Nyökit 31 - Bibilia Buk na Ŋun nagon koti luŋu a

Yosua a wulwe i ruddya na Mose

¹ A Mose köti poki i jamakiŋdya na ŋutu liŋ ti Yisaraele kilo kulyaesi.

² A nye kulyani ko lepeŋat adi, Nan gwe ko kiŋajin mia geleŋ ko merya murek i lo lor; nan köti ti bulö wöröji kaŋo. A MATAT aje kulya ko nan adi, Do mo ti laŋaddu i nu pele na ŋilo Yardene.

³ A MATAT Ŋun losu mo lo laŋaddi kasu ŋerot, a nye mo tukaŋi kulu jurön kasu i komor, a ta mo ruddye lepeŋat; a Yosua mo gwe a kanyömönit losu a laŋaddi kare kasu ŋerot, gwoso na jambi MATAT nu.

⁴ A MATAT mo konakiŋdye kulu jurön gwoso na konakiŋdye nye Sikon ko ŋga, moran ti Amori, ko jur lose, na tukaŋi nye se nu.

⁵ A MATAT mo pakiŋdye se kasu i könisi, a ta mo konakiŋdye se gwoso i kilo saresi liŋ logon nan a saŋi ta kilo.

⁶ Gwe ta a iŋgo ko a purwat, ko kujönö ta, ko rigwökö ta ko se: kogwon MATAT Ŋun losu lo tu ko ta; a nye mo tine koruŋdya mugun kaŋo kasu, kode kö ’yu ta.

⁷ A Mose luŋgi Yosua, a kulyani ko lepeŋ ko Yisaraele liŋ i komor adi, Gwe do a iŋgo ko a purutat; kogwon do agu ködyö tu ko kulo ŋutu tojo i lu jur logon MATAT a milyekin merenyejin kase i tiŋdu na se lu; a do ködyö tiŋdi se i morga na lepeŋ.

⁸ A MATAT lepeŋ mo iti konut ŋerot; a nye mo gwe ko do, a nye tine koruŋdya mugun kaŋo konut, kode kö ’yu do; an do ko kujönö, ko an do ko delya.

Saresi ködyö kekena temba i kiŋajin buryo

⁹ A Mose wurie kilo saresi, a tiŋdi se ko koanejin logon a nyakwariat ti Lewi, lo ’doggu nu saŋduk na tomoret na MATAT kulo, ko i temejik ti Yisaraele liŋ.

¹⁰ A Mose saŋi se adi, Temba i kiŋajin buryo, i diŋit na wulwe na kiŋa logon a topitökin ko ’börik i möriöt kasu ko i rorwe lo murugujin,

¹¹ na poŋdi ta ŋutu liŋ ti Yisaraele ko MATAT Ŋun losu i komor i nu pirit nagoŋ nye mo wuwulun nu, a ta ködyö kenakiŋdye ŋutu liŋ ti Yisaraele kilo saresi anyen se yiyiŋ.

¹² Momoruŋdye ta kulo ŋutu, lulyan ko nawate, ko lupudiet, ko ŋutu lo si ’da a lepelok kasu i turön, anyen se böŋö yiŋga ko jujumbu i kugga na MATAT Ŋun losu, ko tiju i koŋdya na kulyaesi liŋ ti kilo saresi,

¹³ ko anyen ŋwajik kasu logon a ko den se böŋö yiŋga ko jujumbu, i kugga na MATAT Ŋun losu, temba i gwolor nasu i lu jur logon ta mo laŋaddu i nu pele na Yardene i morga lu.

Saresi ti ’dutet logon MATAT a sarakin Mose kulo

¹⁴ A MATAT kulyani ko Mose adi, Meddi, perok twaesi kulök gwe nyona; luŋgi Yosua, ko kwekiŋdye ta ’börik i kemia torumet anyen nan böŋö saŋu lepeŋ. A Mose ko Yosua iti tu a kwekiŋdye ’börik i kemia torumet.

¹⁵ A MATAT puköki i kemia torumet i bilili lo luru lukata; a lu bilili lo luru gwo ’de i kötumit na kemia torumet.

¹⁶ A MATAT kulyani ko Mose adi, Mete, do lo gwe nyona ko twan gwoso merenyejin kulök; a kulo ŋutu mo ŋiki i biryeni na ’börik gwoso ŋutu kalupök i kulye Ŋun yen ka ’de ka ’de ti lu jur logon se a tu kase kiden kulu, a se mo kö ’yi nan a mo ’beleŋgi tomoret nio nagoŋ nan aje teteŋdya ko se na.

¹⁷ A kirut woran nio mo tuleki i se i lu lor, a nan mo kö ’yi se, a mo ’de ’yi komor nio ko se, a se mo tukarani tukara; a ŋo narok jore se ko yöyöŋesi mo ryeji se, a se mo pije i ŋilu lor adi, Kine ŋo narok a ryeju yi kogwon Ŋun likaŋ ’bayin kayaŋ kiden le?

¹⁸ ’Diri a nan mo ’de ’yi ’de ’ya komor nio i lu lor kogwon kulya narok liŋ na kon se kunu, kogwon se aje löpuköddu i kulye Ŋunyen.

¹⁹ Nyenagoŋ ti do wurökiŋdye ŋilo köli a losu, ko ti do tojumukiŋdye ŋutu ti Yisaraele i yolo na nye, anyen ŋilo köli böŋö gwon a tokoret nio i ŋutu ti Yisaraele.

²⁰ Kogwon molu ko nan aje joŋdya se i jur logon ko le ko siwatat ’do ’dokon kata lu, logon nan a milyekin merenyejin kase lu, a ko se aje nyesu, a yimönöni yimönö, a pire pirön, a se mo löpu-köddi i kulye Ŋunyen a kitakiŋdye se, a mo lauŋdye nan, a mo ’beleŋgi tomoret nio.

²¹ A mo gwe sona, na pokiŋdye ŋo narok jore ko yöyöŋesi ko se nu, a ŋilo köli mo tokurukiŋdye se kulya kwe a tokoret nio, kogwon nye mo ti likin i kutusen ti nyakwariat kase; kogwon i lo lor nan deden yeyeesi kase i ŋo nagoŋ se mo kökon kunu, a kokwe na joŋgi nan se i lu jur logon nan a milyekin se lu.

²² A Mose wuŋe ŋilo köli i ŋilu lor, a todinikiŋdye ŋutu ti Yisaraele.

²³ A MATAT saŋi Yosua ŋuro lo Nun adi, Gwe do a iŋgo ko a purutat; kogwon do mo joŋga ŋutu ti Yisaraele i lu jur logon nan a milyekin se lu; a nan mo gwe ko do.

²⁴ A ko gwe sona, na tutuŋge Mose i wuŋö na kulyaesi ti kilo saresi i buk, tojo ko ’duddyö na se nu,

²⁵ a Mose saŋi ŋutu ti Lewi ka ’dokök ti saŋduk na tomoret na MATAT kulo adi,

²⁶ ’Dumaddi ta ŋina buk na saresi, ko tiki ta lepeŋ i merete lo saŋduk na tomoret na MATAT Ŋun losu, anyen nye böŋö gwolor nyu a tokoret nasu.

²⁷ Kogwon nan a den adi ta a ŋutu karerenyak ko logon ko murutö a nawo ’duŋak; meddi ta, temba i gwolor nio ko ta i lo lor, ta aje rerenya ko MATAT, a mo kirut gwe ada i mukök na twan nio?

²⁸ Momoraki ta nan temejik ti kötumitön kasu liŋ, ko katiyuk kasu, anyen nan böŋö jamakiŋdya se kilo kulyaesi kase i swö i luŋgu na ki ko kak a katökorok kase.

²⁹ Kogwon nan a den adi i mukök na twan nio ta ’diri mo ’yö ’yot ’börik asut, a ta mo löpuköddi kaŋo i kiko logon nan a saŋi ta lo; a kulya narok mo poki kasu i kulye perok ti ŋerot, kogwon ta mo koŋdya ŋo nagoŋ a narok ko MATAT i komor, i towoŋa na nye, kogwon konesi kasu.

Köli lo Mose

³⁰ A Mose nyönyökökiŋdye momoret na ŋutu liŋ ti Yisaraele kulyaesi ti ŋilo köli tojo ko ’dutet nase adi,