Osea 8 - Bibilia Buk na Ŋun nagon koti luŋu a

Ŋutu ti Yisaraele a riŋa kogwon se twöju nyömuejin

¹ Sukiŋdye buruŋ i konut i kutuk! Loguluseni kata i loki na kadi nio na MATAT, kogwon ŋutu kwe aje ’beleŋgu tomoret na teten nan ko se na, ko a laŋgu saresi kwe.

² Lepeŋat gwiun köyö ni i paraki, adi, Ŋun likaŋ, yi ŋutu ti Yisaraele deden do.

³ Kotumit na Yisaraele a gubara mu ’diŋ ŋo nagon a na ’but na; a miriku mo kepoddi lepeŋat.

⁴ Lepeŋat a wuluŋdyo ŋutu a moran, ama nan a ko ’dekan, lepeŋat a wuluŋdyo ŋutu temejik, ama nan a ko den. Lepeŋat a niddyö pödö se ko dakaŋ kase a nyömuejin logon a ŋun-yen, logon tukaŋu se.

⁵ Nan aje renya tagwok na ŋutu ti Samaria nagon a nyomue, woran nio aje tulekin kase loki. (Diŋit ŋornan tojo se mo wora a loke i Yisaraele?)

⁶ Bodo a teteŋdya ŋina tagwok, ŋina tagwok ’bayin a ŋun. Tagwok na Samaria mo gwagwa-laka a na ’di ’dik na ’di ’dik.

⁷ Kogwon se aje weja köbuoöt a se mo pepi libibiu. ’Bolot aje wora a muni, lepeŋat mo ti toran a konyen; a ko ködyö se a toran, a Lwaka ködyö lo nyesi se.

⁸ Kotumit na Yisaraele aje wilo adi mot, a se gwe gwoso mu ’da logon ’bak ’bulit i kiden na jurön.

⁹ Se gwon gwoso kaine lo mu ’dio lo wöroŋ ka ’de abur, a iŋge tu tojo Asura i luŋgu na ŋariet. Kötumit na Epuraima gwoso ŋuto nakwan na gwöruŋdyö lyan kanyit kanyarak.

¹⁰ Iŋkoi, ma ’di se a gwöruŋdyö lepeŋat i kiden na jurön, soŋinana nan de momoruŋdya lepeŋat i ŋirit na geleŋ i riŋa; i diŋit a na ’dit a se mo kölökiŋdye welakiŋdya ŋutu i gwon a moran kode a ŋutu temejik.

¹¹ Kogwon kötumit na Epuraima aje tuŋdijö piritön ’yuresi ti rubaŋgajin anyen konani toron, kine piritön ’yuresi ti rubaŋgajin aje wora a toron nase.

¹² Ma ’di nan ködyö a wurökin lepeŋat saresi kwe aliŋan puök, kölumbö a kilo saresi metani a ŋo kana.

¹³ Ma ’di se a ’duŋgö lokoriŋ a rubaŋgajin kwe, a nyesi se, nan MATAT mo ti wu se kwöŋ Nan mo yeye lyaŋesi kase, a nan mo riŋge se i toronjin kase; a se mo yitöni Ejipeto.

¹⁴ Kogwon kötumit na Yisaraele aje böŋöri nan Kagweyanit lose, a ’duŋge kadijik ti tumatyan; a kötumit na Yuda tuŋdije köjino nagon a gömö ko mariŋan nago na titiyu; ama nan mo soson kimaŋ kase i köjinö, a mo ’yuŋe piritön kase nago na titiyu.