Osea 13 - Bibilia Buk na Ŋun nagon koti luŋu a

Ŋun a tuggo adi kötumit na Yisaraele mo tutukara asut

¹ Na jambi kötumit na Epuraima köju nu, a ŋutu böŋdi böŋdu; Lepeŋat köju bubula i Yisaraele; ama a se iŋge toroŋdya i kwakwad-du na Bala a iŋge twatwa.

² Soŋinana a se kölumbö toroŋdi toroŋdya bia parik, a se tetenakiŋdye ’borik nyömuejin lo ninitö, Lepeŋat a niddyö pödö nase a nyömuejin lo kwakwasa, kine ŋo liŋ a kita na bodwat. A se jambi i kulya kase adi, Ti ŋutu lo ’duŋgö rubaŋgajin ti se ’biuŋdye kaja nagon a nyömuejin.

³ Nyenagon a se gwe gwoso luru lo ko ’bure kode gwoso puŋutut lo lilikara ’de ’de, ko gwoso ŋudi na wuköji kaŋo i pirit gwutet na ’bolot, kode gwoso köŋuröt lo puriun i kulupit.

⁴ Nan a MATAT Ŋun losu suluja i jur lo Ejipeto; ta a ko den lele ŋun ama ta deŋdya nan ka ’de, a lele kalwokönit gwe ’bayin tuŋ a nan.

⁵ Nan köju a den ta i yöbu, i kak nagon a nateyon;

⁶ gwoso nagon ta gwon i pirit yukit. Nyena a ta iŋge yimönö, a nagon ta aje yimönö nu a ta bu ’ye ’börik, a ta iŋge boŋö nan.

⁷ Nyena a nan mo gwe kasu gwoso kömiru, a nan mo dombi ta i merete lo kiko gwoso koka.

⁸ Nan mo lalabakin kasu loki gwoso gworoŋ nagon torela kanyit a ryakaji, a nan mo giddye mara kasu kaŋo, a nan mo nyesi ta nyu gwoso kömiru, gwoso kijakutat lo mu ’diŋ ködyö kekereŋdi ta na.

⁹ Nan mo tutukar do kötumit na Yisaraele; ŋa logon ŋona bubulö parakiŋdya ta?

¹⁰ Soŋinana liya mor losu anyen lwöggu ta? Kuliya ŋutu temejik kasu i köjinö liŋ logon ta a piyun adi ti ta tikine mor se ko kasarak?

¹¹ I woran nio nan a tikin ta moran, a i ŋoma nio a nan iŋge ’dumara Lepeŋat kaŋo.

¹² Lyaŋesi ti Epuraima aje tora, toronjin kanyit aje ’delaki i ŋirit ’delet möŋdu riparikin.

¹³ I diŋit nagon ŋote totomie i ta ’duuŋdyö na lepeŋ nu, a nye gwe gwoso ŋuro logon ti den kulya; a ko diŋit ta ’duet a temakiŋdya a nye tine lupuŋdyo kaŋo i pirit ta ’duet.

¹⁴ Nan ŋona mo Iwolwokun se i riŋit na pirit na mulokö le? Nan gona mo dadakun se i twan le? Do twan, kuliya twana kulok iŋgo? Do pirit na mulokö, niya tukaret inot? Nan ti won konyen ko se kwoŋ.

¹⁵ Ma ’di nye kodyo a radan ko luŋasirik kiden, ama kobuŋot lo ’yure mo popo, köbuŋöt lo MATAT ŋiun i yobu logon toliligga kidia kanyit, a towere ’yi piritön kanyit nagon lelek a pioŋ. A nye mo ’dumaddi tukworien na go kanyit liŋ na gworö go.

¹⁶ Samaria mo ŋogoŋ toron nanyit, kogwon ŋutu kanyit a renya ŋun lose, a se mo tatuani i gor, a luŋudiet kase mo ŋapasakani papasaka, a ŋutu wate kase nagon ko pelela kune mo kikilani kikila.