Nyökit 33 - Bibilia Buk na Ŋun nagon koti luŋu a

Mose a ’boroja kötumitön ti Yisaraele

¹ A kune gwe a ’boriesi nagoŋ Mose ŋuto lo Ŋun a ’boroji ŋutu ti Yisaraele i ŋerot na twan nanyit nu.

² A nye kulyani adi, MATAT a poŋdya kaŋo Sinai, a nyeraki suluja Seir; a nye Iŋuŋdye i mere lo luŋu a Paran, a nye poŋdi kaŋo i alipan puök ti alipan ti kurumi na ŋutu loke ti ki, ko kimaŋ na tutule kanyit i könin lutaten.

³ Nye nyanyar ŋutu kanyit; a ŋutu lo gelwe kanyit liŋ-gwe konut i könin; a se momoruŋdye kak konut i mokosi, i wuju na saresi kulök.

⁴ Mose a sarakiŋdya yi kilo saresi, anyen gwon a lomoriot ti kötumit na Yakobo.

⁵ A MATAT gwe a mor Yesurun yu, na momoruŋdye kusik ti ŋutu, se ko kötumitön liŋ ti Yisaraele i pirit na geleŋ nu.

⁶ Ti Rubena gwe jörun, ti nye gwe ti twan, ama ti ŋutu kanyit gwe ku ’dik.

⁷ A Mose jambi i kulya ti Yuda adi, Pon MATAT, yiŋge gworo lo Yuda, tomoraddi lepeŋ i ŋutu kanyit. Ti nye mörökiŋdye mugun ko könisi kanyit, a do mo gwe a kaparanit lonyit i te ’ya na kaŋisak kanyit.

⁸ A nye jambi i kulya ti Lewi adi, Tumim se ko Urim kunök a tiki katwöyönit ilot, logon do aje möŋu Masa yu lo, logon do aje woŋgi i lelekesi ti pioŋ ti Meriba lu;

⁹ logon kulya adi nye ti yeyeju ko monye se ko ŋote; nye a ko ruk luŋasirik kanyit, a tine den ŋwajik kanyit. Kogwon Lewijin aje tiju kulyaet ilot, ko a ’debba tomoret iŋot.

¹⁰ A se todinikiŋdye Yakobo kulya na ’duŋ do kune, iŋkoi se todinikiŋdyö Yisaraele saresi kulök, a se wukiŋdye do bökur, se ko rubaŋga lo ’yu ’yura ’buluŋ konut i pirit ’yuret loki.

¹¹ Pon MATAT, ’boroji ŋo kanyit, ruŋge kita na kon nye na; ’be ’beleŋgi nyutiet ti merok logon ŋikin ko lepeŋ kulo, iŋkoi nyutiet ti ŋutu lo maman lepeŋ kulo, an se ŋikin ki köti.

¹² A nye jambi i kulya ti Benyamina adi, Lo nyanyara lo MATAT si ’da ’bura kanyit nyona ’bak kujönö; a nye gabbi lepeŋ perok liŋ, a nye si ’dani i kiden na geliya kanyit.

¹³ A nye jambi i kulya ti Yosepa adi, Ti MATAT ’borone ’boro kak nanyit, ti nye tiŋdi lepeŋ ’dokesi nyu-nyumöt na po ki yu ko i puŋutut, ko i lelekesi ti pioŋ.

¹⁴ Ti nye tiŋdi lepeŋ nyunyumöt ti ludweki lo radan ko kolor, ko rit lo kinyojin ti yapala,

¹⁵ ko ŋo lo ’but lo ’duruŋdyö i merya logon kata suluja ’beron, ko nyunyumöt ti lurwat lo yeyeŋon nyin,

¹⁶ ko nyunyumöt ti kak se ko tojore nanyit. Ti nye logon si ’da i rudu lo tutule lo tiŋdi lepeŋ ’busan. Ti kine ’boriesi poki ko Yosepa i kwe, iŋkoi ti se poki i jurku ’diet na kwe na ŋuto logon a gelwe i kiden na luŋasirik kanyit lo.

¹⁷ Lepeŋ a dwöt logon a kayu lo ’but lokwekwelen, a oŋgwora kanyit gwe gwoso ti mekor; a nye mo siöddi gweyajin ti ŋutu liŋ tojo ko ’dutesi ti kak. ŋutu alipan puök ti alipan ti Epuraima, ko ŋutu alipan ti Manase köti mo gwe sona.

¹⁸ A nye jambi i kulya ti Jebulun adi, Jebulun, lyöŋi ta lyoŋön i tu nasu kaŋo, Yisakar, lyöŋi ta lyöŋön na gwoŋdi ta i kemialan.

¹⁹ A se mo luŋgi gweyajin ti ŋutu kase i mere; a se mo wukiŋdye rubaŋgajin ti torigwo nyu; a se nyesi ŋo lo jore ti toron ti ’balaŋ, se ko tukwörien na ’dela i sese.

²⁰ A nye jambi i kulya ti Gada adi, Ti ŋuto logon tugalaŋgu kak na Gada lo ti nye ’boriani ’boria! Gada rosokaki kak gwoso komiru nakwan, a nye roŋdi kidyö se ko jurku ’diet.

²¹ Nye a wulökiŋdyo mugun waŋet na lu jur, a kak nagoŋ a na kasaranit ’duki a nanyit; a nye gwe a lele lo kanyomok ti kulu ŋutu, a nye koŋdi torigwo na MATAT, se ko kulya na ’duŋ lepeŋ kune ko Yisaraele kiden.

²² A nye jambi i kulya ti Dan adi, Dan a tore lo kömiru, logon labara kaŋo Basan yu.

²³ A nye jambi i kulya ti Napatali adi, Do Napatali, logon a wuju ’busan duma parik, logon a jore ko ’boriesi ti MATAT lo, ’debbi tor ko swöt lo loki.

²⁴ A nye jambi i kulya ti Aser adi, Ti Aser ’boriani lwolwoŋ kulye ŋwajik; ti lepeŋ gwe a lonyanyara i kiden na luŋasirik kanyit, ko ti nye jurutökiŋdye ’dapanit nanyit i welet.

²⁵ Tokowesi kunök ti kötumit mo gwon a witiöt ko a mölwö; a do mo yeŋe ko riŋit temba na gwoŋdi do jörun na.

²⁶ Do Yesurun, ŋuto ’bayin gwoso Ŋun logon wökön i kiden na ’dikolo i parakiŋdya na do, logon po i ’dikolo lukata ko tomoran.

²⁷ Ŋun lo yeŋ nyin lo gwon a pirit si ’daet iŋot, a könisi kanyit tine jaran kwöŋ i ’debba na do ŋupi. A nye riköddi merok kaŋo konut ŋerot, a kulyani adi, Tukare lepeŋat.

²⁸ A ŋutu ti Yisaraele si ’dani ’bura ’bak kujönö, iŋkoi nyakwariat ti Yakobo si ’da ka ’delokon i jur logon a lo ’bolot se ko binyo; logon luŋa köti ’dikolo kanyit a lilimba lu.

²⁹ Ta ŋutu ti Yisaraele ’diri a kalyöŋök! Ko ŋa logon gwoso ta logon a gweya na ŋutu logon MATAT a lwök kulo! MATAT a ’buku paret nasu, ko a baŋdu telet losu. A merok kasu mo mamanyuŋdye kasu ni; a ta mo ryoryöggi ko ’dulan kase.