Osea 2 - Bibilia Buk na Ŋun nagon koti luŋu a

¹ Nyena a do mo kulyani ko lupösurök adi, Ta a ŋutu kwe, koti a mo kulyani ko kiosurok adi, Ta aje woŋorikin konyen.

MATAT nyanyar ŋutu kanyit logon a ŋaju lepeŋ

² Ŋuti ’bayin a nakwan nio, a nan tine gwon a lalet lonyit, ama tiddye ta takiŋdya Leŋeŋ adi ti nye koloki meddya ko komor na towuton, ko ti nye koloki momoka na kinasi kanyit ti kaluŋe;

³ an nan rusun boŋgwat kanyit kaŋo, a kolokiŋdye Lepeŋ a limu kana gwoso i lor lo yuŋwe ’i nye koju lu, a koŋdi Lepeŋ gwoso yobu kana, a tiŋdi Lepeŋ i gwon gwoso kak nateyon, a kolokiŋdye Lepeŋ i twan ko kure.

⁴ Nan mo koti ti won konyen ko ŋwajik kanyit, kogwon se a ŋwajik lo rye i kiko lo towuton.

⁵ Kogwon ŋote nase a koŋdya towuton; nye na yupuŋdyö se na a koŋdya arabat ’bak yu na kwe, kogwon Lepeŋ kulya adi, Nan de tutu ko kanyarak kwe yu, logon titikin nan kinyo lio se ko pioŋ kwe na mamata, a tiŋdi nan kupir ti köbilu se ko waratat pisite nagon gweya a boŋgwat kwe, ko welet nio se ko yawa kwe.

⁶ Nyena nan MATAT mo ririki kiko lonyit ko kikwa, a nan mo ’duŋge mariŋ nagon teŋgu Lepeŋ, anyen nye gwon ti ryo kikolin kanyit.

⁷ Nye mo kekeporo kanyarak kanyit, ama a nye mo tine ryo se, nye mo gagalara se, ama a nye mo tine ŋu se. A kirut nye mo kulyani adi, Nan mo yiyitwe i lalet lio lo kokwe, kogwon koju a na ’but koyo Iwo-lwöŋ na soŋinana na.

⁸ A nye tine den adi ŋilo a nan koju lo tiŋdu nye ’bolot, ko binyo, se ko welet, a nan iŋge tikin Lepeŋ podo se ko dakaŋ jore parik nagon se kitakiŋdye Bala.

⁹ Nyena nan mo nyonyökörö ’bolot kwe i diŋit nase, ko binyo kwe i diŋit nase; a nan mo ’dumaddi kupir ti köbilu se ko waratat nio pisite nagon gweya a boŋgwat nagon ködyo muggo to ’buson nan-yit.

¹⁰ Nyena a nan mo panyakiŋdye towuton nanyit köke i komor na kanyarak kanyit, a lele ŋuto mo gwe ’bayin logon lwököddu Lepeŋ koyo i konisi.

¹¹ A nan mo to ’duddye lyoŋon nanyit liŋ, kweja adi roriot kanyit, ko diŋitan kanyit ti yaŋa la wilo, ko ti sabatajin kanyit, se ko roriot kanyit liŋ lo wulwe.

¹² A nan mo kököröji kaden kanyit ti binyo se ko kaden kanyit ti ki ’bi, logon nye kulyari adi, Kulo a ropesi kwe logon kanyarak kwe a tikin nan kulo. Nan MATAT mo kökon se a rudu, a kijakwa ti mu ’diŋ mo nyesi se.

¹³ A nan mo riŋge lepeŋ kogwon perok ti roriot logon konaki Balajin, i diŋit nagon lepeŋ ’yurakiŋdye se bökur, a tokweleŋdi mugun ko re ti swo se ko palia ti murut. a galaddi kanyarak kanyit, a boponi nan nu. Kilo a kulyaesi kwe ti MATAT.

¹⁴ Nyenagon, mete, nan mo lulu-kun Lepeŋ, a joŋgi Lepeŋ mu ’diŋ, a jamakiŋdye Lepeŋ kulyaesi lo ’but.

¹⁵ Nyu a nan mo nyokokiŋdye Lepeŋ lukobiot kanyit ti kaden ti binyo, a koŋdi ŋirit na ’dir na luŋu a Sasanyesi anyen wora a kotumit Yenet na kulya na ’but. Nyu a nye mo ruŋge gwoso i perok ti tuko ’disen nanyit, na pori nye kaŋo i jur lo Ejipeto nu.

¹⁶ Nan MATAT lo kulya adi, i ŋilu lor nye mo luluŋ nan adi nan a lalet lonyit, a nye koti mo tine luŋgu nan adi nan a Balas lonyit.

¹⁷ Kogwon nan mo seseyara karin ti Balajin kaŋo kanyit i kutuk, a karin kase mo koti tine ’dinya kwoŋ.

¹⁸ I ŋilu lor a nan mo tetenakiŋdye ŋutu ti Yisaraele tomoret ko kijakwa ti mu ’diŋ, ko kwen ti ki, se ko ŋo lo gwoŋtu kak; a nan mo ’be ’beleŋgi daŋin, ko baŋdujin, se ko tito moriesi i Jur, a nan mo tiŋdi ta i doto ’bak kujono.

¹⁹ A nan mo koti yembi do Jur lo Yisaraele a nakwan nio ŋupi, iŋkoi, a nan mo yemuŋdye do ko torigwo, ko lilija na kulya gwogwo, ko nyaŋu nagon ti ’duddyo kwoŋ, se kowon na konyen.

²⁰ A nan mo yemuŋdye do a mo tine loruggo; a do mo deŋdi nan MATAT.

²¹ a nan MATAT kulyani adi, I Ŋilu lor nan mo ruruk ŋiyet na ’dikolo, a ’dikolo mo ruddye ruggo kak,

²² A kak mo ruddye ruggo ’bolot, ko binyo, se ko welet, a kine ŋo mo ruddye ruggo Yejerele,

²³ a nan mo wekiŋdye ŋutu ti Yisaraele i kak nase a nyomot kwe, a nan mo won konyen ko se na luŋu a Paya, a nan mo kulyani ko se lo luŋu a Luŋai adi, Ta a ŋutu kwe, a se mo kulyani adi, Do a Ŋun likaŋ.