Nyökit 5 - Bibilia Buk na Ŋun nagon koti luŋu a

Saresi Puök

¹ A Mose luŋgi ŋutu ti Yisaraele liŋ a kulyani ko se adi, Ta kötumit na Yisaraele, yiŋge ta saresi lo wurö, se ko kulya na ’duŋö nagoŋ nan jamakin kasu i swö i lo lor kune, anyen ta ködyö jujumbu se, ko i tiju i koŋdya na se.

² MATAT ŋun likaŋ a teteŋdya tomoret koyi Orebe yu.

³ MATAT a koteteŋdya ŋina tomoret ko merenyejin kaŋ, ama teteŋdya koyi ko ’börik kaŋ, kweja adi yi liŋ ni logon gwon jörun i lo lor kulo.

⁴ MATAT a jambu ko ta a lokomor i lu mere, i kimaŋ lukata.

⁵ A i nu diŋit a nan gwo ’de i kiden nasu ko MATAT i kwekiŋdya na ta kulyaet lo MATAT; kogwon ta kujönö kulya ti kimaŋ, a ta gwe a ko tu ki i mere. A nye kulyani adi:

⁶ Nan logon a MATAT ŋun ilot, logon a joŋdya do kaŋo i jur lo Ejipeto, i pirit na to ’dupien.

⁷ Do ködyö ti gwon ko kulye ŋunyen kwöŋ, ama ka ’de nan.

⁸ Do ködyö ti tetenakiŋdya mugun nene nyömue na gigiru a gwuluet na ŋo ti ki yu, kode ŋo ti kak ni, kode ŋo ti pioŋ lukata.

⁹ Do ködyö ti rugwuŋöki kase i komor, do ködyö ti twöju se; kogwon nan MATAT ŋun ilot gwon a ŋun logon a kayinönit. Nan tiŋdu toronjin kase komonye ko torela i kusik tojo ko nyakwari tomusala ko toiŋwan ti ŋutu logon maman nan kilo,

¹⁰ ama nan nyaŋu ŋutu ko nyaŋu nagoŋ ti ’duddyö kwöŋ kweja adi nan nyaŋu ŋutu alipan logon nyanyar nan ko ’de ’deŋ saresi kwe kilo.

¹¹ Do ködyö ti ’diŋdya karin ti MATAT ŋun ilot kana; kogwon MATAT ti jaran i ’duŋökiŋdyo na putet i ŋuto logon ’diŋdya karin kanyit kana lo.

¹² Tiji ŋu i ’debba na lor lo sabata a loke, gwoso nagoŋ MATAT ŋun ilot a saŋi do na.

¹³ Do ködyö kita perok buker, a do koŋdi kita iŋot liŋ;

¹⁴ ama lor toburyo a sabata lo MATAT ŋun ilot; i ŋilo lor do ködyö ti koŋdya kita nene kwöŋ, do ko ŋuro ilot, ko ŋuro iŋot, ko kölipönit ilot, ko kölipönit iŋot, ko dwöt ilot, ko kaine iŋot, kode nene na toro ’bo kunök, kode ŋuto lo si ’da a lepetyo kasu i jur lo, anyen kölipönit ilot ko kölipönit iŋot böŋö yuyukan gwoso iŋot na.

¹⁵ Do ködyö yiyiuŋdyö adi do köju a gwon a ’dupiet i jur lo Ejipeto, a MATAT ŋun ilot aje toyuuŋdyö do kaŋo nyu ko könin iŋgo lo riöji, nyenagoŋ a MATAT ŋun ilot saŋi do i ’debba na lor lo sabata.

¹⁶ Bule bu munyi se ko ŋuti, gwoso nagoŋ MATAT ŋun ilot a saŋi do; anyen do si ’da kiŋajin jore, a kulya kunök iti ’bura i ŋilu jur logon MATAT ŋun ilot a tin do lu.

¹⁷ Do ködyö ti tatuja ŋuto.

¹⁸ Do ködyö ti lubbö.

¹⁹ Do ködyö ti koko ’ya.

²⁰ Do ködyö ti lipikiŋdyö marate ilot.

²¹ Do ködyö ti be ’ya narakwan na marate ilot; a do ködyö tine be ’ya kadi na marate ilot, kode melesen nanyit, kode kölipönit lonyit, kode kölipönit nanyit, kode dwöt lonyit, kode kaine nanyit, kode nene ŋo na gwon a na marate ilot,

²² A MATAT jambi kilo kulyaesi ko gworo lobot i momoret nasu liŋ i mere yu i lukata na kimaŋ, ko luru lo piddya se ko mudwe logon adi ’dii; a tine ’yalakiŋdya kunie kulya. A nye wurö-kiŋdye se i ŋurupö na ’dayatak murek, a tiŋdi nan se.

Ŋutu kukujönö

²³ A ko gwe sona na yiŋuŋdye ta lu gworo i lukata na mudwe, na tule ’yi lu mere ko kimaŋ nu, a ta logon a kusik liŋ ti kötumitön kasu se ko ŋutu temejik kasu kulo aje poŋdya köyö nyona.

²⁴ A ta kulyani adi, Meddi, MATAT ŋun likaŋ aje kwekiŋdya yi minyo lonyit ko todumalan nanyit; a yi aje yiŋun gworo lonyit i lukata na kimaŋ; a i lo lor yi aje meddya adi ŋun bubulö jambu ko ŋutu a se gwe a ko twatwa.

²⁵ Nyena nyo nagoŋ yi ködyö twatwa? Kogwon na kimaŋ duma mo totumbo yi; koyi a yiŋga gworo lo MATAT ŋun likaŋ koti a yi mo twatwane twatwa.

²⁶ Kogwon ŋuto a ŋa i ŋo liŋ lo gwon jörun kulo logon aje yiŋga gworo lo ŋun lo gwon jorun lo i jambu i lukata na kimaŋ gwoso nikaŋ na, a nye gwe a ko twan le?

²⁷ Iti nyona, ko yiŋge ŋo liŋ nagoŋ MATAT ŋun likaŋ de kuku-lyari kine, ko nyönyökökiŋdye yi ŋo liŋ nagoŋ MATAT ŋun likaŋ de jamakin do kune; a yi mo yiŋge a koŋdi se.

²⁸ A MATAT aje yiŋ kulyaesi kasu, na jama-kiŋdye ta nan nu; a MATAT kulyani ko nan adi, Nan aje yiŋ kulyaesi ti kilo ŋutu logon se aje jamakin do kulo; se a jambu ’bura i ŋo liŋ na jam se kune.

²⁹ Ködyö a na ’but ko se gwon ko yeyeet gwoso ŋina temba i perok liŋ i kugga na nan ko i ’debba na saresi kwe liŋ, anyen kulya kase ködyö tu ’bura se ko ŋwajik kase ŋupi!

³⁰ Iti ko jambi ko se adi, Yitöni ta kasu i mera.

³¹ Ama ti do gwo ’de köyö nyona ni, a nan de takiŋdye do jujuwesi, ko saresi lo wurö, se ko kulya na ’duŋö nagoŋ do ködyö todinikin se kune, anyen se böŋö koŋdya se i lu jur logon nan mo tin se i ’debba lu.

³² A ta ködyö ŋi i koŋdya gwoso nagoŋ MATAT ŋun losu a sarakiŋdye ta na; a ta ködyö tine girara i swot lo lutaten kode lo kadoŋe.

³³ A ta ködyö wöröjine i kiko liŋ logon MATAT ŋun losu a saŋi ta lo, anyen ta böŋö gwon jörun, ko anyen kulya kasu böŋö tu ’bura, anyen ta si ’da kiŋajin jore i lu jur logon ta mo ’de ’deŋ lu.