Nyökit 25 - Bibilia Buk na Ŋun nagon koti luŋu a

¹ Ko ŋutu gwon ko nene rerenyet kase kiden, a se iti i putet, a ka ’duŋok ’duŋokiŋdye i kiden nase, a se ködyö keŋdi ŋuto lo rigwo adi ’bak kulya, a ’duŋokiŋdye katoronyanit putet.

² A mo gwe sona adi, ko lu katoronyanit a logon ’bi ’bitö, a ka ’duŋonit ködyö topirikiŋdye lepeŋ kak, a tiŋdi lepeŋ i ’bito kanyit i komor gwoso i ’duŋet na toron nanyit.

³ A nye ködyö kenakiŋdye lepeŋ kurubasi merya Iŋwan, a ködyö tine lwoŋgu; nyena ko nye ködyö a tu ŋerot i ’biddyö na lepeŋ kurubasi jore i lwöŋgu na kilo, a luŋösur mo lawene lawe konut i komor.

⁴ Ti do gwe ti toŋa kutuk na dwot an nyesu i diŋit na ryokakiŋdye nye do ’bolot na.

Ruddya na nakwan na luŋaser lo twan

⁵ A ko luŋasirik si ’da i pirit na geleŋ a lele lose iŋge twan ’bak ŋwajik, a nakwan na lu ŋuto lo twan lo ködyö tine yemaji kaŋo kase i kotumit; a luŋaser lo lalet lonyit ködyö lupöni ko lepeŋ yu, a joŋgi lepeŋ a nakwan nanyit, a nye ködyö ’depakiŋdye lepeŋ mede na luŋaser lonyit.

⁶ a mo gwe sona adi, a kayu lonyit ködyö gwo ’de i karin ti luŋaser lonyit logon a twan lo, an karin kanyit ko seyaji kaŋo i Yisaraele.

⁷ A ko lu ŋuto ti ’bon ’debba nakwan na luŋaser, a nu nakwan na luŋaser lonyit ködyö iti ko ŋutu temejik yu i kotumit na köji, a kulyani adi, Luŋaser lo lalet liŋ a renya i pipili-kiŋdya na karin ti luŋaser lonyit i Yisaraele; nye ti ’bön ’depakiŋdya na nan mede na luŋaser lonyit.

⁸ a kirut temejik ti köji nanyit ködyö luŋgi lu ŋuto a jambi ko lepeŋ: a ko nye a gwo ’dan ŋo i renya adi, Nan ti ’bon joŋga lepeŋ,

⁹ a nu nakwan na luŋaser lonyit ködyö miju ko lepeŋ nyona i komor na temejik, a rösöddi kamuket kaŋo ko lu ŋuto i ’dapanit, a ’yitani kanyit i komor, kulya adi, Ti konani sona i ŋuto logon a ko pipi ’yu kötumit na luŋaser lonyit.

¹⁰ A ŋutu ti Yisaraele mo luŋgi kotumit nanyit a kötumit na ŋuto logon kamuket lonyit a rosoji kaŋo.

Kulye saresi

¹¹ A ko ŋutu murek gwon i möro, a nakwan na lele lo miju nyona i lwöggu na lalet lonyit i könin lo ŋuto lo ’biddyö lepeŋ lu, a riöddi könin lonyit a morgi lepeŋ kanyit i toro ’bo,

¹² a ta ködyö ’duŋöro könin lonyit kaŋo, a ta tine won konyen ko lepeŋ.

¹³ A ta ködyö tine gwon ko gweyarijin murek ti witiot ti mijan kasu i jurakan nagoŋ a dumalak ko a na ’di ’dik.

¹⁴ A do ködyö tine gwon ko gweyarijin murek ti koresi ti kinyojin kasu kadijik nagoŋ a dumalak ko a na ’di ’dik.

¹⁵ A ta ködyö gwe ko witiot temesi ko koresi na ’but nagoŋ gwogwo; anyen ta ködyö si ’da ko kiŋajin jore i jur logon MATAT Ŋun losu mo titin ta lu.

¹⁶ Kogwon ŋutu liŋ logon koŋdya kine kulya, iŋkoi se liŋ logon koŋdya arabat kulo, MATAT Ŋun losu maman.

Saret logon tugŋo adi ti yeyeö na ŋutu ti Amalek seyajine kaŋo

¹⁷ Yiyiuŋdye ta ŋo nagoŋ ŋutu ti Amalek a konakin ta i kiko yu na yuuŋdye ta kaŋo i Ejipeto nu;

¹⁸ ko se a törumbo ko ta ada i kiko, a ’duŋöddi se logon gwon kasu bot logon a lomunyak, na doddi ta ko na darari ta nu; a se tine kujoŋo Ŋun.

¹⁹ Nyenagon na tiŋdi MATAT Ŋun losu ta yukan i merok kasu liŋ lo gombu ta, i lu jur logon MATAT Ŋun losu a tin ta i morga a losu lu; a ta ködyö seyaddi yeyeö na ŋutu ti Amalek kaŋo i kak ’bukuluŋ; a ta ködyö tine böŋöri.