Nyökit 27 - Bibilia Buk na Ŋun nagon koti luŋu a

Saresi ködyö wuröki kak i mere Ebala

¹ A Mose se ko temejik ti Yisaraele saŋi kulu ŋutu adi, ’Debbi ta saresi liŋ logon nan a saŋi ta i lo lor kulo.

² A i lor logon ta mo laŋaddu i nu pele na Yardene tojo i jur logon MATAT Ŋun losu mo titin ta lu, a ta ködyö togwi ’dikiŋdye ŋurupö temejik ki, a we ’yi se ko buya lokwe;

³ a ta ködyö wurökiŋdye kase loki kulyaesi liŋ ti kilo saresi, na laŋaddi ta nu i lupö i lu jur logon MATAT Ŋun losu mo titin ta lu, ŋilo a jur logon ko le ko siwatat ’do ’dokon kata lu, gwoso nagoŋ MATAT Ŋun lo merenyejin kasu aje milyekiŋdye ta nu.

⁴ A nagoŋ ta aje laŋaddu i nu pele na Yardene, a ta ködyö togwi ’dikiŋdye kilu ŋurupö ki i mere Ebala, logon nan a sarakin ta kulya kase i lo lor kulo, a ta we ’yi se ko buya lokwe.

⁵ A ta ködyö dipakiŋdye pirit ’yuret na rubaŋgajin ti MATAT Ŋun losu nyu; ŋina pirit ’yuret na rubaŋgajin ködyö tetena ko ŋurupö, a ta tine teten ko witi.

⁶ Ta ködyö dibba ŋina pirit ’yuret na rubaŋgajin ti MATAT Ŋun losu ko ŋurupö logon a ko gwagwalaka; a ta wukiŋdye rubaŋgajin lo ’yu ’yura ’buluŋ nyu a ti MATAT Ŋun losu;

⁷ a ta ködyö ’duŋge rubaŋgajin ti taliŋ nyu; a ta ködyö nyesi nyu, a ta lyöŋi lyöŋön ko MATAT Ŋun losu i komor.

⁸ a ta ködyö wurökiŋdye i loki na kilo ŋurupö kulyaesi liŋ ti kilo saresi a lo kukurwe ko a lo ’but.

⁹ A Mose se ko koanejin Lewijin kulyani ko ŋutu liŋ ti Yisaraele adi, Ta ŋutu ti Yisaraele, gwe ta taliŋ, ko yiŋge ta: i lo lor ta a po a gweya na ŋutu ti MATAT Ŋun losu.

¹⁰ Nyenagoŋ ta ködyö yiŋga gworo lo MATAT Ŋun losu, i koŋdya na jujuwesi kanyit, se ko saresi kanyit lo wurö, logon nan aje sarakin ta i lo lor kulo.

Lömisi na jama i mere Ebala

¹¹ A Mose saŋi kulu ŋutu i lu lor gwak adi,

¹² Ko ta aje laŋaddu i nu pele na Yardene, ti kine kötumitön gwo ’de i mere Gerrim i ’boroja na ŋutu: kweja adi kötumit na Simeona, ko na Lewi, ko na Yuda, ko na Yisakar, ko na Yosepa, ko na Benyamina.

¹³ A ti kine kötumitön gwo ’de i mere Ebala a kalömök: kweja adi, kötumit na Rubena, ko na Gada, ko na Aser, ko na Jebulun, ko na Dan, ko na Napatali.

¹⁴ A ti Lewijin laikiŋdye ko gworo lobot i ŋutu ti Yisaraele liŋ adi,

¹⁵ ŋuto a lömö logon a teteŋdya nyömue na gigiru, kode na ninitö nagoŋ MATAT maman, nagoŋ a kita na bodo na, ko a togwi ’dikin ŋina nyömue ki a lwön. A ti ŋutu liŋ ruŋge adi, Amin.

¹⁶ Nye a lömö logon a to ’diddya monye kode ŋote. A ti ŋutu liŋ ruŋge adi, Amin.

¹⁷ Nye a lömö logon a tomijöddu ŋurupö koresi ti kak na marate lonyit. A ti ŋutu liŋ ruŋge adi, Amin.

¹⁸ Nye a lomö logon a togiraddu ŋuto mo ’doke kaŋo i kiko. A ti ŋutu liŋ ruŋge adi, Amin.

¹⁹ Nye a lömö logon a tukwölöŋgu putet lo ŋutu lo si ’da a lepelok, kode lo kikjiiko, kode lo karu ’bejin. A ti ŋutu liŋ ruŋge adi, Amin.

²⁰ Nye a lömö logon a doto ko nakwan na monye, kogwon nye a laŋgu dotoesi ti monye. A ti ŋutu liŋ ruŋge adi, Amin.

²¹ Nye a lomo logon a doto ko nene gweyari na turu ’buti. A ti ŋutu liŋ ruŋge adi, Amin.

²² Nye a lömö logon a doto ko kiaser nanyit, kode a ŋuro na monye, kode a ŋuro na ŋote. A ti ŋutu liŋ ruŋge adi, Amin.

²³ Nye a lomö logon a doto ko moken nanyit. A ti ŋutu liŋ ruŋge adi, Amin.

²⁴ Nye a lomo logon a domba marate lonyit i tatuja na lepeŋ a lwön. A ti ŋutu liŋ ruŋge adi, Amin.

²⁵ Nye a lomo logon a ropaki ŋo a lwon i tatuja na ŋuto logon ’bak kulya. A ti ŋutu liŋ ruŋge adi, Amin.

²⁶ Nye a lömö logon a ko ’debba a ’diri kulyaesi liŋ ti kilo saresi i koŋdya na se liŋ. A ti ŋutu liŋ ruŋge adi, Amin.