Nyökit 29 - Bibilia Buk na Ŋun nagon koti luŋu a

Tomoret nagoŋ MATAT a teten ko ŋutu ti Yisaraele i jur lo Moaba

¹ A kilo gwe a kulyaesi ti tomoret nagoŋ MATAT a saŋi Mose i teteŋdya ko ŋutu ti Yisaraele i jur lo Moaba, wat nu tomoret na teten nye ko lepeŋat Orebe nu.

² A Mose luŋgi ŋutu liŋ ti Yisaraele a kulyani ko se adi, Ta aje met ŋo liŋ nagoŋ MATAT a konakin Paro ko kölipönök kanyit liŋ ko jur lonyit liŋ kasu i komor i jur lo Ejipeto nu,

³ kweja adi möriesi temejik, ko kweyesi, se ko sörösi temejik nagoŋ ta a met ko konyen kasu kiinu;

⁴ a MATAT gwe a ko tiŋdu ta töilyet lo kukuruŋdyö, ko konyen metesi, kode swö yiŋesi tojo ko lo lor.

⁵ A nan aje nyömuŋdyö ta kiŋajin merya Iŋwan i yöbu; a boŋgwat kasu gwe a ko poŋdya a ŋörökök kasu i mugunya, a kamuka kasu gwe a ko poŋdya a ŋörökök kasu i mokosi;

⁶ köti ta a ko nyesu ambata, a ta gwe a ko möju binyo kode yawa na pötwör; anyen ta böŋö deden adi nye a MATAT Ŋun losu.

⁷ A na ’durökiŋdye ta i na pirit na, a Sikon mor lo Kesebon ko ŋga mor lo Basan ŋiu kaŋo i mörö koyi, ama a yi iŋge te lepeŋat;

⁸ a yi morgi jur lose, a tiŋdi ŋutu ti Rubena, ko ti Gada, ko ti swöt lo kötumit na Manase i morga a lose.

⁹ Nyena tiji ta tiju i koŋdya na kulyaesi ti ŋina tomoret, anyen ta puputuru ŋerot i ŋo liŋ nagoŋ ta kökon kine.

¹⁰ Ta liŋ i lo lor gwogwo ’dan ko MATAT Ŋun losu i komor; kweja adi kusik ti kötumitön kasu, ko temejik kasu, ko katiyuk kasu, iŋkoi ŋutu ti Yisaraele luŋ a liŋ,

¹¹ ko ŋwajik kasu lo ’di ’dik, ko wate kasu, ko ŋutu logon si ’da a lepelok lo gwon kasu i mera kulo, suluja ko katokok ti kaden kasu tojo ko ka ’yilak ti pioŋ kasu,

¹² anyen ta böŋö pokin i tomoret na MATAT Ŋun losu, ko i milye lonyit, logon MATAT Ŋun losu a tetenakin ta i lo lor lo;

¹³ anyen nye böŋö togwi ’dikin ta ŋo i lo lor a gweya na ŋutu kanyit, anyen nye böŋö gwon a Ŋun losu gwoso na jamakiŋdye nye ta nu, ko gwoso na milyekiŋdye nye merenyejin kasu nu logon a ko Abarayama, ko Yisaka, ko Yakobo.

¹⁴ Nan ti teteŋdya na tomoret ko lo milye ko ta ka ’de tuŋ,

¹⁵ ama ko se lo gwo ’dan kayaŋ ni ko MATAT Ŋun likaŋ i lo lor, köti ko se logon ’bayin kayaŋ ni i lo lor kulo.

¹⁶ Ta a den si ’da nikaŋ i jur lo Ejipeto köju nu, ko Yuörö nikaŋ kaŋo i kiden na jurön lo lwöpuŋdye ta kulu;

¹⁷ a ta aje met ŋo kase na mamana, nagoŋ a nyömuejin logon a kaden ko a ŋurupö, ko a pödö ko a dakap, nagoŋ gwon kase kiden kune.

¹⁸ Kunyar ta, an lele ŋuto kasu kiden, kode nene ŋuto, kode nene mede, kode kötumit, logon töili lonyit löpuköddu kaŋo ko MATAT Ŋun likaŋ i lo lor i tu i kitakiŋdya na Ŋunyen ti kulu jurön; an kokorite ko gwon kasu kiden nagoŋ tiŋdu lo ’burtölöŋ ko kuruyuk na pötwör.

¹⁹ Kunyar ta köti an lo ŋuto ko yiŋga kulyaesi ti ŋilo milye a bu ’ye mugun kanyit i töili adi, Nan mo gwe a lo ’but, ma ’di napon nan yeŋoro wörö i topolon na töili liŋ. A ŋo gwoso kine mo tiŋdi köbuŋöt i wuköddu kaŋo ko ŋo lo ’but ko lorok i pirit na geleŋ.

²⁰ A kirut MATAT mo tine pitökin lepeŋ, ama kölumbö a woran na MATAT se ko yulön nanyit puriörö ki ko lu ŋuto, a lömisi liŋ logon a wuröki i ŋina buk kulo mo poki kanyit loki, a MATAT mo seyaddi karin kanyit kaŋo i kak ’bukuluŋ.

²¹ A MATAT mo geluŋdye lepeŋ a lo toron i kötumitön liŋ ti Yisaraele, gwoso i lömisi liŋ ti na tomoret nagoŋ a wuröki i na buk na saresi na.

²² A ŋwajik kasu ti toberon na popo logon mo pukun kasu i mukök, ko Lwaka lo poŋdya i jur lo pajo kulo, mo meddi riŋesi ti lu jur, se ko gilesi nagoŋ MATAT a togilöji ŋutu kanyit kunu.

²³ Se mo memet adi kak liŋ a pisek ko a ’balaŋ, ko a ’yura, ko a ko weya, a ŋo nene gwe ’bayin na pipilu, a döru tine wilan kata, gwoso i diŋit na söpuköri Sodoma ko pomora, ko Adema ko Seboim nagoŋ MATAT a söpukökin i woran ko i yulön nanyit.

²⁴ Nyena lepeŋat se ko jurön liŋ mo ŋa adi, Ko nyo nagoŋ MATAT a konakiŋdya ŋilo jur sona? Tupape na ŋina woran duma kweja nyo?

²⁵ A kirut ŋutu mo ruŋge adi, Kine kulya gwon sona, kogwon se a paju tomoret na MATAT Ŋun lo merenyejin kase na teten nye ko lepeŋat na joŋdi nye se kaŋo i jur lo Ejipeto nu,

²⁶ a se iti i kitakiŋdya na kulye Ŋunyen a kwakwaddi se, (kilo a Ŋunyen logon se a ko den, logon MATAT a ko tin lepeŋat se);

²⁷ nyenagoŋ a woran na MATAT iŋge tulekin i lu jur, i jakiŋdya na lepeŋ lömisi liŋ na wuröki i ŋina buk;

²⁸ a MATAT iŋge gwunyun se kaŋo i jur ko woran, ko yulön, se ko tukaŋan a duma, a gubaddi se i lele jur, gwoso na lo lor na.

²⁹ A lwönö gwe a ti MATAT Ŋun likaŋ ka ’de; ama ŋo na kwekweya a kaŋ ko a ti ŋwajik kaŋ ŋupi, anyen yi böŋö koŋdya kulyaesi liŋ ti kilo saresi.