Pilipoi 3 - Bibilia Buk na Ŋun nagon koti luŋu a

Löti lo rigwo lo to ’diri

¹ Luŋasirik kwe, nan gwe ’bak kunie kulya jore nagon nan jajam. Tuŋ lyöŋi ta lyöŋön ko Matat i mugun. Nan ti dara i nyönyöggu na kine kulya, anyen se gaju ta.

² Kunyar ta kilo ’dioŋjin, kweja adi kilo kakonak ti kulya narok, iŋkoi, kunyar ta se lo tiddya kulya ti tawero na mugunya kilo.

³ Kogwon yi kulo a ŋutu lo tawero gwak, logon twöju ko Mu lokötyo lo Ŋun, a yi bu ’ye ’börik ko Kristo Yesu i mugun, a tine yinikindyo ’börik i po ti na kak.

⁴ Ma ’di nan ko mugun nio köti ködyö yinikiŋdyö mugun i ŋo ti na kak. A ko lele ŋuto yeyeju adi nye bubulö yinikiŋdyö mugun i ŋo ti na kak, nan bubulö yinikiŋdyö mugun i ŋo ti na kak bia parik.

⁵ Nan tawero i lor tobudök i mukök na yuŋwe nio, nan a nya kwarilo Yisaraele, nan a lo kötumit na Benyamina, nan a Eberetyo ŋutu ti Ebere lo yupuŋdyö nan. I kulya ti ’debba na Saresi ti Mose nan a Parusityo.

⁶ Nan gwon ko pusök i sasaŋdu na kanisa. Nan a rye ’bak yuyuket i ŋo liŋ nagon Saresi tuggö adi ŋuto ködyö kökon anyen gwon rigwo kune.

⁷ Ama kine ŋo liŋ na ’but nagon jakiŋdya nan ’bulit kune, nan kiuŋdyö adi se ’bak ’bulit kogwon kulya ti Kristo.

⁸ Iŋkoi, nan kiuŋdyö ŋo liŋ adi se ’bak ’bulit, kogwon deŋdya nio na Kristo Yesu Matat liŋ a ’bulit duma parik lwölwöŋ ŋo liŋ. Nan a tolikin ŋo liŋ kogwon kulya kanyit, a nan iŋge kiun kine ŋo liŋ gwoso korodo, anyen nan böŋö ryeju Kristo

⁹ a nan böŋö ryeni kanyit i mugun. Nan ködyö rye kanyit i mugun ti gwon ko löti liŋ lo rigwo logon rye i ’depa na Saresi, ama nye a löti lo rigwo logon po kogwon nan yubbö Kristo. Ŋilo löti lo rigwo Ŋun lo tiŋdu ko a löti logon moköt lonyit a yupet.

¹⁰ Nan ’de ’dekan ŋo geleŋ tuŋ, kweja adi nan ’dek deŋdya Kristo, nan ’dek deŋdya riŋit na ŋien nanyit i twan.

¹¹ Nan ’dek naruŋdya ŋoŋesi kanyit, anyen nan böŋö gwon gwoso lepeŋ i twan nanyit, anyen ko ködyö bubulö a nan böŋö juki jukin ŋien i lo twatwa.

Ri ’diaddu na mugun ŋerot i opere

¹² Kine ŋo na jam nan kine nan a ko nyuŋ ryö se liŋ, köti nan a ko nyuŋ ’temakiŋdya jojo gwak. Nan nyuŋ ri ’diara mugun ŋerot anyen nan boŋö mokuŋdya se a kwe, kogwon Kristo Yesu aje mok nan a lonyit.

¹³ Luŋasirik, nan ti yeyeju adi nan aje mokun se a kwe, ama ŋo geleŋ nagon nan kökon na adi nan böböŋö ŋo liŋ na gwon i mukök, a wokuŋdye ŋo na gwon ŋerot kunu.

¹⁴ Nan ri ’diara mugun ŋerot anyen ’durökin i pirit tutuŋet na opere.anyen böŋö wuju ’doket na gwon ki yu nagon Ŋun a lupukin yi i wuju ko Kristo Yesu i mugun na.

¹⁵ Nyenagon ti yi logon a lo wora kulo yeyeji sona. A ko ta gwon ko yeyeesi ka ’de ka ’de i nene ŋo, Ŋun mo köti kwekwekin ta ŋina ŋo köke.

¹⁶ Tuŋ ti yi möröddi ta ŋerot i ŋo nagon yi aje ’durökin kata na.

¹⁷ Luŋasirik, morakiŋdye ta i rairakiŋdya na nan. Yi gwon a miret kasu; mete ta met ’bura ontu logon gwolor gwoso yi kilo.

¹⁸ Kogwon gwoso nagon nan a takiŋdye ta daŋin jore na, soŋinana nan ŋilo takiŋdya ta ko ŋolitan adi ŋutu jore kata logon gwiliŋisi kase gwon gwoso se a merok ti ködini na görö na Kristo.

¹⁹ ’Dutet na kilo ŋutu gwon a karan nase, a ŋun lose gwe a pelela kase, a se bu ’ye ’börik i ŋo nagon ködyö tiŋdu kusik kase i yu kune, a tiŋdi yeyeesi kase i ŋo ti na kak.

²⁰ Ama kölumbö jur likaŋ gwon ki yu, a yi mömöŋdi po na Kalwökönit nyu logon a Matat Yesu Kristo.

²¹ Lepeŋ mo kita ko riŋit nanyit nagon teluŋdya ŋo liŋ a kanyit na, i löpuggö na kune mugunya kaŋ namunyak ti na kak kune, anyen se wora gwoso mugun nanyit nakwekwelen na.