, kogwon kulya ti luŋasirik kwe ko ti julin kwe.

⁹ Nan galakindya do kulya na ’but, kogwon kulya ti kadi na MATAT Ŋun likaŋ.