Osea 6 - Bibilia Buk na Ŋun nagon koti luŋu a

¹ Iŋkoi, se ga ’yu nan kulya adi, Po ta, ti yi yitöni ta ko MATAT yu, kogwon lepeŋ aje kekeren yi ka ’de ka ’de, anyen nye böŋö totolik yi; Lepeŋ aje gwuddyö yi, a nye mo doggi ’dikasin kaŋ ko rubatan.

² A i mukök na perok murek a nye mo toruje yi; iŋkoi, i lor tomusala a nye mo ’biluŋdye yi ki, anyen yi böŋö gwon jörun kanyit i komor.

³ Ti yi dene ta den MATAT, ti yi ri ’dikiŋdye ta ’börik i deŋdya na lepeŋ; ŋo nanyit a gwak gwoso nagon kak ’diri babaŋuŋdye na; lepeŋ mo ŋoŋo kayaŋ ni gwoso lilima, ŋo nanyit gwoso ’don na kudu lo kiser lo popogga kak.

⁴ A MATAT waddi adi, Do kotumit na Epuraima, nan konakin do nyo? Do kotumit na Yuda, nan ŋona konakin do ada? Nyaŋu nasu na nan gwon gwoso luru lo ko ’bure, gwoso puŋutut lo lilikara ko ’bure ’beron.

⁵ Nyenagon nan aje totok ta ko tuluö logon a kutusen ti nebijin, nan aje tatuja ta ko kulyaesi ti kutuk nio, a ’duŋgö nio na putesi pararaaddi kaŋo.

⁶ Kogwon nan ’de ’dekan adi ti ŋutu nyare nyar nan ko nyaŋu nagon ti ’duddyö kwöŋ na, ti gwon i tiŋdu na rubaŋgajin; nan ’de ’dekan adi ti ŋutu dene den nan Ŋun lwölwöŋ ’yuŋa na rubaŋgajin.

⁷ Lepeŋat aje ’beleŋgu tomoret nio ko se Adama yu, a se gwe i dudumuja na nan nyu.

⁸ Gilada a köji na ŋutu kakonak ti kulya narok, kikolin kanyit a ’yo ’yota ko mokosi logon a rima.

⁹ Nyena a koanejin momori ’börik a teŋ i tatuja na ŋutu i kiko lo tu Sekeme, gwoso karyakak logon domba ŋutu; iŋkoi, a se koŋdi konesi naŋon parik.

¹⁰ Nan aje met ŋo nagon a naron parik i kötumit na Yisaraele, Epuraima a wutön nyu, iŋkoi, Yisaraele a toluta.

¹¹ Do kötumit na Yuda, diŋit ŋeret köti a wulöki do.