Nyökit 6 - Bibilia Buk na Ŋun nagon koti luŋu a

Saret duma

¹ A kilo gwe a todinesi, ko saresi lo wurö, ko kulya na ’duŋö nagoŋ MATAT ŋun losu a saŋi nan i todini-kiŋdyö na ta, anyen ta boŋo koŋdya se i lu jur logon ta mo laŋaddu kata i morga na lepeŋ lu;

² anyen ta böŋö kukuk MATAT ŋun losu, ta ko ŋwajik kasu se ko nyakwariat kasu, i ’debba na saresi kanyit liŋ lo wurö se ko jujuwesi kanyit logon nan a saŋi ta kulo, i perok liŋ ti gwiliŋit nasu; anyen ta si ’da ko kiŋajin jore.

³ Nyenagoŋ yiŋge ta pon kötumit na Yisaraele, ko ŋi ta i koŋdya na se; anyen kulya kasu böŋö tu ’bura, anyen ta ŋöŋdi jore i jur logon ko le ko siwatat ’do ’dokon lu, gwoso nagoŋ MATAT ŋun lo merenyejin kasu aje milyekiŋdye ta nu.

⁴ Yiŋge ta pon kötumit na Yisaraele: MATAT ŋun likaŋ a MATAT geleŋ;

⁵ do ködyö nyanyar MATAT ŋun ilot ko töili ilot liŋ, ko ködudwo iŋot liŋ, ko riŋit iŋot liŋ.

⁶ A kilo kulyaesi logon nan a sarakin do i lo lor kulo ködyö gwe konut i töili;

⁷ a do ködyö mimiŋa-kiŋdye se i ŋwajik kulök, a do jama-kiŋdye kulya kase na si ’dari do konut kadi na, ko na wöröri do i kiko, ko na piriki ’e do kak, ko na ŋe do ki.

⁸ A do ködyö torakiŋdye se konut i könin a kweyet, a se gwe a ŋo na dukuki konut i komor i kiden na konyen kulök.

⁹ A do wurökiŋdye se i kaden ti kötumit na kadi iŋot ko i lupesi kunök. Kukuesi an ŋutu ko renya saresi

¹⁰ MATAT ŋun losu mo joŋdya ta i jur logon nye a milyekin merenyejin kasu, logon a ko Abarayama, ko Yisaka, ko Yakobo, adi nye mo tiŋdu ta lepeŋ. Ŋilo jur gwon ko köjinö temejik na ’but nagoŋ ta a ko ’duggö kune,

¹¹ ko kadijik na jore ko ŋo na ’but liŋ nagoŋ ta a ko tiŋdu kune, ko kidiya lo ’boka logon ta a ko ’bok kulo, ko luköbiöt ti kaden ti binyo se ko kaden ti jeitun logon ta a ko ’yut kulo. A nagoŋ ta mo a nyesu a mo yimönöni yimönö nu,

¹² kunyar ta an ta ko boŋo MATAT logon a toyuuŋdyo ta kaŋo i jur lo Ejipeto, i pirit na to ’dupien lo.

¹³ A ta kujonöni MATAT Ŋun losu, a ta kitakiŋdye lepeŋ, a milyeji ’diŋdya karin kanyit.

¹⁴ Ta ködyö ti kepöddu kulye ŋunyen logon a ti gweyajin ti ŋutu logon gwon kasu nyona kulo;

¹⁵ kogwon MATAT Ŋun losu lo gwon kasu kiden lo gwon a Ŋun kayinönit; an komor na MATAT Ŋun losu ko tulekin kasu ki, a nye tukaŋi ta i na kak.

¹⁶ Ta ködyö ti möŋu MATAT Ŋun losu gwoso na möŋi ta lepeŋ Masa nu.

¹⁷ Ta ködyö ’debba saresi ti MATAT Ŋun losu ŋo, se ko todinesi kanyit, ko saresi kanyit lo wurö logon nye a saŋi ta kulo.

¹⁸ A ta ködyö koŋdi kulya na ’but na rigwo ko MATAT i komor, anyen kulya kasu tu ’bura, anyen ta lupö lukata i morga na lu jur lo ’but logon MATAT a milyekin merenyejin kasu,

¹⁹ a riköddi merok kaŋo kasu i komor, gwoso na jambi MATAT na.

²⁰ A ko ŋuro ilot a ŋa do i lele lor lo popo adi, Tokoret a nyo i kine todinesi, ko kilo saresi lo wurö, se ko kine kulya na ’duŋö nagoŋ MATAT Ŋun likaŋ aje sarakin ta kune?

²¹ A do ködyö nyönyökökiŋdye ŋuro ilot adi, Yi köju a gwon a ’dupi ti Paro Ejipeto yu; a MATAT aje toyuuŋdyö yi kaŋo i Ejipeto ko könin iŋgo;

²² MATAT aje tiŋdu ŋutu ti Ejipeto, ko Paro, ko mede nanyit liŋ kweyesi ko sörösi temejik ko a na ŋo, a yi ko ’börik memeddya.

²³ A nye aje toyuuŋdyö yi kaŋo nyu, anyen nye böŋö tolupuŋdyö yi lukata, i tiŋdu na yi jur logon nye aje milyekin merenyejin kaŋ lu.

²⁴ A MATAT aje sarakin yi i koŋdya na kilo saresi liŋ lo wurö, i kugga na MATAT Ŋun likaŋ, anyen gwon a na ’but kayaŋ perok liŋ, anyen nye böŋö tiŋdu yi gwon jörun, gwoso na lo lor na.

²⁵ A ŋina mo gwe a puret na ’but kayaŋ koyi ködyö tiju i koŋdya na kilo saresi liŋ ko MATAT Ŋun likaŋ i komor gwoso nagoŋ nye aje saŋi yi na.