Osea 7 - Bibilia Buk na Ŋun nagon koti luŋu a

Toron na ŋutu ti Yisaraele se ko renya nase

¹ i diŋit nagon nan ködyö toliŋge Yisaraele nu, a lyaŋesi ti Epuraima se ko toron na Samaria kweyani kweya, kogwon se koŋdya kulya ’burönö, a kolak ’be ’beleŋgi kadijik ti ŋutu, a karyakak ryaggi ŋutu i kikolin.

² Ama a se tine yeyeju kase i töilyet adi nan deden toronjin kase liŋ. Nyena konesi kase a lopakin se kiden, a nan meddi se.

³ Lepeŋat tulyöŋgu mor ko toronjin kase, a tulyöŋgi ŋutu temejik ko dudumuja nase.

⁴ Lepeŋat liŋ a kaluŋök, Lepeŋat pape gwoso ŋirit namet nagon kaderanit lo ambata tine böŋdu kimaŋ, suluja i nutu na ambata tojo a yu.

⁵ I lor duma lo mor likaŋ a ŋutu temejik mere meran ko binyo na pötwör, a Lepeŋ ŋoki i yuyutuja ko ka ’dö’döyök i ŋirit na geleŋ.

⁶ Kogwon töilyet kase pape gwoso ŋirit namet i teteŋdyana mwönyit; a woran nase nyore tukwaje liŋ; a i ko ’bure a kobbi gwoso kimaŋ na tutule.

⁷ Lepeŋat liŋ pape gwoso ŋirit namet, a se nyesi kasarak kase. Moran kase liŋ aje ’doro; a lele lose gwe ’bayin logon luŋgu nan.

⁸ Kötumit na Epuraima a polakin-dya ’börik i gweyajin ti ŋutu; Epuraima gwon gwoso ambata nagon a ko löpukö i dera i ŋirit namet.

⁹ Lwaka nyesu riŋit nanyit, a nye gwe a ko den, iŋkoi, kupir kanyit ti kwe a suluja kwekweja geleŋ geleŋ, a Lepeŋ gwe a ko den.

¹⁰ ’Du ’duŋga na kötumit na Yisaraele na pökiŋdyö Lepeŋat ko ’börik, ama a se gwe a ko yitwe ko nan MATAT Ŋun lose ni, ma ’di ko kine ŋo liŋ a se gwe a ko ga ’yu nan.

¹¹ Kötumit na Epuraima gwoso gure na ’böŋ nagon ’bak denesi nakoŋ, Lepeŋ luŋgu paret ko Ejipeto kudyakan a iti Asura.

¹² A na tiri se nu, a nan mo gubakiŋdye boyi nio kase loki, a nan mo pikuŋdye se kak gwoso kwen ti ki, a nan mo riŋge se na yiŋge nan se i momora nu.

¹³ Wöidiö i Lepeŋat, kogwon se aje girara kaŋo koyö! Ti tukaret ’duki ko Lepeŋat loki kogwon se a renya nan! Nan ködyö lwölwök se, ama a se jambi ’burönö i kulya kwe.

¹⁴ Lepeŋat a ko gwiun köyö ni ko töilyet kase liŋ, ama Lepeŋat lulujö kase i dotoesi loki; a se ’du ’duŋuje ’börik i kulya ti ’bolot ko binyo, a Lepeŋat renyani nan.

¹⁵ Ma ’di nagon nan a tojumukin se a togo ’yi könisi kase, ama a se yeyeji mwön ko nan.

¹⁶ Lepeŋat a löpuköddu ko Bala yu, a se gwe gwoso daŋ nakolok, a ŋutu kase temejik mo tatuani ko baŋdujin, kogwon ŋedep a kase a lori. A ŋina mo tiŋdi se i ’dö ’döyö i jur lo Ejipeto.