Pilipoi 2 - Bibilia Buk na Ŋun nagon koti luŋu a

Tokoyok na Kristo se ko todumalan nanyit

¹ Gwon ko Kristo i mugun ŋonatiŋdu ta i gwon a iŋgo le? Nyaŋu ŋona riri ’dikin ta i koŋdya na nene ŋo le? Ta ŋona gwon ko tojulin i pirit na geleŋ i Mulökötyo Loke? Ta ŋona gwon kowon na konyen ko i yatakiŋdya le?

² Nyena gwe ta ko yeyeet geleŋ, ko i tunyar ko ’börik, ko i gwon ko töili geleŋ, ko i yeyeju na ŋo na geleŋ, anyen lyöŋön nio jojore.

³ An ta ko koŋdya ta nene ŋo i deŋdya na teŋ nasu ka ’de, kode i bu ’ya na ’börik, ama gwe ta a lokoyokak i yeyeju na kulye ŋutu adi se a lo ’but lwölwöŋ ta ko ’börik kasu.

⁴ Ta liŋ geleŋ geleŋ ŋadi ködyö ti meddya kulya kanyit na ’but ka ’de, ama köti ti lepeŋ mete met kulya na ’but ti kulye ŋutu.

⁵ Ti na yeyeet gwe kasu i töilyet nagon gwon ko Kristo Yesu na:

⁶ Adi suluja i suluet lepeŋ kelaji ko Ŋun, ama a nye gwe a ko ’depakiŋdya go i gwon jojo ko Ŋun.

⁷ Kölumbö a nye tutupuŋdye ŋo kanyit liŋ kaŋo, a kelajine ko ’dupiet, a worani gwoso ŋuto, a iŋge kweya ko mugun na ŋuto.

⁸ A nye tokoyoggi mugun, a twoji twoju a gwe a ko renya twan, ma ’di i tatua i kodini na göro.

⁹ Ko ŋina kwe a Ŋun toduma ’yi lepeŋ parik totoŋun ŋo liŋ, a gwikiŋdye lepeŋ karin nagon lwölwöŋ karin liŋ,

¹⁰ anyen i karin ti Yesu ŋutu liŋ lo gwon ki yu, ko lo gwon kak ni se ko lo gwon i lukata na kak kulo, böŋö rugwuŋö kak,

¹¹ anyen ŋutu liŋ tukun kaŋo adi, Yesu Kristo a Matat, anyen Ŋun Monye bubula.

Ta kodyo kokobbu i na kak gwoso kaser

¹² Ta julin kwe lo nyanyara, ta ŋupi twotwo nan i diŋit na gwoŋdi nan ko ta i pirit na geleŋ na, nyenagon kegga twoji ta nan sopinana nagon nan ’bayin kasu kiden na. Kitani ta kita parik ko kujöno ko böböŋöju, anyen ta boŋö tutupokiŋdyo lwokö nasu,

¹³ kogwon Ŋun ŋilo kikita kasu i mugunya, anyen tiŋdu ta i nyaŋu na po nagon tulyöŋgu lepeŋ kune ko i koŋdya na se.

¹⁴ Koŋdi ta po liŋ ’bak wiwinya kode rerenya,

¹⁵ anyen ta boŋo gwon ’bak yuyukesi, ’bak kulya, ko a ŋwajik ti Ŋun logon ’bak korit kulo, i kiden na ŋutu ti na toberon logon konesi kase a nakwölopök ko a kaŋirak kulo. A ta mo kobbi kobbu kase kiden i na kak gwoso kaser,

¹⁶ na ŋutu kiŋdye ta lepeŋat kulyaet toruet nu. Nyena i loriŋ pöri Kristo lu, a nan mo bu ’ye mugun adi nan a te ’ya i wökön nio i opere, iŋkoi, nan a ko kita ko kana.

¹⁷ Ta wukiŋdya Ŋun yupet nasu gwoso rubaŋga, nyena ko ködyö rima kwe a ’yalaiki kata gwoso rubaŋga ’bu ’buket, a nan ködyö nyolani nyola ko a lyöŋi lyöŋön ko ta liŋ i pirit na geleŋ.

¹⁸ A ta köti ködyö nyolani nyola a lyöŋi lyöŋön ko nan i pirit na geleŋ.

Sonyo na Timoteo ko na Epaporodito

¹⁹ Ko Matat Yesu ’de ’dekan, nan yeŋdu soŋdu Timoteo ’de ’de kasu pini, anyen töili liŋ böŋö gwon a lo ’but ko nan a den kulya kasu.

²⁰ Kogwon nan ’bak lele ŋuto gwoso lepeŋ logon ’diri ko pusök parik i kulya kasu.

²¹ Ŋutu liŋ geleŋ geleŋ padi ga ’yu kulya kanyit na ’but, ti gwon a kulya ti Yesu Kristo.

²² Ama ta liŋ deden gwiliŋit lo Timoteo, ta a den adi nye a kita ko nan i pirit na geleŋ i kulya ti Loŋe Lo ’but gwoso ŋuro ko monye.

²³ Nyenagon nan yeŋdu soŋdu lepeŋ ’de ’de kasu pini i diŋit nagon nan a met ko kulya kwe mo wöröji ada.

²⁴ (Ko Matat ’de ’dekar,) nan ko mugun nio köti yeŋdu tu kasu pini ’de ’de.

²⁵ Nan yeyeju adi ködyö a na ’but ko nan a sunyukiŋdyö ta Epaporodito luŋaser liŋ lo yubbö, logon yi paŋu kita ko lepeŋ, logon yi mörö gor lo geleŋ ko lepeŋ lo, köti logon ta a sunyun köyö ni i parakiŋdya na nan lo.

²⁶ Lepeŋ mimiuŋdyö meddya ta liŋ, a iŋge delya parik kogwon ta a yiŋ adi nye a ŋilö.

²⁷ ’Diri lepeŋ a ŋilö, gwe nyona ko twan. Ama Ŋun a yatakin lepeŋ, ti gwon a lepeŋ ka ’de, ama a yatakin nan köti, an ’yalakiŋdya nan nene delya.

²⁸ Nyena nan ’de ’dekan bia parik i sonyoddu na lepeŋ kasu ŋini, anyen ta böŋö lyölyöŋön i meddya na lepeŋ köti, ko anyen delya nio böŋö rorokuŋdya kak.

²⁹ Nyena wuji ta lepeŋ ko lyöpön a duma ko Matat i mugun. Ta ködyö bu ’ya ŋutu gwoso kilo.

³⁰ Lepeŋ gwe nyona ko twan kogwon kita na Kristo. Lepeŋ a paju ru nanyit anyen tutupökiŋdyö kita nagon ta ködyö lo kitakiŋdya nan na.